44. पतरस आवरी यहून्ना गोटक भिखारी के चंगा करलाय

गोटक दिने पतरस आवरी यहून्ना मन्दिर ने गलाय। गोटक विकलांग मुनुक भीख मागबा काचे बाटे बसी रला।

पतरस हाँय विकलांग मुनुक बाटे दखला आवरी बोलला, मोर लगे तोके देबा काचे पैसा तो नियाय। मातर जोन मोर लगे आचे हाँय मुई तोके देबी आची। ईशुर नाव ने उठ आवरी हिंडा – बुला हो।

मापरू तुरते हाँय विकलांग मुनुक के अच्छा करला। हाँय एबाटे- हाँयबाटे हिंडबार आवरी उदलबार आवरी मापरुर भजन कीर्तन करबार मुरायला। मन्दिर ने रला लोकमन चकित होयलाय।

लोकमन जपके हाँय मुनुक के दखबा काचे आयला, जोन अच्छा होई रला। पतरस ताके बोलला, ये मुनुक अच्छा आय मातर ये गोट ऊपरे चकित ना हो। हामी ऐके हामर शक्ति ले अच्छा ना करलू आचू आवरी ऐइकाचे नाई कि हामी मापरुर आदर करुहा। बलले हाँय ईशु आय जोन ये मुनुक के तार शक्ति ले अच्छा करला आचे, कसन बोलले हामी ईशुर उपरे भरोसा करूँहा।

तोमि आस जोनमन हाँय रोमी राजपाल के ईशु के मारबा काचे बोली रलास। तोमि ताके मारी देलास जोन सबुके जीवन देऊआय। मातर मापरु ताके मरला तानले जीव करला। तोमि ना समझलास कि तोमि काय करबा आस। मातर जैबे तोमि हाँय काममन के करते रलास, जोन भविषद सागबा बिता बोली रला, हाँय पूरा होयला। हाँयमन बोली रलाय कि मसीही दुःख उठायसी आवरी मरी जायसी। मापरु ऐके ये तरीका ले होयके देला। येईकाचे येबे पश्चताप करा आवरी मापरुर बाटे आसा हाँय तोमर पापमन के धोई करी अच्छा करसी।

जड़कदाय मन्दिरर अगुवामन पतरस आवरी यहुन्नार सुनलाय तो हाँयमन कुबे घबरायलाय। येईकाचे हाँयमन तीके बन्दी करी जेल घरे नेलाय, मातर जोन पतरस के बोली रला, हातार उपरे कुबे लोकमन बिसबास करलाय। ईशुर ऊपरे बिसबास करबा बिता मन कुबे लोक होयलाय अनुमान ने पाँच हजार लोक होयलाय।

पाछर दिने यहूदी अगुवामन पतरस आवरी यहुन्ना के बड़े पुजारी आवरी उजवा धार्मिक अगुवामनर छोमे आनलालाय। हाँयमन हाँय मुनुक के पने आनलाय जोन विकलांग रला। हाँयमन पतरस आवरी यहुन्ना के पचारलाय। काय अधिकार ले तोमि हाँय विकलांग मुनुक के अच्छा करलास।

पतरस जबाब देला, ये मुनुक जाने तोमर छोमे ठिंआ आचे। हाँके ईशु मसीहीर शक्तिर दवारा अच्छा होयला आचे। तोमि ईशु के कुरूस ऊपरे चेगायलास, मातर मापरू ताके आवरी जीव करला। तोमि ताके अस्वीकार करलास, मातर ईशुर शक्ति के छाड़ी उध्दार पायबा काचे कोनी उजवा बाट नियाय।

हाँय अगुवामन हैरान रलाय, कि पतरस आवरी यहुन्ना कुबे साहसी रूप ले गोटायते रलाय। हाँयमन दखलाय कि ये मन साधारण मुनुक रलाय, येमन अनपढ़ रलाय। मातर तीके सुरता आयला कि ये मुनुक मन ईशुर संगे रबार आत। ऐकाचे हाँय मन तीके बोललाय, हामी तोमके कुबे दण्ड देबू जोदि तोमि ये मुनुक के ईशुर बाटने लोक मन के कांही आवरी खबर देले, असनी कुबे गोट बोललार पाछे, हाँयमन पतरस आवरी यहुन्ना के जायके देलाय।