45. स्तिफनुस आवरी फिलिप्पुस

पहिला मसीही अगुवामनर मोजी ने स्तिफनुस नावर गोटक मुनुक रला। सबु लोक हातार आदर करते रलाय। पवितर आतमा ताके कुबे शक्ति आवरी बुद्धिर बरदान देई रला। स्तिफनुस कुबे चमत्कार करी रला। जैबे हाँय ईशुर उपरे भरोसा करबार बारे लोकमन के शिक्षा देला तो कुबे लोकमन हातार ऊपरे विसबास करलाय।

गोटक दिने स्तिफनुस ईशुर बारे ने शिक्षा देयते रला, आवरी कोनी असन यहूदी आयलाय ईशुर ऊपरे जोन लोक बिसबास ना करी रलाय आवरी हातार संगे वाद – विवाद करबार मुरायलाय, हाँयमन रिस होयलाय ऐइकाचे हाँयमन धार्मिक अगुवामन लगे गलाय आवरी तार बारे ने झूट बोललाय। हाँयमन बोललाय, हामी स्तिफनुस के मूसा आवरी मापरुर बारे गलत गोट बोलबार सुनलू आचू। ऐइकाचे धार्मिक अगुवामन स्तिफनुस के बंदी करलाय आवरी ताके बड़े पुजारी आवरी यहूदीमनर उजवा अगुवामनर छोमे आनलाए। आवरी झूठा गवा आयलाए आवरी हाँयमन स्तिफनुस बारे झूठ बोललाय।

बड़े पुजारी स्तिफनुस के पचारला काय ये लोक सत्ते बोलबा आत? स्तिफनुस पुजारी के जबाब देबा काचे कुबे गोटमन के सांगला। हाँय बोलला, अबराहम दाय ले आवरी ईशुर तक मापरू इसराइल लोक काचे कुबे अद्भुत काम करला आचे। मातर लोकमन आकट मापरुर आज्ञा ना मानेत। स्तिफनुस बोलला तोमि लोकमन मापरुर विरोध ने हटीला आवरी बलवा करबा बितामन आस, तोमि आकट पवितर आतमा के अस्वीकार करलास जसन कि हामर पूरबर लोक सबूदाय पवितर आतमा के अस्वीकार करी रलाय, आवरी सबूदाय हातार भविषद सागबा बितामनर द्वारा देई रला। मातर जोन हाँयमन करी रलाय हातार तुलना ने तोमि आवरी पने गलत करलाआस। तोमि मसीही के मारी देलास।

जैबे हाँय धार्मिक अगुवामन ये सुनलाय, तैबे हाँयमन अतक रिस होयलाय कि हाँयमन तिकर कान मनके थापलाय, आवरी कुबे आवाज ले चिचायलाय, हाँयमन स्तिफनुस के ओड़घोड़ते शहर ले बाहरे नेलाय। आवरी हाँके मारबा काचे पकना ने मारलाय।

जैबे स्तिफनुस मरबा दाय हाँय आगदेला, “हे ईशु, मोर आतमा के गरहन कर। तैबे हाँय घुटना ने गसरला आवरी आगदेला,” हे परबू ये पाप के तिकर ऊपरे ना लगाव। तैबे हाँय मरी गला।

हाँय दिने यरुशलम ने रबा बितामन कुबे लोकमन के जोन ईशुर बिसबासीमन के सतायबार मुरायलाय, ऐईकाचे बिसबासी लोक उजवा जगा ने गलाय। मातर एतार बावजूद पने जोन ताने गलाय हाँयताने गलाय, हाँयमन ईशुर परचार करलाय।

फिलिप्पुस नावर गोटक ईशुर बिसबसी रला। जसन उजवा बिसबासी मन करी रलाय, हाँय मन पने यरूशलेम ले पराय रला। सामरियामनर क्षेत्र ने गला। हाँयताने लोकमन के ईशुर बारे ने परचार करला। कुबे लोक हातार उपरे बिसबास करलाय आवरी उध्दार पायलाय। गोटक दिने फिलिप्पुस लगे मापरु बाटले गोटक सरगदूत आयला, आवरी ताके झारने जिबा काचे आवरी गोटक बाट ऊपरे जिबा काचे बोलला, फिलिप्पुस हाँयताने गला। जड़कदाय हाँय बाट ऊपरे हिंडते रला। तैबे फिलिप्पुस गोटक मुनुक के तार रथ ने जिबाटा के दखला। ये कुश देशर गोटक बड़े अधिकारी रला। पवितर आतमा फिलिप्पुस के बोलला, कि जाई करी हाँय मानेर संगे – संगे जा।

ऐकाचे फिलिप्पुस रथ लगे गला। हाँय सुनला कि हाँय कुश मापरुर वचन के पढ़ते रला। जाके यशायाह भविषद सागबा बिता लिखी रला, हाँय ताके पढ़ते रला। हाँय पढ़ते रला, हाँयमन ताके बलि करबार मेंढार असन नेलाय आवरी, जसन गोटक मेंढा होगाय होई रहूआय, हाँय पने गोटक शब्द ना बोलला। लोकमन तार संगे अनुचित व्यवहार करलाय आवरी आदर ना करलाय हाँयमन तार परान धरलाय।

फिलिप्पुस हाँय कुशी के पचारला जोन के तूई पढ़बीआस काय तुई ताके समझबी आस? कुशी जबाब देला ना। जड़कदाय कोनी मोके ना समझायेत तैबे तक मुई एके ना समझके सकी। किरपा करी मोर लगे आव आवरी बस। यशायाह एके तार बारे ने लिखते रला, नोयले कोनी आवरीर?

फिलिप्पुस रथ ऊपरे चेगिकरी बसला, तैबे फिलिप्पुस हाँय कुशी मुनुक के हाँय गोट सांगला, जोन यशायाह ईशुर बारे लिखी रला। फिलिप्पुस मापरुर वचनर कुबे ऊजवा भागमन के पने सांगला। असन परकार ले फिलिप्पुस, हाँय मुनुक के ईशुर बारे ने नगत खबर सांगला।

फिलिप्पुस आवरी हाँय कुशी जायते -जायते पानी लगे आयलाय। हाँय कुशी बोलला, दख। एलगे पानी आचे, काय मुई बतिसमा धरके सकी। आवरी हाँय सारथि के रथ के थेबायबा काचे बोलला।

तैबे हाँयमन पानी ने गलाय, आवरी फिलिप्पुस हाँय कुशी के बतिसमा देला। जैबे हाँयमन पानी ले ऊपरे आयलाय तैबे पवितर आतमा उदापड़े फिलिप्पुस के उठाय करी उजवा जगा ताने नेला। हाँयताने फिलिप्पुस लोकमन के ईशुर बारे ने सांगते रला।

हाँय कुशी तार घर बाटे गला। हाँय हरिक रला, कि अबर हाँय ईशु के जानते रला।