46. पौलुस ईशु मसीर बिसबासी होउवाय

शाऊल नावर गोटक मुनुक रला हांय ईशुर ऊपरे विशबास ना करी रला, जड़कदाय हाँय जुवान रला, तैबे हाँय स्तिफनुस के मारबा बितामनर पटई मनके देख-रेख करते रला। पाछे हाँय विश्वासी मनके सतायते रला, हाँय यरूशलेम ने घरे -घरे जाई मुनुक आवरी बायले मन के बंदी करी जेल घरे डाफी देयते रला। तैबे बड़े पुजारी शाऊल के दमिश्क शहर ने जिबा काचे अनुमति देला, हाँय, हाँयमनर मसीह लोक के बंदी करी आवरी तीके लैवटाय करी यरूशलेम ने आनबा काचे शाऊल के बोलला।

तैबे शाऊल दमिश्क शहरे जिबा काचे होयला, शहरने केटबार किंडीक पहिले हातार सबु बाटे बादरी ले ऊजरर परकाश चमकला, आवरी शाऊल भुई ने गसरला। शाऊल गोटक गोट के सुनला, “हे शाऊल तुई मोके काय काचे सतायबी आस? शाऊल पचारला हे परबू तुई कोन आस? ईशु ताके जबाब देला, मुई ईशु आंय। तुई मोके सतायबी आस।”

जैबे शाऊल ऊठला तैबे हाँय दखके ना सकते रला। तार संगर लोक ताके दमिश्क शहरे नेलाय, शाऊल तीन दिनले कांई पने खाई – पीई ना रला।

दमिश्क ने हनन्याह नावर गोटक चेला रला। मापरु हांके बोलला, हाँय घरे जा जोनताने शाऊल तेबला आचे। तोर हाथ के तार ऊपरे सोगाव कि शाऊल द्खके सको, मातर हनन्याह बोलला, “हे परबू मुई सुनली आची कि ये मुनुक विश्बासी लोक के कुबे सतायला आचे। मापरू ताके जबाब देला,” जा मुई ताके यहूदीमन आवरी उजवा जातिर लोक मन लगे मोर नाव के घोषणा करबा काचे बाचली आची। हाँय मोर नाव काचे कुबे कष्ट होयसी।

तैबे हनन्याह शाऊल लगे गला, तार हाथ के शाऊल ऊपरे करला आवरी बोलला, एताने आयबादाय बाटने ईशु तोर ऊपरे परकट होई रला, मोके तोर लगे पटायला आचे, कि तुई आवरी द्खके सक आवरी पवितर आतमा तोर ऊपरे आसो तुरते शाऊल दखला आवरी हनन्याह ताके बतिसमा देला। तैबे शाऊल भात खायला आवरी ताके ताकत मिरला।

तैबे शाऊल दमिश्क ने रबा बिता यहूदीमन के परचार करबार मुरायला। हाँय बोलला, ईशु मापरुर बेटा आय। यहूदी लोक चकित होयलाय। कसन बोलले शाऊल विश्बासीमन के मारबा काचे होई रला, मातार येबे हाँय ईशु के विशबास करला शाऊल यहूदीमन संगे वाद – विवाद करला। हाँय द्खायला कि ईशु ही मसीह रला।

कुबे दिनर पाछे यहूदीमन शाऊल के मारबा काचे विचार करलाय। हाँयमन ताके मारबा काचे शाऊलर आयबार -जिबार बाटे लोकमन के पटायलाय कि ताके देख रेख करबा काचे, मातर शाऊल तिकर विचार के सुनला आवरी तार संगर लोक बाचीकरी जिबा काचे तार संग देलाय। गोटक राती हाँयमन शाऊल के टोकरी ताने बसायकरी नगरर बाड़ा ले शाऊल के तले उतरायलाय। दमिश्क ले बाची करी निकरलार पाछे शाऊल ईशुर परचार करते रला।

शाऊल ईशुर चेलामन के भेटबा काचे यरूशलेम गला, मातर चेलामन ताके डरते रलाय। तैबे बरनबास नावर गोटक बिश्बासी शाऊल के चेलामन लगे नेला। हाँय तीके सांगला शाऊल कसन हिमत करी दमिश्क ने परचार करी रला। एतार पाचे शाऊल के स्वीकार करलाय।

जोन बिश्बाशी मन यरूशलेमर सताव ले पराय रलाय, हाँयमन कुबे दूर अतंकिया नगर ने जाई रलाय, आवरी ईशुर परचार करते रलाय। अतंकिया ने रबा लोक यहूदी लोक कुबे ना रलाय, मातर पहिल बार हाँयमन तानले कुबे लोक बिश्बासी होयलाय। बरनबास आवरी शाऊल ये नुवा बिश्बासीमन के ईशुर बारे आवरी कुबे सीखायबा काचे अतंकिया गलाय, आवरी कलीसिया के मजबूत करलाय। ईशुर ऊपरे बिश्बास करबा लोक पहिल बार अतंकिया ताने मसीह बोलाय होयलाय।

गोटक दिने अतंकिया ने मसीह लोक उपास पारतना करते रलाय, पवितर आतमा तीके बोलला, बरनबास आवरी शाऊल के मोर काम करबा काचे अलगे करा। जान के करबा काचे मुई तीके आगदेली आची। एईकाचे अतंकियार कलीसियार लोक बरनबास आवरी शाऊल काचे पारतना करलाय आवरी तिकर ऊपरे तिकर हाथ के सोगांयलाय। तैबे हाँय मन तीके ऊजवा कुबे जगा मनने ईशुर नगत खबर के सागंबा काचे पटायलाय। बरनबास आवरी शाऊल ऊजवा – ऊजवा जातिमनर लोकमन के सीखायलाय आवरी कुबे लोक ईशु के बिश्बास करलाय।