10. दस बिपत्ति
मापरु मूसा आवरी हारून के चेतानी देला कि फिरौन कटूर होई गला आचे। जड़क दाय हांयमन फिरौन लगे गलाय तेबे हांय मन बोललाय इस्राएल र मापरु असन बोलसी आचे मोर लोकमन के जायके देस। मातर फिरौन तिकर गोट के ना सुनला आवरी इसराइली मन के जायके ना देला आवरी हांयमन के कटिन मयनत करबा काचे मजबूर करला।
फिरौन हांय लोकमन के जायके देबा काचे नाई ची बोलते रेला, ई काचे मापरू मिसर देस ने दस भयंकर बिपति पटायला। ई बिपति मन बाटले मापरु फिरौन के दखायला कि कि हाने फिरौन आवरी मिसर र देव भुत ले कुबे सकत आय।
मापरु नील नदी के लहूने बदली देला मातर फिरौन एबे बोले इसराइली मन के जायके ना देला।
मापरू गुलाय मिसर ने बेंडका पठायला। फिरौन बेंडाका के भगायबा काचे मूसा के जुआर करला। मातर सबु बेंडाका मरी मरी गलार बाद फिरौन आपनार मन के कठोर करी देला आवरी इसराइली मन के मिसर ले जायके ना देला।
ई काचे मापरू कुटकी र बिपति पटायला हांतार बाद डांस र बिपति पटायला। फिरौन मूसा आवरी हारून के हाग देला आवरी हांय मन के बोलला, हांय मन हांय बिपति के गुचाय देले तेबे इसराइली मन मिसर के छाड़ी करी जायके सकेत। जड़क मूसा पारथाना करला तेबे मापरू मिसर ले डांस के गुचाय देला। मातर फिरौन हांतार मन के कठोर करी देला आवरी हांय लोक मन के आजाद होई करी जायके ना देला।
पालतू जानवर मन के बीमार होई करी मरी जायके देला। मातर फिरौन र मन कठोर होई जाई रये आवरी हांय इसराइली मन के जायके ना देला।
तेबे मापरु मूसा के फिरौन र छोमे हवा ने लाकड़ी पोकायबा काचे बोलला। जड़क दाय हांय असन करला मिसर र लोक मन र गागर ताने कुबे दंड र घाव निकरी आयला मातर इसराइली मन के काई ना होयला। मापरु फिरौन र मन के कठोर करी देला आवरी फिरौन इसराइली मन के आजाद होई करी जायके ना देला।
एतार बाद मापरू ओला गसरायला आवरी मिसर र कुबे फसल के नास करी देला आवरी जोन कोनी बोले बाहरे निकरला हांके मारी देला। फिरौन मूसा आवरी हारून के हाग देला आवरी बोलला मुई पाप करली आची। तोमी लोकमन जायके सकास आवरी मूसा पारथना करला तेबे बादली ले ओला गसरबार टेबी गला।
फिरौन आवरी पाप करला आवरी आपनार मन के कठोर करी देला। आवरी इसराइली मन के आजाद होई करी जायके ना देला।
आवरी मापरू मिसर ने कुबे थापा मन के पटायला। ए थापा मन हांय सबु फसल के खाई देलाय जाके ओला नास ना करी रेला।
पाचे मापरू अन्धार करी देला, जोन तीन दिन तक रेला। ए अतक पीरीचनाय अन्धार रये कि मिसर लोक आपनार घर ले निकर के ना पारलाय मातर जोनती इसराइली लोक रयते रयेत हांयती उजर रये।
ए नव बिपति मनर पाचे बोले फिरौन इसराइली मन के आजाद होई करी जायके देबा काचे माना करला। फिरौन तिकर गोट के ना सुनला ई काचे मापरु गोटक आकरी बिपति के पाटायबार बिचार करला। ए फिरौन र मन के बदली देयसी।
निर्गमन अध्याय 5-10 बाइबलर एक कतानी
खुले लाइसेंस (CC BY-SA 4.0) के अंतर्गत उपयोग करने, बदलने और साझा करने के लिए निःशुल्क।