11. फसह परव

मापरू मूसा आवरी हारून के फिरोन लगे असन बोलबा काचे पठायला कि इसराइली मन के जायके देस हांय म हांके चेतानी देलाय कि तिके जायके ना देले मापरू मिसर देस र लोकमन र आवरी जनावर मन र पईलात मन के मारी देयसी। फिरोन एके सुनी करी बोले मापरू उपरे सत ना करला आवरी हांतार गोट के ना मानला।

मापरू हांतार उपरे बिसवास करबा लोक र पईलात मन के बचायबा काचे गोटोक उपाय प्रबंध करला। सबु घर ने गोटोक गोटोक दोस नोयलार मेंडा पीला के धरी करी हांके मारबार रये।

मापरू इसराइली मन के हांय मेंडा र लोऊ के तिकर घर र कपट ने लगायबा काचे बोलला। हांतार मास के पोड़ाय करी अखमीरी रोटी संगे झटके ले खायबार रये। हांय, हायंमन के खायला पाचे तुरते मिसर के छाड़ी करी जिबा काचे तियार रेबा काचे बोलला।

मापरू इसराइली मन के जसन करबा काचे हुकुम देई रला हांय मन असनी च सबु करलाय। अधगर राती बेरा मापरू सबु पईलात मन के मारते मारते मिसर देस र मंजीगता ले गला।

इसराइली मन र सबु घर र कपाट मन ने लोऊ लगायलार रये ई काचे मापरू हायं घर मन के छाड़ी देला। हांय भीतर र सबु लोक बाचलाय। मेंडा पीला र लोऊ र कारन ले बाचलाय।

मातर इसराइली मन मापरू उपरे बिसवास ना करी रेलाय आवरी हांतार हुकुम के ना मानी रेलाय। ई काचे मापरु तिकर घर मन के ना छाड़ला। मापरु मिसरी मन र सबु पईलात बेटा मन के मारला।

जयल घर र कयदी र पईलात ले धरी करी फिरौन र पईलात तक सबु पैमन मरी गलाय। हांय मन तिकर खुबे दुःख चिंता र कारण मिसर र खुबे लोक मन कांदते रेलाय ।

हांय ची राती फिरौन मूसा आवरी हारून के हाग देला आवरी बोलला ‘’इसराइली मन के धरी करी झटके मिसर देस ले निकरी जाहा’’मिसर र लोक मन बले इस्राएली मन के तुरते निकरी जीबार मन गुहार करलाय।