12. जिबार

इसराइली मन मिसर ले निकरी करी खुबे हरिक रेलाय। एबोर हांय मन कमेया ना रेलाय आवरी हांय मन बायदा र जायते रेलाय। जोन बले इसराइली मन मांगलाय मिसरी मन हांय मन के सबु देलाय, सोना, चांदी आवरी दुसर खुबे मोल तीज मन बले। दुसर देस र आदो लोकमन मापरू उपरे बिसवास करलाय आवरी जड़क दाय हांय मन मिसर ले निकरलाय तेबे हांय मन बले तिकर संगे होयलाय।

दिन बेरा बादरी र छांय तिकर र छोमे छोमे जायते रेला, आवरी राती बेरा हांय जोय र बड़े खम्बा बनते रये। मापरू बादरी र छांय आवरी जोय र खम्बा बनी करी हरमेसा तिकर संगे रये आवरी जिबादाय तिके बात दखायते रये। हांय मन के सोजे हांतार पीटी पीटी जीबार रये।

खिंडिक समय र पाचे,फिरौन आवरी हांतार लोकमन र मन बदला। हांय मन इसराइली मन के आवरी कमेया बनायबा मन करलाय। ई काचे हांयमन इसराइलीमन के खेदी नेलाय। मापरू ची तिकर मन के बदली रये। मापरु असन ई काचे करला कसन कि हांय मन करते कि सबु जानोत कि हांय फिरौन आवरी मिसर र सबु भगवान ले यहोवा खुबे सकत बीता आय।

जड़कदाय इसराइली मन मिसर र सैनिक मन के आसबा के दकलाय तेबे हांय मन जानलाय कि हांयमन मिसर र सैनिक र आवरी लाल समुंद र मंजी गता फसला आत। हांयमन खुबे डरलाय आवरी कान्दके मुरायलाय ‘’हामी मिसर के काय काचे छाड़लु ? हामी मोरुआंव बे। ’’

मूसा इसराइली मन के बलला, ‘’ना डरा, मापरू आजी तोमर काचे लड़सी आवरी तोमके बचायसी। ’’ तेबे मापरु मूसा के बलला, ‘’ए लोक मन के लाल समुंद बाटे छोमे जीबा काचे बोल। ’’

तेबे मापरु हांय बादरी र खम्बा के इसराइली मन र आवरी मिसरी मन र मंजिगता आनला कसन कि मिसरी मन इसराइली मन के ना दकके सकोत।

मापरु मूसा के समुंद उपरे हात लोमायबा काचे बोलला। पाचे मापरु लेहरा ले समुंद र पानी के उजा बाटे आवरी डेबरी बाटे करी देला, तेबे समुंद मंजिगता ले गोटक बाट बनला।

इसराइली लोक मन आपनार दुनो बाटे भीती असन पानी रलार सुकला भुई ने समुंद भीतर ले गलाय।

तेबे मापरु तिकर मंजीगता ले बादरी र खम्बा के गुचायला कि मिसरी मन इसराइली मन के बाची करी जीबाटा दकोत। मिसरी मन हांय मन के खेदी नेई करी दरबा बिचार करलाय।

ई काचे हांय मन समुंद भीतरे इसराइली मन के खेदी नेलाय मातर मापरु मिसरी मन के डराय देला आवरी तिकर रथ के अटकाय देला। हांय मन किरकिरके मुरायलाय, ’’पोराह, इसराइली मन बाटले मापरु लड़सी आचे।

सबु इसराइली मन समुंद र दुसर बाटे अमरलाय। तेबे मापरु मूसा के बोलला कि हानी फिर पानी उपरे हात लामाओ। जड़क दाय मूसा असन करला, तेबे पानी मिसरी उपरे आसला आवरी आगर असन होयला। तेबे सबु मिसरी सेना मन बुड़ी गलाय।

जड़क दाय इसराइली मन दकलाय कि मिसरी मन गलाय तेबे हांय मन मापरु उपरे बिसवास करलाय। आवरी हांयमन बिसवास करलाय कि मूसा मापरु बाटले आगमजानी आय।

इसराइली लोक मन इ काचे बले कुबे हरिक रेलाय कसन कि मापरु हांय मन के मोरबा ले आवरी कमेया होयबा ले बचाय रये। एबोर हांय मन मापरु र आराधना करबा आवरी हांतार हुकुम मानबा काचे स्वतन्त्र आचेत। इसराइली मन तिकर स्वतंत्रता र परब मनायबा काचे आवरी मापरु र जय जय करबा काचे कतक गीत मन गायलाय कसन कि हांय हांय मन के मिसर र सेना ले बचाय रये।

मापरु इसराइली मन के हर बरक गोटोक परब मानबा काचे हुकुम देला ए सुरता करायबा काचे कि कसं मापरु मिसरी मन के हारायला आवरी हांय मन के कमेया होयबा ले छाड़ायला। ए फसह तिहार होयला। हांय मन ए तिहार के मानबा काचे गोटोक अच्छा मेंडा के जतरा करबार रये, हांके पोड़ायबार रये आवरी हांके अखमीरी रोटी संगे खायबार रये।