14. झारे हाजबाटा

मापरु इसराइली मन के हांय नियम के सांगला सरायकरी जोन्टाले हांके बांदी जाई रेला। हांतार किरिया र लागीकरी पालन करबार रये। आवरी हांय सीनय परबत ले छोमे हांके अगुवाई करला अ\ हांय हांके किरिया र देस ने नेबार चायते रेला। हांय देस कनान बले बलबार रेला। मापरु बादरी र खोमा ने हांतार छोमे छोमे हिंडला आवरी पीटी पीटी हिंडला।

मापरु अबराहम इसहाक आवरी याकूब ले किरिया करी रेला। हांय किरिया र हांय देस तिकर वंसज के देयसी मातर ए बेरा येती थाने खुबे जसन जाती रेला। ह्स्सन्य्स कनानी बलते रेलाय। ए कनानी लोक मापरु र आराधना ना कबारात आवरी हांतार आगंया के ना मानबार आय। हांय झूटे देवताओं र उपासना करबार आत आवरी खुबे जसन घिन घिना बुता करबार आत।

मापरु इसराइली मन के बोलला जेबे तुय ए किरिया र देस ने जा तेबे हांयतिर सबु कनानी मन ले छुटकारा पाय्बार हांतार संगे सक ना करबाराय आवरी हांय बिया ना करबार आय। तोमके हांतार सबु मुरती मन के नसाय करी देबार बोलला। अगर तुय मोर आगंया ना मानलीस आले तुय मोर बजाय हांतार देवता मनर उपासना करबार लागसी।

जेबे इसराइली मन कनान र सीमा थाने खेटलाय। मूसा इसराइली मन र सबु गोत्र मन ले गोटोक गोटोक बारा माने मन के चुनला। हांय हांय मन के जाई करी हांय देस र भेद दरबार निर्देस देला। कि दकलाय कि हांय कसन देस आय। हांके हांय कनानी र भेद बोले धरबार रेला कि दका कि हांय बलसाली रेला कि निर्बल रे।

हांय बारा माने सबु कनान ले होई करी चालीस दिनर यात्रा करलाय आवरी पाचे हांय आपस आयला। हांय मन लोकमन के सांगलाय हांय खुबे उपजाऊ आय आवरी फसल खुबे होऊ आय। मातर दस भेदिया मन बोललाय हांतार सहर खुबे दूर आय आवरी हांय मन खुबे मोटा ताजा आचेत। अगर हामी हांतार हमला करबू तो सत्ते हांय हामके हारयसी आवरी हामके मारी देबाय।

अड़कीच दाय दुय जन भेदिया मन कालेब आवरी यहोसू बललाय ‘’ येती सच आचे कि कि कनान र लोक लोम आवरी बोपू रेला मातर निश्चित रुप ले हामी हांके हारय्के सकू। मापरु हामर काचे लड़सी।

मातर लोकमन कालेब आवरी यहोसू र ना सुनलाय। हांय मूसा आवरी हारून उपरे रीसा होयलाय आवरी बोललाय तोमी हामके ए भयानक जागा थाने काय काचे दरीकरी आयला आचास ? हामके मिसर ने ची रेबार रेला। अगर हामी हांय ने जुबार आत तेबे हामी मारा माटी ने मोरी जिबु आवरी कनान र लोक हामर बायले मन आवरी पिलामन के कमेया बनायबा। ई काचे हांय मन मिसर ने आपस जिबा काचे दुसर के अगुवा बनायबार चायते रेलाय।

जड़क दाय हांय लोक मन असन बोलला तेबे मापरू कुबे रिसा होई गला। हांय मिलाप बीती तमुने आयला आवरी बोलला तोमी मोर बिरुद बलवा करला आचास ई काचे तोमी सबु के ए जार ने किन्दरबार होयसी। हर गोटोक जन जोन बीस बरस या हांतार ले कुबे उमर र आत। हांय मोरी जायसी आवरी केबी बोले हांय देस ने ओलके ना सके। जोन मुई तोमके देबी आची। सोजे कालेब आवरी यहोसू ची हांयती ओलबाय।

जड़कदाय लोक मापरू के असन बोलबादाय सुनलाय तेबे हांय दुकी होयलाय काय काचे कि हांय मन पाप करी रयेत। ई काचे हांय मन कनान र लोक उपरे हमला करबार बिचार करलाय। मूसा हांय मन के ना जीबा काचे चेतानी देला काय काचे कि मापरु हांके संगे ना जाये, मातर हांय मन हांतार ना सुनलाय।

मापरु ईतिर मारा मारी ने तिकर संगे ना गला, ई काचे कनानी मन हांय मन के हारायलाय आवरी हांयतिले ले कुबे के मारी देलाय। तेबे इसराइली लोक कनान ले आपस गलाय। अलगा चालीस बोरस तक हांय जंगल ने एने हाने किन्दरते रेबाय।

इसराइली लोकमन जंगल ने किन्दरलार चालीस बोरस र पाचे मापरू हांतार जरूरत के पूरा करला। हांय हांके सरग ले मन्ना बोलबा रोटी देला आवरी लावा बले देला जोन अच्छा आकार र चेडे आत। हांतार छावननी ने पटायला। काय काचे कि हांतार लगे खायबा काचे मास रओ। हांयसबु दाय मापरु हांय मनर तिकर सबु दाय मापरु हांय मन र फटई आवरी बुटर फाटबार ले बाचाय करी सोंगायलाय।

एतार ले बले मापरू हांय मन र पियबा काचे चमत्कार रुप ले पोकना ले पानी निकरायला। मातर अतक ले बले इसराइली लोक मापरु र बिरुद आवरी मूसा र बिरुद बोललाय आवरी कुड़कूड़ायलाय। तेबले बले मापरू सत रये। हांय जोन किरिया करी रेला कि हांय अबराहम, इसहाक आवरी याकूब र बंसज र काचे करबार रेला, हांय करला।

एक आउर समय जढ़क दाय हाय लोक मोन लगें पानी ना रला, माप्रु मुसा के बोलला, “ पकना मोन के बात कर, आवरी हाय तांनले पानी निकलसी ।“ मातर मुसा पकना ले ना गोटाएला । तार बदले, हाय तार बोड़गा संगे पकना आने दुइ हार मारला । हाइ हिसाबे हाय माप्रु के निरादर करला । सब लोक काचे पकना ले पानि निकलला, मातर माप्रु मुसा ले रिसा होयला । हाय बोलला, “ तुइ अमता करलिस, हाइटा काचे तुइ किरिया करला देश आने ओरके ना सकिस ।“

जड़क दाय इसराइली लोक चालीस बोरस तक झार ने किन्दरते रेलाय तेबे जोन मापरू र बिरुद बलवा करी रयेत, हांय मन सबु मोरी जाई रेलाय। तेबे मापरू हांय लोक के पाचे हांय किरिया र देस र संद तक नेला एबर मूसा खुबे डोकरा होई रेला। ई काचे मापरु र लोक अगुवाई करबा ने हांतार सयता करबा काचे यहोसू के चुनला। मापरु मूसा ले ए किरिया करी रेला, गोटोक दिने हाय, हांय लोक लगे मूसा र जसन गोटोक आगमजानी पटायसी।

तेबे मापरु मूसा के गोटोक परबत र मुंडी थाने जीबा काचे बोलला, काय काचे कि हांय किरिया र देस के दकके सको। मूसा हांय किरिया र देस के दकला मातर मापरु हांके हांयती ओलबा काचे आगंया ना देला \तेबे मूसा मोरी गला आवरी इसराइली मन तीस दिन तक दुःख बनायलाय। यहोसू तिकर नुआ अगुवा बनी गला। यहोसू गोटोक अच्छा अगुवा रेला, काय काचे कि हांय मापरु उपरे भोरसा करला आवरी हांतार गोट के मानला ।