15. बायदा र देस

सरासरी ने, एबोर हांय समय आसला कि इसराइली लोक बायदा र देस, कनान ने ओलबाय। हांय देस ने यरीहो नावर गोटोक सहर रेला। हांतार सुरक्छा काचे हांतार भोंवरोक मजबूत दीवाल रये। यहोसू हांय सहर ने दूय भेदिया मन के पटायला। हांय सहर ने राहाब नाव र गोटोक बेस्या रयते रये। हांय ए भेदिया कं के लुकायला आवरी पाचे हांय मन के, हांय सहर ले बाची निकरबा ने सायता करला। हांय असन इ काचे करला काय काचे कि हांय मापरू ने बिसवास करते रेला। जड़क दाय इसराइली लोक यरीहो के नास करबाय तेबे हांय मन राहाब आवरी हांतार घर लोक के बचायबार बायदा करी रेलाय।

इसराइली लोक मन के बायदा र देस ने ओलबा काचे यरदन के पार करबार रये। मापरु यहोसू के बोलला ‘’याजकमन के आगे जायके देस। ’’जड़क दाय मापरु र पुजारी मन यरदन नदी ने आपना गोड़ के मांडायलाय तेबे बोहयबा पानी ठेबी गला, हांतार ले इसराइली लोक मन सुकला भुई ने हिंडते नदी र हांय पाट गलाय।

हांय मन यरदन नदी पार करला पाचे मापरु यहोसू के बोलला कि यरीहो ने लड़ाई करबा काचे तियार रा, कसन कि हांय खुबे मजबूत सहर रये। मापरू हांय लोक मन के बोलला कि तिकर याजक मन आवरी सयनिक मनके छय दिन तक हांय सहर र भोंवरोक किन्दरबार आय। ई काचे याजक मन आवरी सयनिक मन असनी च करलाय।

तेबे सातवां दिने, इसराइली मन हांय सहर र भोंवरोक सात हार किन्दरलाय। हांय मन सहर र सात हार किन्दरला बाद याजक मन आपना तोड़ी के फुकलाय आवरी सयनिक मन जोर ले किरकिरलाय।

तेबे यरीहो सहर र भोंवरोक र दीवाल घसरला। जसन मापरु आगंया देई रेला इसराइली मन हांय सहर र सास तीज के नास करी देलाय। हांय मन सोजे राहाब आवरी तिकर घर र लोक के छाड़ी देलाय, जोन मन इस्राएल र भाग बनी जाई रेलाय। जड़क दाय कनान ने रेबा लोक दुसर लोकमन ले सुनलाय कि इसराइली मन यरीहो सहर के नास करला आत तेबे हांय मन खुबे डरी गलाय कि इसराइली मन हामके बोले मारा मारी करबाय।

मापरू इसराइली मन के आगंया देई रेला कि कनान ने रयते रेबा कोनी बोले जाती संगे मेल मिलाप ना करबार आय। मातर गिबोनी नावर गोटोक कनानी जाती यहोसू ले झूट बोललाय कि हांय मन कनान ले दूर गोटोक जागा ने रेबा बीता मन आत। हांय मन यहोसू ले तिकर संगे मेल मिलाप करबार गुहारलाय। यहोसू आवरी दुसर इसराइली अगुवा मन माप्र्रू ले ना पुचलाय,कि हंय मन के काय करबार आय। एतार पालटा हांय मन गिबोनी मन संगे मेल मिलाप करलाय।

तीन दिन बाद इसराइली मन के मालुम होयला कि गिबोनी मन कनान ने रेबा लोक आत। हांय मन रिसा होई गलाय काय काचे कि मन हांय मन के धोका देई रेलाय। मातर हांय मन तिकर संगे मेल मिलाप करला बायदा के बनाय संगायलाय काय काचे कि हांके मापरू र छोमे करी रेलाय। तेबे खिंडिक समया र बाद कनान ने रेबा बीती दुसर जाती एमोरी मन र राजा सुनला कि गिबोनीमन, इसराइलीमन संगे मेल मिलाप करला आत। ई काचे हांय मन आपनार सयनिक मन के रुंडा करी गोटोक बड़े सेना बनायलाय आवरी गिबोन उपरे लड़ाई करलाय। गिबोनी मन तिकर सायता करबा काचे यहोसू लगे खबर पटायलाय।

तेबे यहोसू इसराइली मन र सेना के रुंडा करला आवरी हांय मन गिबोनी मन लगे अमरबा काचे गुलाय राती हिंडलाय। बड़े सकरेया हांय मन एमोरी मन र सेना के चकित करी देलाय आवरी तिकर उपरे लड़ाई करी देलाय।

हांई दिने मापरु इसराइली मन काचे लड़ला। हांय एमोरी मन के घबराय देला आवरी हांय बड़े बड़े करा घसराय करी खुबे एमोरी मन के मोराय देला।

मापरु बेर के बोले बादली ने गोटोक जागा थाने ठेबाय देई रेला कि इसराइली मन के खुबे समया मिरो कि एमोरी मन के पूरा पूरा हाराओत। हांय दिने मापरु इसराइली मन के खुबे बड़े रुप ने जितायला।

जड़क दाय मापरु हांय सेना मन के हारायला बाद खुबे कनानी मन जाती लोक इस्राएल उपरे लड़ाई करबा काचे रुंडा होयलाय। यहोसू आवरी इसराइली मन लड़ाई करी तिके सत्यानास करी देलाय।

ए लड़ाई मन र बाद, मापरु इस्राएल र गोटोक गोटोक गोत्र के हांय देस ने बाटा देला। तेबे मापरू इस्राएल के तिकर भोंवरोक ले सांति देला।

जड़क दाय यहोसू डोकरा होई गला तेबे हांय इस्राएल र सबु लोकमन के एक संगे हाग देला। तेबे यहोसू हांय लोक मन के सुरता करायला कि हांय मन हांय बायदा र पालन करबार किरिया करी रेलाय जोन मापरु तिकर संगे सीनय परबत ने करी रये। हांय लोक मन मापरू काचे बिसवासी रेबार आवरी मापरु र नियम कानून के मानबार बायदा करी रेलाय।