16. छाड़ायबा बीता

यहोसू मोरला र बाद इसराइली मन मापरु के ना मानलाय। हांयमन मापरु र नियम मन के ना मानलाय आवरी हांय मन हांय बायदा र देस ले बाचला कनानी मन के बाहरे ना निकरायलाय। इसराइली मन आपना सत मापरु यहोवा के छाड़ी करी कनानी देव भुत मनर उपासना करके लागलाय। इसराइली मनर कोनी राजा ना रेलाय, ई काचे जाके अच्छा लागते रये असन करते रेलाय।

मापरु र आगंया ना मानबार बाटले इसराइली मन गोटोक जीवना के आरम्भ करलाय जाके घन घन दोहरायलाय। ए जीवना असन चलला: कतक बोरस तक इसराइली मन मापरु र आगंया के ना मानबाय, तेबे हांय, हांय मन तिकर सत्रु मन ले हाराय करी दंड देयसी। ए सत्रु इसराइली मनर तीज मन के झिकबाय आवरी तिकर धनमाल के नास करबाय आवरी खुबे लोक मन के मोरते मारबाय। आवरी जड़क दाय इसराइली मनर सतरू तिके खुबे बोरस तक सताय बाय, हांतार पाचे इसराइली मन आपनार पाप र पस्चाताप करबाय आवरी बचायबा काचे मापरु ले पारथाना करबाय।

हर बार जड़क दाय इसराइली मन पस्चाताप करबाय। हांय गोटोक छाड़ायबा बीता बाटले असन करसी – गोटोक असन माने जोन तिकर सतरू ले लड़सी आवरी हांके हारायसी। तेबे देस ने सांति होयसी आवरी छाड़ायबा बीता तिकर उपरे अच्छा ले राज करसी। मापरु हांय लोक मनके बाचायबा काचे खुबे छाड़ायबा बितामन के पटायला। मापरु तिकर लगर ची गोटोक सतरू जाती, मिदयानी मन बाटले इसराइली मन के हाराय करी आवरी असन करला।

मिदयानी मन सात बोरस तक इसराइली मन र फसल के झिकी नेलाय। इसराइली लोक खुबे डरी रेलाय आवरी हांय मन गुफा मन ने लुकलाय काय काचे कि मिदयानी लोक हांय मन के डगरायके ना सकोत। सबु ले पाचे आपना के बाचायबा काचे हांय मन मापरु के गुहारलाय।

गिदोन नावर गोटोक इसराइली माने रये। गोटोक दिने हांय गोटोक गुप्त जागा ने गेंहू मिन्डते रये काय काचे कि मिदयानी लोक हांके चोरके ना सकोत। यहोवा र सरगदूतगिदोन लगे आसी करी बोलला ‘’हे बीर सुरमा, मापरु तोर संगे आचे। जा आवरी इसराइली मन के मिदयानी मन ले छाड़ाव।

गिदोन र बुआ लगे मुरती काचे गोटोक बेदी रये। सबुले पईल गोट जोन मापरु गिदोन के करबा काचे बोलला, हांय बेदी के टूटायबार रये। मातर गिदोन लोक मन के डरते रये, ई काचे हांय राती होयबार बाट दकते रये। तेबे हांय, हांय बेदी के गोंदा गोंदा करी देला। हांय मापरु काचे गोटोक नुआ बेदी बनायला आवरी हांय थाने मापरु काचे बली चेगायला।

दुसर दिन सकरिया लोक मन दकलाय कि बेदी के कोनी टुटाय करी गोंदा गोंदा गोंदा करला आचे, ई काचे हांय मन खुबे रिसा होयलाय। हांय मन गिदोन के मारबा काचे हांतार घरे गलाय, मातर गिदोन र बुआ बोलला ‘’तोमी काय काचे आपना देवता र सयता करबा काचे होयबा आस ? सत्ते हांय देवता आय आले हांके आपना के बाचायके दियास’’ हांय असन बोलला ई काचे लोक मन गिदोन के ना मारलाय।

तेबे मिदयानी मन इसराइली मन के झिकबा काचे आवरी आयलाय। हांय मन अतक लोक रेलाय कि तिकर गिनती ना करके सकेत। गिदोन तिकर बिरुद लड़ाई करबा काचे इसराइली मन के गोटकी संगे हाग देला। गिदोन मापरु ले दुय चिना मांगला कि हांके बिसवास होई जाओ कि सत्ते मापरु हांके इस्राएली मन के बचायबा काचे सांगसी आचे।

पयला चिना काचे गिदोन मेंडा र ऊन के भुई उपरे सोंगायकारी मापरु के बोलला कि सकरिया र ओस सोजे मेंडा र ऊन थाने ची पड़ो आवरी भुई थाने ना पड़ो। मापरु असनी च करला। दुसर राती हांय मापरु के बोलला भुई थाने ओस पड़ो आवरी मेंडा र ऊन सुखा रओ। मापरु असनी च करला। ए दुय चिना मन ले गिदोन बिसवास करला कि सत्ते मापरु चायसी आचे किकी मुई इसराइली मन के मिदयानी मन ले बाचायबी।

तेबे गिदोन सयनिक मन के आपना लगे हाग देला आवरी 32,000 माने मन आयलाय। मातर मापरु हांके बोलला ए कुबे आचेत। तेबे गिदोन 22,000 माने मन के घरे वापस पटाय देला जोन मन लड़ाई ले डरते रेलाय। मापरु गिदोन के बोलला एबे बोले ए माने मन कुबे आचेत। ई काचे गिदोन 300 सयनिक मन के बचाय करी सबु के घरे पोटाय देला।

हांय राती मापरु गिदोन के बोलला ‘’मिदयानी मन र डेरा ने जा आवरी हांय मन र गोट बात के सुन। जड़क दाय तुय तिकर गोट सुनबीस कि हांय मन काय गोटायबा आत तेबे तोके तिकर ले लड़ाई करबा काचे डर ना लागसी। ’’ ई काचे हांय राती गिदोन तिकर डेरा ने गला आवरी हांय गोटोक मिदयानी सयनिक के आपनार मित्र के असन गोटायते सुनला जोन हांय सपना ने दकी रये। हांय माने र मित्र बोलला ‘’ए सपना र अरथ आय कि गिदोन र सेना हामी मिदयानी सेना के हारायसी। ’’ जड़क दाय गिदोन असन सुनला तेबे हांय मापरु र स्तुति करला।

तेबे गिदोन आपना सयनिक मन लगे आपस आयला आवरी सबू के गोटोक गोटोक तोड़ी, गोटोक माटी र मटका आवरी गोटोक गोटोक मशाल देला। हांय मन तिकर छावनी के भोंवरोक चेकलाय,जोन थाने मिदयानी सयनिक मन सोयते रेलाय। गिदोन र 300 सयनिक मन आपनार मशाल मन के माटी र मटका ले ढाकी रेलाय ई काचे मिदयानी लोक हांय मशाल र उजर के ना दकके सकलाय।

तेबे गिदोन र सबु सयनिक मन आपनार मटका मन के फुटायकरी अचानक मशाल र उजर के दकायलाय। हांय मन तिकर तोड़ी के फुकलाय आवरी किरकिरलाय ‘’यहोवा र आवरी गिदोन र तलवार। ’’

मापरु मिदयानी मन के घबराय देला, ई काचे हांय मन आपना आपना मारा मारी होयके लागलाय। अडकी च दाय गिदोन इस्राएल मन लगे खबर पटायला कि दुसर कुबे इसराइली मिदयानी मन के खेदी मारबा काचे तिकर सयता करोत। हांय मन, हांय मन ले कुबे लोक के मारि देलाय आवरी कुबे लोक के खेदी करी इस्राएल देस ले बाहरे निकराय देलाय। हांय दिने 1,20,000 मिदयानी मोरलाय। असन रीती ले मापरू इसराइली मन के बाचायला।

हांय मन गिदोन के आपना र राजा बनायबार चायते रेलाय, मातर गिदोन टिके असन करके ना देला, मातर हांय तिकर ले सोना चांदी मांगला जोन हाने मन मिदयानी मन ले झिकी रेलाय। हांय लोक मन गिदोन के कुबे सोना देलाय।

तेबे गिदोन हांय सोना चांदी ले कुबे सुन्दर फटई बनायला जसन महायाजक मन पिन्दते रेलाय। मातर लोक मन हांतार उपासना करके लागलाय जसन कि हंय गोटोक मुरती आय। तेबे मापरु इस्राएल के आवरी दंड देला काय काचे कि हांय मन मुरती र उपासना करी रेलाय। मापरू र बाटले तिकर सतरू मन तीके हारायलाय आवरी पाचे हांय मन सायता करबा काचे मापरु ले पारथाना करलाय आवरी मापरु तीके बाचायबा काचे छाड़ायबा बीता मन के पोटायला।

कुबे हार असनी होयला : इसराइली मन पाप करलाय, मापरु हांय मन के दंड देला, हांय मन पस्चाताप करलाय आवरी मापरु तीके छाड़ायबा काचे कोनी के पोटायला। कतक बोरस तक मापरू तीके छाड़ायबा काचे कतक लोक के पोटायला जोन मन इसराइली मन के तिकर सतरू मन ले बाचायलाय।

आखिर ने हांय लोक मन दुसर देस मनर असन मापरु ले आपना काचे गोटोक राजा मांगलाय। हांय मन असन राजा चायते रेलाय जोन लोम आवरी बोपू बीता होवो आवरी लड़ाई ने तिकर छोमे छोमे हिंडो। मापरु के ए गोट अच्छा ना लागला मातर हांय हांय मन के तिकर मांगला असन राजा देला।