17. दाउद संगे मापरु र बायदा

साउल इस्राएल र पयला राजा रेला। हांय लोम आवरी सुन्दर रये। जसन हांय लोक मन चायते रेलाय बिलकुल असनी च रेला। इस्राएल ने आपना राज पाट बेरा खिंडिक बोरस साउल गोटोक अच्छा राजा रेला। मातर पाचे दुष्ट माने बनी गला, जोन मापरु र गोट के ना मानला। ई काचे मापरू दुसर माने चुनला जोन गोटोक दिन हांतार जागा ने राजा बनसी।

मापरू, दाउद नावर गोटोक इसराइली जुवान के चुनी करी गोटोक दिन साउल र जागा ने राजा होयबा काचे तियार करके लागला। दाउद बेतलेहम गाँव र गोटोक धोरई रये। कतक दाय, दाउद बाघ आवरी भालू दुनो के मोरते मारी रेला काय कि दाउद हांतार बुआ र भेड़ बकरी के चरायबा बेरा तीके दरी नेयते रेलाय। दाउद नम्र आवरी धरमी माने रेला। हांय मापरु उपरे भरोसा करला आवरी हांतार गोट के मानला।

जड़क दाय दाउद जुवान ची रये तेबे हांय कुबे लोम- मोटा गोलियात संगे लड़ाई करला। गोलियात कुबे अच्छा सयनिक रेला। हांय खुबे बोपू बीता रेला आवरी 6 हात 1 बीता लोम रेला। मातर मापरु गोलियात के मारबा काचे आवरी इसराइली मन के बाचायबा काचे दाउद र सायता करला। एतार पाचे दाउद इस्राएल र सतरू मन के कुबे हार जीतला। दाउद गोटोक बड़े बीर बनी गला आवरी हांय कुबे लड़ाई मन ने इसराइली मन र अगुवाई करला। लोक मन हांके कुबे सहरायलाय।

लोक मन दाउद के कुबे मन करलाय कि साउल हांतार ले इरखा होयके लागला। पाचे हांय हांके मोरते मारबा र चायते रेला। ई काचे दाउद हांतार ले आवरी हांतार सयनिक मन ले लुकबा काचे झार भीतरे पोरायला। गोटोक दिने, जड़क दाय साउल आवरी हांतार सयनिक मन दाउद के डगरायते रेलाय तेबे साउल गोटोक गुफा भीतरे गला। ई गुफा भीतरे दाउद बले लुकी रेला, मातर साउल हांके ना दकला। दाउद साउल र पीटी बाटे हांतार लगे गला आवरी हांतार फटई के खिंडिक काटला। बाद ने जड़क दाय साउल हंय गुफा ले निकरला तेबे दाउद हांके किरकिरी बोलला आवरी हांय काटला फटई के दकायला। असन रीती ले साउल जानी गला कि दाउद राजा बनबा काचे हांके ना मारला।

खिंडिक समया र बाद साउल लड़ाई ने मोरी गला आवरी दाउद इस्राएल र राजा बनी गला। हांय गोटोक अच्छा राजा रेला आवरी लोक मन हांके कुबे मया करलाय। मापरु दाउद के आसीस देला आवरी हांके सफल बनायला। दाउद कतक लड़ाई लड़ला आवरी मापरु इस्राएल र सत्रुमन के हारायबा काचे हांतार सायता करला। दाउद यरुसलेम सहर के जीती करी हांके आपनार राजधानी बनायला, जोन थाने हांय रई करी राज पाट करला। दाउद चालीस बोरोस तक राजा रेला। हांय समय ने इस्राएल सामर्थी आवरी धनवान बनी गला।

दाउद गोटोक मंदिर बनायबार चायते रेला जोन थाने इसराइली मन मापरु र आराधना करके सकेत आवरी हांतार काचे बलिदान चडायके सकेत। उना पूरा 400 बोरस तक हांय मन मूसा र बानायलार मिलाप र तम्बू ने मापरु र आराधना करते रेलाय आवरी हांतार काचे बलिदान देयते रेलाय।

मातर हांयती नातान नावर गोटोक आगमजानी रेला। मापरु हांके दाउद के असन सांगबा काचे पोटायला: ‘’तुय कुबे लड़ाई लड़ली आस, ई काचे तुई मोर काचे ए मंदिर ना बनायके सकबीस। तोर बेटा एके बनायसी। तेबले बोले मुई तोके कुबे आसीस देबी। तोर गोटोक बंस हरमेसा काचे मोर लोक मन उपरे राजा र रुप ने राज करसी। ’’ हरमेसा काचे राज करबा बीता हांय दाउद र गोटकीच बंस मसीह रये। मसीह, मापरु र चुनला बीता रेला जोन संवसार र लोक मन के आपनार पाप ले बचाऊ आय।

जड़क दाय दाउद नातान र गोट के सुनला तेबे हांय मापरु र धन्यबाद करला आवरी हांतार स्तुति करला। मापरु हांतार मान बड़ायते रये आवरी हांके कुबे आसीस देयते रये। सत्ते दाउद ना जानते रये कि मापरु एके केबे करसी। ए समया ने हामी जानबु आचू कि इसराइली मन के कुबे दिन र बाद, उना पूरा 1000 बोरस तक मसीह र आयबार बाट दकके लागसी।

दाउद कतक बोरस तक धरम संगे आपना लोक उपरे राज करला। हांय कुबे अच्छा ले मापरु र गोट के मानला आवरी मापरु हांके आसीस देला। आपना जीवना र सरासरी बेरा हांय मापरु र बिरुद बड़े भारी पाप करी रेला।

गोटोक दिन, दाउद आपनार महाल ले बाहरे दकला तेबे हांय गोटोक सुन्दर बायले के आंग धोयबा के दकला। हांय हांके ना जानते रेला मातर पाचे पोचारबा के हांतार नाव बेतशेबा रेला।

दाउद आपना नजर गुचायबा पाल्टा हांके आपना घरे आनबा काचे लोक पोटायला। हंय हांतार संगे सोयला आवरी पाचे हांके हांतार घरे पोटाय देला। खिंडिक समय र बाद बेतशेबा असन बोली करी हांतार लगे खबर पोटायला कि हान्ह्या गर्भ आचे।

बेतशेबा र मुनुक उरियाह नाव र गोटोक माने रेला। हांय दाउद र अच्छा सयनिक रेला। ए समय ने हांय लड़ाई करके बाहरे जाई रेला। दाउद, उरियाह के लड़ाई ले हाग देई करी हांतार बायले संगे रेबा काचे बोलला। मातर दुसर सयनिक मन लड़ाई मैदान ने रेलाय ई काचे उरियाह घरे जीबा काचे नाई बोलला। ई काचे दाउद उरियाह के वापस लड़ाई में पटायला आवरी सेनापति के हांके असन लड़ाई ने सोंगाय्बा काचे बोलला जोन थाने कुबे सतरू मन रेबाय कि हांय मारा जाओ। तेबे असन होयला कि उरिय्याह लड़ाई ने मोरी गला।

उरियाह लड़ाई ने मोरला र बाद दाउद बेतशेबा के बिया करला। आवरी हांय दाउद र बेटा के जनम देला। दाउद जोन करला हांयती ले मापरु कुबे रिसा होई रेला, ई काचे आगमजानी के दाउद के असन सांगबा काचे पोटायला कि हांतार पाप कतक खराब रये। दाउद आपनार पाप र पस्चाताप करला आवरी मापरु हांके छमा करी देला। बाद ने दाउद आपना कठिन समय ने मापरु पीटी पीटी हिंडला आवरी हांतार गोट मन के मानला।

मातर दाउद र बेटा मोरी गला। असन रीती ले मापरु दाउद के दंड देला। आवरी दाउद र मोरबा दे तक हांतार घर र लोक मन हांतार बिरुद लड़ाई करलाय आवरी दाउद र बोपू कम होई गला। मातर मापरु सत रये आवरी हांय एबे बोले असन करला जोन हांय दाउद के बायदा करी रेला कि हांय असन करसी, भले दाउद हांतार ना मानला। बाद ने दाउद आवरी बेतशेबा ले दुसर बेटा होयला आवरी हांतार नाव हांय मन सुलेमान सोंगायलाय।