18. बाटा करला राज

दाउद राजा चालीस बोरस तक राज करला तेबे हांय मोरी गला आवरी हांतार बेटा सुलेमान इस्राएल ने राज करबा र आरम्भ करला। मापरू सुलेमान के गोटायला आवरी हांके पोचारला कि हांय सबु ले ज्यादा काय चायसी आचे कि मापरू हांतार काचे करो। सुलेमान मापरू ले मांगला कि हांय हांके खुबे बुद्धिमान बनाय देओ। ई गोट ले मापरू से हरिक करला, हांई काचे मापरू सुलेमान के संवसार र बुद्धिमान माने बनाय देला। सुलेमान खुबे गोट के सिकला आवरी हांय गोटक बुद्धिमान शासक रये। मापरू हांके खुबे सोवकार बले बनाय देला।

यरुसलेम ने सुलेमान हांय मंदीर के बनायला जार काचे हांतार बुआ बिचार करी रेला आवरी के रुंडा करी रेला। एबे लोक मन मिलाप बीती तम्बू र बजाय मंदिर ने मापरू र आराधना करबा आत आवरी हांतार काचे जतरा चेगायबात। मापरू आसी करि मंदिर ने रेबाराय आय आवरी हांयती आपनार लोक संगे रेबार आय।

मातर सुलेमान दुसर देसर र बायले मन के मया करला। हांय खुबे जसन एक हजार बायले के बिया होयला आवरी मापरू र गोट के ना मानला। इतिले खुबे बायले मन दुसर देस मन ले आई रेलाय आवरी आपना संगे आपनार भगवान मन के आनी रेलाय आवरी हांय मन र उपासना करते रेलाय। जेबे सुलेमान डोकरा होई गला तेबे हांय बले तिकर भगवान मन र उपासना करला।

हांई लागी करी मापरू सुलेमान के रिसा होई रये। हांय बोलला कि हांय इस्राएल देस के दुय राज ने बाटा करला बाटले हांके दंड देयसी। सुलेमान मोरला र बाद हांय असन करसी।

सुलेमान र मोरला र रहबाम राजा बनला। इस्राएल देस र सबु लोक हांके आपनार राजा र रुप ने मानबा काचे गोटोक संगे कूड़ा होयलाय। हांय मन रहबाम के सांगलाय कि राजा सुलेमान तिके कुबे कटिन मयनत करायला आवरी कुबे पट्टी धरी रेला। हांय मन रहबाम के गुहार करलाय कि हांयती कम बुता कराहा।

मातर रहबाम हांय मन के खुबे अबुज ले सांगला ‘’तोमी बलुआस कि मोर बुआ सुलेमान तोमके कटिन मयनत करायला। मातर मुई तोमके बले खुबे कटिन मयनत करायबी आवरी मुई तोमके खुबे दंड देबी।

जेबे लोक हांके असन बोलबा दाय सुनलाय तेबे हांय मन ले खुबे मन हांतार बिरुद बलवा करलाय। दस गोत्र र लोक हांके छाड़ी देलाय। हांतार संगे एबे सोजे दुय गोत्र र ची लोक बाचलाय। ए दुय गोत्र र लोक आपना के यहूदा राज बोललाय।

बाचलार दस गोत्र र लोक यारोबाम नावर गोटोक जुवान के आपनार राजा बनायलाय। ए गोत्र देस र उत्तर-पूरब बाटे रये। हांय मन खुद के इस्राएल राज बोललाय।

मातर यारोबाम मापरु र बिरुद बलवा करला आवरी लोक ले पाप करायला। हांय लोक मन के उपासना करायबा काचे दुयटा मुरती बनायला हांय मन एबोर यहूदा र राज यरुसलेम ने मापरू र मंदिर ने हांतार आराधना करबा काचे ना गलाय।

यहूदा आवरी इस्राएल र राज गोटोक दुसर र बयरी बनी गलाय आवरी हरमेसा गोटोक दुसर र बिरुद लड़के लागलाय।

इस्राएल र नुआ राज ने सस्बू राजा मन खुबे दुष्ट रेलाय। खुबे राजा तिकर जागा ने राजा बनबार मन करते रबा लोक दुसरा इस्राएलि मनर द्वरा मोरि गलाय ।

इस्राएल राज र सबु राजा मन आवरी खुबे लोक मुरती र उपासना करला। जेबे हांय मन असन करला तेबे हांय मन बेश्या मन संगे बेबिचार करलाय आवरी खुबे हार मूरित मन र छोमे आपना पीला झीला मन के जतरा बले करलाय।

यहूदा राज र राजा, दाउद र बंसज र रये। ई राजा मन थानले कतक अच्छा लोक रयेत। हांय मन सत धरम ले राज करलाय आवरी मापरु र आराधना करलाय। मातर इस्राएल र खुबे राजा मन दुष्ट रयेत। हांय मन दुष्टता ले राज करलाय आवरी मुरती मनर उपासना करलाय। हानी तिले बले खिनिक राजा मन झुटा भगवान मनर छोमे आपना पीला झीला मन के जतरा बले करी देलाय। यहूदा र खुबे लोक मन बले मापरु र बिरुद बलवा करलाय आवरी अलगा भगवान र उपासना करलाय।