29. निर्दयी दासर कतानी

गोटक दिन, पतरस यीशु के पोचारला, “हे स्वामी, मुय मोर भाई के केतक हार क्षमा कारबार ठीक आय जेबे हाय मोर विरुद्ध पाप करूआय ? काय सात हार तक ? “ सात हार नाई, मातर सातर सत्तर हार! “ हातार द्वारा, यीशुर मतलब आय की हामी सुबुदाय क्षमा कारबार आय। टेबे यीशु ए कतानी सांगलाय।

यीशु बोलला, “मापरूर राज्य गोटक राजार समान आय जोन आपनार संग ले लेखा नेबार चाएसी आचे। हातार गोटक दास 2,00,000 बोरसर मजदूरी के गोटक करजर करजदार रेलाय।”

मातर हाय दास आपनार करज के ना चुकाएके ना पारला, हायकाचे राजा बोलला, “हातार करज चुकाएबा काचे हाय माने के आवरी हातार परिवार के दासमनर रूप आने बिकी दीआस।”

“हाय दास राजार सामने आपनार मांडी आने गिरि करी बोलला, ‘दया करी मोर संगे धीरज धार, आवरी मुय आपनार करज के पूरा रकम के भुगतान करी देबी। ’ राजा दास उपरे दया करलाय, हायकाचे हाय हातार करज के क्षमा करी देलाय आवरी हाके जायके देलाय।”

“मातर जेबे हाय दास राजार लगेले बाहरे गला, तो हाके हातार गोटक साथी दास मिलला जोन हातार चार मासर मजदूरीर करजदार रये। हाय दास आपनार साथी दास के धरलाय आवरी बोलला, ‘जोन तोर उपरे मों करज आचे मोके हातार भुगतान करीदे !”

“हाय साथी दास मांडी आने गिरि करी बोलला, ‘दया करी मोर संगे धीरज धार, आवरी मुय आपनार करजर पूरा रकमर भुगतान करी देबी। ’ हातार बजाय, हाय दास आपनार साथी दास के जइलखाना आने डाली देलाय जेबे तक की हाय हातार करजर भुगतान ना करी दये।”

“जोन सोबू होयला हाके काई दूसरा दासमन दखलाय आवरी हाय बहुत परिशान होयलाय। हायमन राजा लगे गलाय आवरी हाके सोबू सांगलाय।”

“राजा हाय दास के डाकी करी बोलला, ‘ ए दुष्ट दास! मुय तोर करज के ई काचे क्षमा कर्ली की तुय मोके बिनीति करी रलिस। टोके बी हाय असन कारबार रेला। ’ राजा एतक रिसा रये की हाय हाय दुष्ट दास के जाइलखाना आने डाली देलाय जेबे तक की हाय आपनार सोबू करज के वापिस भुगतान ना करी देय !”

टेबे यीशु बोलला, “मोर सरग आने विराजमान पिता तोमी सोबू संगे असनी करसी अगर तोमी आपनार भाई के आपनार हृदय ले क्षमा नाय करले।”