42. यीशु सरग आने आपिस जाऊआय

जोन दिने मापरू यीशु के मरला ले जीवित करी रेलाय, हातार दुय चेला गाँव लगे जायते रेलाय। चालबा दाय हायमन यीशु संगे जोन होय रेला। हातार विसय आने कथा होयते रेलाय, हायमनके आशा रेला कि हाय मसीहा रेलाय, मातर तेबले बी हाय मारा गलार रेला। एबार हाय बाएलेमन बोलबात कि हाय आवरी जीवित होयला आचे। हायमन ना जानी रेलाय कि कोन कथा आने विश्वास करबाराय।

यीशु हातार मन लगे आसिकरि हातार मन संगे हिंडबार सुरू कारलाय, मातर हायमन हाके ना चितायके सकलाय। हाय हायमनके पोचारलाय कि हायमन कार विसय आने कथा होयबा आचेत। हायमन हाके गला दिनर यीशु संगे होयला सबू घटनार विसय आने सांगलाय। हायमन सोचलाय कि हायमन कोनी परदेसी ले कथा होयते रेलाय जोन ना जानी रेला कि येरूसलेम आने काय होय रेला।

तेबे यीशु हायमनके समझायलाय कि मापरूर वचन मसिहर विसय आने काय बोलूयाय। बहुत आगे, भविष्यवक्तामन बोली रेलाय कि बुरा लोकमन मसीह के सतायबाय आवरी मारी देबाय। मातर भविष्यवक्तामन ए बी बोली रेलाय कि हाय तीसरा दिन जीव उठसी।

जेबे हायमन हाय नगर खेटलाय जोनथाने हाय दुय लोक थेबबार चाएते रेलाय, तेबे तक ऊना पूरा संज होयगला। हायमन यीशु के हाकरमन संगे थेब्बा काछे आमंत्रित कारलाय, आवरी हाय हाकर संगे गोटक घरे गलाय। आपनार संजर भोजन के खायबा काछे हायमन बसलाय। यीशु गोटक रोटी के धारिकरी हायकाछे मापरू के धन्यवाद देलाय, आवरी पाचे हाके तोड़ला। अचानक ले, हायमन जानलाय कि हाय यीशु आय। मातर हाय समय, हाय हाकर आँखी ले छया मया होयगलाय।

हाय दुय लोक एक दुसर ले बोलले, “हाय यीशु रये! हायकाछे जेबे हाय हामके मापरूर वचन के समझायलाय तो हामी बहुत उत्साहित रेलु !” संगे संगे, हायमन निकली करी आपिस येरूसलेम गलाय। जेबे हायमन खेटलाय तेबे हायमन चेलामनके सांगलाय, “यीशु जीवित आचे! हामी हाके दखलु !”

जेबे चेलामन कथा होयते रेलाय, यीशु अचानक ले हाय बाकराय हाकर संगे परकट होयलाय। हाय बोलला, “तोमके शांति मिलो!” चेलामन सोचलाय कि हाय कोनी भूत रेला, मातर यीशु बोलला, “तोमी कायकाछे डरबा आचास ? तोमी ए कायकाछे ना सोचास कि ए सते आने मुय, यीशु आय ? मोर हाथ आवरी गोड़ के दखा। भूत मन लगे आसान सरीर ना रये जसन मोर लगे आचे।” ए दखायबा काछे कि हाय कोनी भूत ना रेलाय, हाय खायबा काछे काय मांगलाय। हायमन हाके माचर गोटक टुकड़ा देलाय, आवरी हाय हाके खायलाय।

यीशु बोलला, “मोर विसय आने मापरूर वचन जोन सबू बोलूयाय हायटा घटसी। मुय तोमके सांगीरेली कि ए सबू होयबा टा अवस्य आय।” तेबे यीशु हायमनके मापरूर वचन अच्छा ले समझायला। हाय बोलला, “बहुत आगे भविष्यवक्तामन लिखी रेलाय कि मोके, मसीह के दुख उठायके पढ़ुयाय, मरके लगुयाय आवरी तीसरा दिन मरलाले जीव उठके लागसी।”

“हाय भविष्यवक्तामन ए बी लिखला आचेत कि मोर चेलामन मापरूर वचनर घोसणा करबाय। हायमन हर गोटक के पश्चाताप करबा काछे सांगबाय। अगर हाय आसान करबाय तो मापरू हाकर पापमन के क्षमा करसी। मोर चेलामन ई संदेशर परचार करबाटा येरूसलेम ले आरंभ करबाय। तेबे हायमन सबू जागा सबू जातीमन लगे जिबाय। तोमी सबू मोर हर गोटक कथा आवरी कामर गवाह आस जोन मुय बोलली आवरी कर्ली आची, आवरी हाय सबू के जोन मोर संगे होयला।”

अगला चालीस दिनर भीतरे, यीशु आपनार चेलामन उपरे बहुत बार परकट होयलाय। गोटक हार तो हाय गोटक समय आने 500 ले अधिक लोकमन उपरे परकट होयलाय! हाय आपनार चेलामान आने केतक तरीका ले साबित कारलाय कि हाय जीवित रेलाय, आवरी हाय हायमनके मापरूर राज्यर विसय आने शिक्षा देलाय।

यीशु आपनार चेलामन के बोलला, “मापरू मोके सरग आवरी पृथबीर हट गोटक लोक उपरे शासन करबा काछे अधिकार देला आचेत। हायकाछे एबे मुय तोमके बोलबी आची: जायकरी सबू जातिर लोकमन के आपनार चेला बनाओ। आसान करबा काछे, तोमके हायमनके पिता, पुत्र, आवरी पवित्र आत्मार नामले बपतिस्मा देबार आचे। जोन सबू मुय तोमके आज्ञा देली आची हाय सबू कथा के मानबार बी तोमके हायमनके सिखायबास। याद संगाव, मुय सबू दाय तोमर संगे रेबी।”

यीशुर मरला ले जीव उठलार चालीस दिनर पाचे, हाय आपनार चेलामनके बोलले, “जेबे तक मोर पिता तोमके सामर्थ ना दिये तेबे तक तोमी येरूसलेम आने ठेबी रा। हाय तोमर उपरे पवित्र आत्मा पठायबार द्वारा आसान करसी।” तेबे यीशु सरग आने चले गलाय, आवरी गोटक बादली हाके हायमनर दृष्टि ले लुकाय देला। सरग आने यीशु सबू चीज आने शासन करबा काछे मापरूर बुदनी बाते बोसलाय।