43. कलीसियार आरम्भ होयसी

यीशुर सरग आपिस जिबार बाद, चेलामन येरूसलेम आने ही ठेबलाय जसन कि यीशु हायमनके करबा काछे आदेश दी रेलाय। हायथानर विश्वासी लोक लगातार गोटक संगे पराथना करबा काछे रुन्डा होयबाराय।

सबू बोरस, फसहर परबर 50 दिनर पाचे, यहूदी लोकमन पिन्तेकुस्त नामर गोटक विशेष दिन के बनायबाराय। पिन्तेकुस्त हाय समस्या रेला जेबे यहूदी लोक गेऊँर कटाई के बनायबार आय। सबू संसारर यहूदी लोक पिन्तेकुस्तर दिन के गोटक संगे बनायबा काछे येरूसलेम आयलाय। ई बोरस, पिन्तेकुस्त बनायबार समय यीशुर सरग जिबार ऊना पूरा गोटक हप्ताहर पाचे आसी रये।

जोन समय सबू विश्वासी लोक गोटक संगे रुँडा रेलाय, तो जोन घरे हायमन रेलाय अचानक ले हाय तेज आवाज ले भरी गला। टेबे जोयर लूटा पारा दखा देबाटा कायटा सबू विश्वसिमनर मुंड उपरे परकट होयला। हायमन सबू पवित्र आत्मा ले भरी गलाय आवरी हायमन अन्य भासा ले मापरूर स्तुति कारलाय। ए हाय भासामन रेला जोंटा के बोलबा काछे हायमन के पवित्र आत्मा सक्षम करी रेला।

जेबे येरूसलेम आने रेबा लोकमन हाय कोलार के सुनलाय, टेबे हाय भिड़र रूप आने एटा दखबा काछे गोटक संगे आयलाय कि काय होयसी रेला। हायमन विश्वसिमन के मापरूर द्वारा करलार बड़े-बड़े काम मनर घोसना करबाटा सुनलाय। हाय विस्मित रेलाय कायकाछे कि हाय हाय काम मनके आपनार भासा आने सुनते रेलाय।

ई मनले केतक लोकमन बोललाय कि हाय चेलामन नशा आने रेलाय। मातर पतरस ठीया होयला आवरी हाय बोलला, “ मोर कथा सुना ! ए लोकमन नशा आने नियात! हातार बजाय, जोन टोमी दखबास हाय हाता आय जोन योएल भविष्यवक्ता बोलली रेलाय कि होयसी: मापरू बोलला, ‘सरा सरी दिन आने, मुय आपनार आत्मा उंडेलबी।”

“ए इसराएली मानेमन, यीशु गोटक आसान माने रेलाय जोन ए दखायबा काछे कि हाय कौन रेलाय बहुत अनोखा काम करी रेलाय। हाय मापरूर सामर्थ ले बहुत अद्भुत काम के करी रेलाय। तोमी ए जानास, कायकाछे कि तोमी ए काम के दखला आचास। मातर तोमी हाके क्रूस आने चेगायलास !”

“यीशु मारी गलाय मातर मापरू हाके मरलार ले जीवित करलाय। हाय हाय कथा के पूरा करी देलाय जाके भविष्यवक्ता लिखी रेलाय: ‘तुय आपनार पवित्रजन के कब्र आने सड़के ना देय। ’हामी गवाह आचू कि मापरू यीशु के आवरी जीवित करी रेलाय।”

“मापरू पिता एबर यीशु के आपनार बुदनी बाटे बसाय करी हाके आदर देलाय आचेत। आवरी यीशु हामर काछे पवित्र आत्मा पोथायला आचेत जसन कि हाय किरिया करी रेलाय कि हाय पोठायबाय। पवित्र आत्मा आका हाय कम मनके होयके देयसी आचे जाके तोमी दखबा आचास आवरी सुंबा आचास।”

“तोमी हाय माने, यीशु के क्रूस आने चेगाय देलास। मातर निश्चित रूप ले जानी राह कि मापरू यीशु के सबू चीजर उपरे परबू आवरी मसीह ठहरायला आचे !”

पतरसर सुनबा लोकमन हातार द्वारा केतक गला कथा ले भीतरले हाली गलाय। हायकाछे हायमन पतरस आवरी चेलामन के पोचारलाय, “हे भाईमन, हामके काय कारबार ठीक आय ?”

पतरस हाके मनके उत्तर देलाय, “तोमी मनले हर गोटक आपनार पापमन काछे पश्चाताप करा ताकि मापरू तोमर पापमन के क्षमा करो, आवरी यीशु मसिहर नाम ले बपतिशमा धरा। तेबे हाय तोमके वरदानर रूप आने पवित्र आत्मा देयसी।”

पतरस जोन बोलला हाय उपरे ऊना पूरा 3,000 लोकमन विश्वास करलाय आवरी यीशुर चेला बनी गलाय। हायमन बपतिशमा धरलाय आवरी येरूसलेमर कलिसियार हिस्सा बनी गलाय।

जेबे प्रेरितों मन हायमन के सिक्षा देलाय तो विश्वसिमन लगातार सुनलाय। हायमन केबे केबे मिलबराय आवरी गोटक संगे भोजन करबाराय, आवरी हायमन केबे केबे गोटक दुसरार काछे पराथना करलाय। हायमन मिलिकरी मापरूर स्तुति करलाय आवरी जोन काई बी हाकर मन लगे रेला हायमन गोटक दुसर संगे बाँट लाय। नगरर हर गोटक माने हाकर काछे अच्छा विचार सोंगायबाराय। सबूदिन, अधिक ले अधिक लोकमन विश्वासी बनते गलाय।