44. पतरस आवरी यूहन्ना गोटक भिकारी के अच्छा करूआत

गोटक दिन, पतरस आवरी यूहन्ना मंदिर आने गलाय। गोटक खोड़िया माने भिक मांगबा काछे फाटक आने बसी रेला।

पतरस हाय छोटा मानेर बाते दखलाय आवरी बोलला, “मोर लगे तोके देबा काछे पैसा तो नियाय। मातर जोन मोर लगे आचे मुय तोके देबीचि। यीशुर नाम ले उठ आवरी हिंडा – बुला हो !”

संगे-संगे, मापरू हाय छोटा माने के अच्छा करी देलाय। हाय एने – हाने हिंडबार आवरी डोगायबार, आवरी मापरूर स्तुति कारबार आरंभ करी देला। मंदिर आने उपस्थित लोक भकुआ होयलाय।

संगे-संगे लोकमनर भीड़ हाय माने के दखबा काछे आयलाय जोन अच्छा होयगला। पतरस हायमनके बोलला, “ए माने अच्छा आचे, मातर ए कथा आने भकुआ ना हुआ। हामी हायके आपनार शक्ति ले अच्छा ना करू, या हायकाछे नाई की हामी मापरूर आदर करुयाय। बोलले की, हाय यीशु आय जोन ए माने के आपनार शक्ति ले अच्छा करलाय, कायकाछे की हामी यीशु उपरे भरोसा करुयाय।”

“हाय तोमी आस जोनमन हाय रोमी राज्यपाल के यीशु के मारबा काछे बोली रेलाय। तोमी हाके मारी देलास जोन साबू के जीवन देउयाय। मातर मापरू हाके मरला ले जीवित करलाय। तोमी ना समझलास की तोमी काय करते रेलायस, मातर तोमी हाय काम मनके करते रेलास, तेबे जोन भविष्यवक्तामन बोलली रेलाय पूरा होला। हायमान बोलली रेलाय की मसीह दुख उठायसी, आवरी मारी जायसी। मापरू एके ई हिसाब ले होयके देलाय। कायकाछे एबर, पश्चाताप करा आवरी मापरू बाटे हुआ, ताकि हाय तोमर पापमन के धोयकरी साफ करी देयसी।”

जेबे मंदिरर अगुवामन पतरस आवरी यूहन्ना के सुनलाय, तो हायमन बहुत घबराय गलाय। हायकाछे हायमन हायमनके गिरफ्तार करी जइलखाना आने डाली देलाय। मातर जोन पतरस बोली रेला हाय उपरे लोकमन विश्वास करलाय। यीशु उपरे विश्वास करबा लोकर संख्या बढ़ी करी ऊना पूरा 5,000 होयलाय।

दूसरा दिन, हाय यहूदी अगुवामन पतरस आवरी यहूनना के महायाजक आवरी दूसरा धर्मी अगुवामनर आगे धारी आनलाय। हायमन हाय माने के बी आनलाय जोन खोड़िया रेला। हायमन पतरस आवरी यूहन्ना के पोचारलाय, “काय अधिकार काछे तोमी ए खोड़िया माने के अच्छा करलास ?”

पतरस उत्तर देला, “ए माने जोन तोमर आगे ठीया आचे हाके यीशु मसिहर सामरथर द्वारा अच्छा कर गला आचे। तोमी यीशु के क्रूस आने चेगायलास, मातर मापरू हाके आवरी जीवित करी देलाय! तोमी हाके अस्वीकार करलास, मातर यीशुर सामर्थर मध्यम के छाड़ी उद्धार पायबा काछे दूसरा काय बात नियाय !”

हाय अगुवामन भकुआ रेलाय कि पतरस आवरी यूहन्ना बहुत साहस आने कथा होयलाय। कि ए साधारण माने मन रेलाय जोन अनपड़ा रेलाय। मातर पाचे हायमन के हेत आला कि ए माने यीशु संगे रेलाय। हायकाछे हायमन हायमनके बोललाय, “हामी तोमके बहुत अधिक दंड देबू अगर तोमी ई माने यीशुर विसय आने लोकमन के कोनी आवरी संदेश देले।” असन बहुत कथा बोलबार पाचे, हायमन पतरस आवरी यूहन्ना के जायके देलाय।