45. स्तिफनुस आवरी फिलिप्पुस

प्रथम मसीही अगुवामनर मोझिगता आने स्तिफनुस नामर गोटक माने रेला। साबू लोक हातार आदर करबाराय। पवित्र आत्मा हाके बहुत सामर्थ आवरी बुद्धि देय रेलाय। स्तिफनुस बहुत चमत्कार करी रेलाय। जेबे उसने यीशु उपरे भरोसा करबार विसाय आने हायमान के सिक्षा डेला तो बहुत लोकमान हातार उपरे विश्वास करलाय।

गोटक दिन, स्तिफनुस यीशुर विसय आने सिक्षा देते रेलाय, आवरी केतक असन यहूदी आयलाय जोन यीशु उपरे विश्वास ना करी रेलाय आवरी हातार संगे झगड़ा करबार आरंभ करी देलाय। हायमन बहुत रिशा होय गलाय, हायकाछे हायमन धर्मी अगुवामन लगे गलाय आवरी हातार विसय ने झूठ बोललाय। हायमन बोललाय, “हामी स्तिफनुस के मूसा आवरी मापरूर विसय आने गलत बात बोलबाटा सुनलाय !” हायकाछे धर्मी अगुवामन स्तिफनुस के गिरफ्तार करलाय आवरी हाके महायाजक आवरी यहूदियार दूसरा अगुवामनर आगे आनलाय। आवरी बी झूटा गवाह आयलाय आवरी हायमन स्तिफनुसर विसय आने झूठ बोललाय।

महायाजक स्तिफनुस के पोचारलाय, “काय ए लोक तोर विसय आने सते बोलबाचेत?” स्तिफनुस महायाजक के उत्तर देबा काछे बहुत कथा मन बोलबाटा आरंभ करी देलाय। हाय बोलला कि अब्राहमर समय ले यीशुर समय तक मापरू इसराएलर लोकमन काछे बहुत सबू अनोखा काम मन करलाय। मातर लोकमन सबूदाय मापरूर कथा के ना मानलाय। स्तिफनुस बोलला, “टोमी लोक मापरूर विरुद्ध हठीला आवरी बलवा करबा लोक आस। तोमी सबूदाय पवित्र आत्मा के अस्वीकार करलास, जसन कि हामर पुरखा मन सबूदाय पवित्र आत्मा के अस्वीकार करिरेलाय आवरी सबूदाय हातार भविष्यवक्तामन के मरते मरलाय। मातर जोन हायमन करी रेलाय हातार तुलना आने तोमी आवरी बी बुरा करलास ! तोमी मसीह के मारी डेलास !”

जेबे हाय धर्मी अगुवामन ए सुनलाय, तेबे हायमन एतक रिशा होय गलाय कि हायमन आपनार कान मनके बंद करी देलाय आवरी ऊंचा आवाज आने कोलार होयलाय। हाय स्तिफनुस के ओड़गोड़ी करी नगर ले बारे नेलाय आवरी हाके मरते मारबा काछे पोकना मारलाय।

जेबे स्तिफनुस मरते रेलाय, हाय डाकलाय, “हे यीशु, मोर आत्मा के गर्हण कर!” तेबे हाय आपनार मांडी आने घसरला आवरी डाकला, “हे परबू, ए पाप हायमन आने ना लगाओ।” तेबे हाय मरी गला।

हाय दिन, येरूसलेम आने रेबा बहुत लोकमन यीशुर अनुयायी मनके सतायबार आरंभ करलाय, हायकाछे विश्वासी लोकमन दूसरा जागाए पोलायलाय। मातर एतार बाद बी, जोन कोनी जागाए हायमन गलाय यीशुर परचार करलाय।

फिलिप्पुस नामर यीशुर गोटक विश्वासी रये। जसन कि दूसरा बहुत विश्वसिमन करलाय हाय बी येरूसलेम ले पोलायला। हाय सामरियार क्षेत्र आने चले गला। हायथाने लोकमन आने यीशुर विसय आने परचार करला। बहुत लोकमन हातार उपरे विश्वास करलाय आवरी उद्धार पायलाय। गोटक दिन, फिलिप्पुस लगे मापरू बातले गोटक सरगदूत आयलाय आवरी हाके झारे जिबा काछे, आवरी गोटक बाते हिंडबा काछे बोलला। फिलिप्पुस हाती चले गलाय। जेबे हाय हाय बात आने हिंडते रेलाय, तो हाय गोटक माने के आपनार रथ आने जिबा टा दखला। हाय माने कुश देशर गोटक जरूरी अधिकारी रये। पवित्र आत्मा फिलिप्पुस के बोललाय कि जायकरी हाय माने संगे-संगे जाओ।

हायकाछे फिलिप्पुस रथ लगे गलाय। हाय सुनला कि हाय कुशी मापरूर वचन के पढ़ते रेलाय। जोन यसायाह भविष्यवक्ता लिखी रेलाय हाय हाके पढ़ते रेलाय। हाय पढ़ते रेला, “हायमन हाके मरते मारबा मेंडि पारा नेलाय, आवरी जसन गोटक छेली ओगाय रेयसी, हाय बाले गोटक गोट ना बोलला। हायमन हातार संगे अनुचित व्यवहार करलाय आवरी हातार आदर ना करलाय। हायमन हातार जीवन धरलाय।”

फिलिप्पुस हाय कुशी के पोचारलाय, “जोन तुय पढ़बीस काय कुय हाके समझबि आचीस?” हाय कुशी उत्तर देलाय, “नाई। जेबे तक कोनी एके मोके ना समझाये, तेबे तक मुय एके ना समझके सकी। किरपा करी मोर लगे आसी करी बस। यसायाह एटा आपनार विसय आने लिखते रये कि कोनी दुसरार ?”

फिलिप्पुस रथ आने चेगलाय आवरी बसलाय। तेबे हाय हाय कुशी माने को सांगलाय जोन यसायाह यीशुर विसय आने लिखी रेलाय। फिलिप्पुस मापरूर वचनर बहुत अन्य भाग मनके बी चर्चा करला। ई तरह ले, हाय हाय माने को यीशुर विसय आने सुचमाचार सुनायलाय।

फिलिप्पुस आवरी हाय कुशी हिंडी-हिंडी पानी लगे आयलाय। हाय कुशी बोलला, “दक! ए लगे पानी आचे! काय मुय बपतिशमा नेके सकी ?” आवरी हाय सारथी के रथ के ठेबायबा काछे बोलला।

आवरी हायमन पानी आने गलाय, आवरी फिलिप्पुस हाय कुशी के बपतिशमा देलाय। जेबे हायमन पानी ले बारे आयलाय, तो पवित्र आत्मा अचानक ले फिलिप्पुस के उठाय करी कोनी दूसरा जागाए नेलाय। हायथाने फिलिप्पुस लोकमन के यीशुर विसय आने सांगबा टा जारी सोंगायला।

हाय कुशी आपनार घरर यात्रा आने आगे बढ़ी गलाय। हाय सर्दा रये कि हाय एबर यीशु के जानते रये।