46. पौलूस मसीही विश्वासी होयसी

शाऊल नामर गोटक माने रेला जोन यीशु उपरे विश्वास ना करी रेला। जेबे हाय ढांगड़ा रये, टेबे हाय स्तिफनुस के मारला लोकमनर पोटीर देख रेख करी रये। पाचे, हाय विश्वसिमनके सताय रये। हाय येरूसलेमर घरे-घरे जाय करी माने आवरी बाएले दुनों के गिरफ्तार करी करी जइलखाना आने डाली दी रये। तेबे महायाजक शाऊल के दशमिक नगर आने जिबार अनुमति देलाय। हाय हायथानर मसीही लोकमन के गिरफ्तार करबार आवरी हायमनके आपिस येरूसलेम धरी आनबार काछे शाऊल के बोललाय।

आवरी शाऊल दशमिक जिबार यात्रा आरंभ करला। हाय नगर आने खेटबार खिनीक पएले, हातार चारो बाटे बादली ले गोटक उजल परकास चमकला, आवरी हाय माती आने घसरलाय। शाऊल काके तो बोलबा टा सुनला, “हे शाऊल! हे शाऊल! तुय मोके कायकाछे सतायबी आचीस ?” शाऊल पोचारलाय, “हे परबू, तुय कोन आय?” यीशु हाके उत्तर देलाय, “मुय यीशु आय। तुय मोके सतायबी आचीस !”

जेबे शाऊल उठला तेबे हाय दकके ना सकला। हातार संग मन हाके दसमीक आने नेलाय। शाऊल तीन दिन ले काई खाई ना रये आवरी पी ना रये।

दशमिक आने हनन्याह नामर गोटक चेला रेला। मापरू हाके बोलला, “हाय घरे जा जोन थाने शाऊल आचे। आपनार हाथमन के हातार उपरे सोंगाव ताकि हाय आवरी ले दकके सको।” मातर हनन्याह बोलला, “हे परबू, मुय सुनली आची कि ई माने विश्वासी मनके कतक सतायला आचे।” मापरू हाके उत्तर देलाय, “जा! मुय हाके यहूदियों आने आवरी दूसरा जातिर लोकमन आने मोर नामर घोसना करबा काछे चुनला आची। हाय मोर नाम काछे बहुत कास्ट सहन करसी।”

आवरी हनन्याह शाऊल लगे गलाय, आपनार हाथ के हातार उपरे सोंगायलाय, आवरी बोललाय, “यीशु, जोन एथाने आयबार तोर बाटे तोर उपरे परकट होय रलाय, मोके तोर लगे पोथायला आचेत ताकि तुय आवरी आँखी दकके सक, आवरी पवित्र आत्मा तोर उपरे देओ।” हड्किच दाय शाऊल आवरी दखबा काछे सक्षम होला, आवरी हनन्याह हाके बपतिशमा देलाय। तेबे शाऊल भोजन कारलाय आवरी बलवंत होयलाय।

हाय दायले, शाऊल दशमिक आने रेबा यहूदीमन आने परचार आरंभ करी देलाय। हाय बोलला, “यीशु ही मापरूर बेटा आय !” यहूदी लोकमन भकुआ रेलाय, कायकाछे कि शाऊल तो विश्वासी मनके मरते मारबार पर्यास करी रेला, मातर हाय यीशु आने विश्वास करी रेला। शाऊल यहूदियार मन संगे झगड़ा कारलाय। हाय ड़खायाला कि यीशु आका मसीह रेलाय।

बहुत दिनार बाद, यहूदी लोकमन शाऊल मरते मारबार योजना बनायलाय। हायमान हाके मरते मारबा काछे नगरर फाटक आने लोकमन के पोठायलाय। के हातार देख भाल करोत मातर शाऊल हाय योजनार बारेने सुनी रये, आवरी हातार संग मन हाके बाछिकरी निकलबाती हातार सहायता कारलाय। गोटक राति हायमान हाके टोकरी आने बसाय करी नगरर कातीले हाके तले उतराय देलाय। दशमिक ले बाछी करी निकलबार बाद शाऊल यीशुर विसय आने परचर करबार जारी सोंगायलाय।

शाऊल प्रेरितों ले मिलबा काछे येरूसलेम गला, मातर हाय हातार ले डरबाराय। तेबे बरनबास नामर गोटक विश्वासी शाऊल के प्रेरितों लगे धरी गला। हाय हाके सांगला कि शाऊल कसन साहसी होयकारी दशमिक आने परचार करी रलाय। हातार पाचे, प्रेरितों शाऊल के गर्हण कारलाय।

केतक विश्वासी जोन येरूसलेमर सतायबा ले पोलाय रेलाय हायमन दूर अंताकिया नगर आने जायी रेलाय आवरी यीशुर विसय आने परचार करते रेलाय। अंताकिया आने रेबा लोक अदिक करी यहूदी ना रेलाय, मातर पईल हार, हायमन ले बहुत लोकमन विश्वासी बनलाय। बरनबास आवरी शाऊल ई नुआ विश्वसिमन के यीशुर विसय आने आवरी अदिक सिखायबा काछे हायथाने गलाय आवरी कलिसिया के मजबूत करलाय। यीशु उपरे विश्वास करबा लोक पईल हार अंताकिया आने आका “मसीही” कहलाय लाय।

गोटक दिन, अंताकियार मसीही लोक उपास संगे पराथना करते रेलाय। आत्मा हाके बोललाय, “मोर काछे बरनबास आवरी शाऊल के हाय काम के करबा काछे अलग करी दियास जाके करबा काछे मुय हायमनके डाकली आची।” हायकाछे अंताकियार कलिसिया आने बरनबास आवरी शाऊल काछे पराथना करलाय आवरी हाकर उपरे आपनार हाथ मनके सोंगायलाय। तेबे हायमन हायमन के दूसरा बहुत जागाय यीशुर विसय आने सुभ संदेश परचार करबा काछे पोठाय देलाय। बरनबास आवरी शाऊल अलग-अलग जातिर लोकमन के शिक्षा देलाय, आवरी बहुत लोकमन यीशु आने विश्वास करलाय।