47. फिलिप्पी आने पौलुस आवरी सीलास
जेबे शाऊल पूरा रोमी साम्राज्य आने बुललाय तेबे हाय आपनार नाम “पौलूस” बलि उपियोग कारबार आरंभ करी देलाय। गोटक दिन, पौलूस आवरी हातार संग सिलास फिलिप्पी नगर आने यीशुर सुभ संदेश सुनायबा काछे गलाय। हायमन नगरर बारे नदीर छेदे गोटक जागाय गलाय जोन थाने पराथना करबा काछे रुंडी रेलाय। हायथाने हायमन लुदिया नामर गोटक बाएले के भेटलाय जोन गोटक बेपारी रेला। हाय मापरू के प्रेम करबा राय आवरी हातार आराधना करते रेलाय।
मापरू लुदिया के यीशुर विसय आने संदेश आने विश्वास करबा काछे सक्षम करलाय। पौलूस आवरी सिलास हाके आवरी हातार परिवार के बपतिशमा देलाय। हायमन पौलूस आवरी सिलास के आपनार घरे थेब्बा काछे आमंत्रित करलाय, कायकाछे हायमन थेबी गलाय।
पौलूस आवरी सिलास लोकमन संगे केबे-केबे हाय जागाय मिलबा राय जोन थाने यहूदी लोकमन पराथना करबाराय। सबू दिन जेबे हायमन हायती जीबा राय तेबे गोटक कोमीया टोकी जोन दुस्टात्मा द्वारा नियंत्रित रेला तिकर पीछा करबाराय। ई दुस्टात्मार द्वारा हाय लोकमन के भविष्य सांगबाराय, हायकाछे हाय भविष्य सांगबा लोकर रूप आने आपनार स्वामी मनर काछे बहुत धन कमायबाराय।
हातार जिबा दाय ए कोमीया टोकी कोलार होयबाराय, “ए मानेमन परम परधान मापरूर सेवक आय। एमन तोमके उद्धार पायबार बात सांगबा आचेत!” हाय सबू दिन आसान करबाराय जसन ले पौलुष नाराज होयगलाय।
सरा सरी दाय, गोटक दिन हाय कोमीया टोकी कोलार होयबार आरंभ करला, तेबे पौलुष हातार बाते मुड़ी करी हातार भीतरर दुस्टात्मा के बोललाय, “यीशुर नाम ले एतार ले निकली जा।” हाय समय हाय दुस्टात्मा हाके छाड़ी देलाय।
हाय कोमीया टोकिर मालिक मन बहुत रिशा होयलाय। हायमन जानलाय की बिना हाय दुस्टात्मार हाय कोमीया टोकी लोकमन के भविष्य ना सांगके सकेय। हातार अर्थ रये कि लोकमन एबर हातार मालिक मनके पैसा ना देयत कि हाय हायमन के सांगो कि हायमन संगे काय होयसी।
हायकाछे हाय कोमीया टोकिर मालिक पौलुष आवरी सिलास के रोमी अधिकारी मन लगे नेलाय। हायमन पौलुष आवरी सिलास के मारलाय, आवरी पाचे हायमन के जईलखाना आने सोंगाय देलाय।
हायमन पौलुष आवरी सिलास के जईलखानार आसान हिस्सा आने सोंगायलाय जोन आने अधिक सिपाही रेलाय। अतक कि हायमन हाकर गोड़ मनके दारुर बड़े तुकड़ा आने जोड़ी देलाय। मातर पौलुष आवरी सिलास आदा रातिर समय, मापरूर स्तुतिर गीत गायते रेलाय।
अचानक ले, गोटक भयंकर भूकंप होला! जईलखानार सबू बाट खुली गला, आवरी सबू कैदीमनर सिकोला खुलीकरी घसरी गला।
तेबे दरोगा जागलाय। जईलखानार बाट खुली जायरये। हाय सोचला के सबू कैदी बाछी करी पोलायलाय। हाय डरी गला कि हायमनर पोलायबार लागि रोमी अधिकारिमन हाके मरते मारबाय, हायकाछे हाय आपना के मारबा काछे तियार होय गला! मातर पौलुष हाके दखीकरी कोलार होयलाय, “रुकी जा! आपना के नुकसान ना कर। हामी सबू ना जाऊ।”
हाय दरोगा थरथरते पौलुष आवरी सिलासर लगे आयकरी पोचारलाय, “उद्धार पायबा काछे मुय काय कार्बी ?” पौलुष उत्तर देलाय, “परबू यीशु आने विश्वास कर, तेबे तुय आवरी तोर परिवार उद्धार पायबास।” तेबे हाय दरोगा पौलुष आवरी सिलास के आपनार घरे नेला आवरी हाकर घाओ मनके धोयला। पौलुष हातार घरर सबू लोकमन के यीशुर विसय आने सुभ संदेश सुनायलाय।
दरोगा आवरी हातार पूरा परिवार यीशुर उपरे विश्वास कारलाय, हायकाछे पौलुष आवरी सिलास हायमनके बपतिस्मा देलाय। तेबे दरोगा पौलुष आवरी सिलास के भोजन करायलाय, आवरी हायमन गोटक संगे सर्दा होयलाय।
दूसरा दिन नगरर अगुवामन पौलुष आवरी सिलास के जईलखाना ले छाड़ी देलाय आवरी फिलिप्पी ले जिबा काछे बोललाय। पौलुष आवरी सिलास लुदिया आवरी केतक दूसरा संगमन ले मिसलाय आवरी हातार पाचे नगर ले निकली गलाय। यीशुर विसय आने शुभ संदेश फैलते गला, आवरी कलिसिया बढ़ते गला।
पौलुष आवरी दूसरा मसीही अगुवामन बहुत नगर आने-आने बुलल्लाय। हायमन लोकमन के यीशुर विसय आने शुभ संदेश सुनायलाय। हायमन कलिसियामनर विश्वसिमन के उत्साहित करबा आवरी शिक्षा देबा काछे केतक पत्र बी लिखलाय। ए मनले केतक पत्र बाइबिलर पुस्तक बनी गलाय।
प्रेरितों के काम 16:11-40 बाइबलर एक कतानी
खुले लाइसेंस (CC BY-SA 4.0) के अंतर्गत उपयोग करने, बदलने और साझा करने के लिए निःशुल्क।