17. दाऊद का दगड़ा मा पिता परमेश्वर की वाचा

शाऊल इस्राएल कु पैलो राजा छो। उ लम्बो अर सुंदर छो, जन उ लोग चांदा छा एकदम उन ही। इस्राएल पर अपड़ा शासन का पैला का कुछ सालों मा शाऊल एल अच्छो राजा छो। पर बाद मा उ एक दुष्ट आदिम बंणि गै जैल पिता परमेश्वर की बातों तैं नि मांणी, इलै पिता परमेश्वर ल एक हैंका आदिम तैं चुंणि जु कि एक दिन वेकी जगह पर राजा बंणलो।

पिता परमेश्वर ल दाऊद नौ का एक जवान इस्राएली आदिम तैं चुंणि के एक दिन शाऊल की जगह पर राजा हूंणु कु तैयारी कन शुरू कैरी। दाऊद बैतलहम नगर कु एक चरवाहा छो। भौत बगत बाद, दाऊद ल सिंह अर रीछ द्वीयूं तैं मारि डाली छो किलैकि दाऊद द्वारा रखव्ली करदी बगत वेक बुबा का ढिबरों पर ऊंल हमला कैरी छो। दाऊद एक नम्र अर धर्मी आदिम छो। वेल पिता परमेश्वर पर विश्वास कैरी अर वेकी बातों तैं मांणी।

जब दाऊद जवान आदिम ही छो, वेल लम्बा-चौडा गोलियत का विरूद्ध मा लडै कैरी। गोलियत एक भौत बड़ो सैनिक छो। उ भौत मजबूत अर लगभग तीन मीटर लम्बो छो! पर पिता परमेश्वर ल गोलियत तैं मरण अर इस्राएल तैं बचांण मा दाऊद की मदद कैरी। यांका बाद, दाऊद ल इस्राएल का दुश्मनों पर कई बार जीत हासिल कैरी। दाऊद एक बड़ो सिपै बंणि गै, अर वेका भौत सी लडैयूं मा इस्राएली सेना की अगवै कैरी। लुखुं ल वेकी भौत बडै कैरी।

लुखुं ल दाऊद बट्टी इथग प्रेम कैरी कि शाऊल वे बट्टी जलण लगिगे। आखिरकार शाऊल वे तैं मरण चांदु छो,इलै दाऊद वे बट्टी अर वेका सिपैयूं बट्टी छिपण लगिगे अर जंगल मा भागी गै। एक दिन, जब शाऊल अर वेका सिपै दाऊद की ढूंड मा छा त शाऊल एक उडियार मा गैनी। यु उ ही उडियार छै जै मा दाऊद छिपियूं छो, पर शाऊल ल वे तैं नि देखि। दाऊद शाऊल का पिछनै वेका भौत नजीक चलि गै अर वेका कपड़ा बट्टी एक दुकड़ा काटि लींनि। बाद मा जब, शाऊल वे उडियार बट्टी निकली त दाऊद ल वे तैं दै लगै के वेका पकडयां कपड़ा का टुकड़ा तैं दिखै। इन के, शाऊल जांणी गै कि दाऊद ल राजा बंनणु कु वे तैं मरणु कु मना कैरी दींनि।

कुछ बगत का बाद, शाऊल लड़ै मा मोरि गै, अर दाऊद इस्राएल कु राजा बंणि गै। उ एक अच्छो राजा छो, अर लुखुं ल वे बट्टी प्रेम कैरी। पिता परमेश्वर ल दाऊद तैं आशीषित कैरी अर वे तैं सफल बंणै। दाऊद ल भौत सी लड़ै लड़िनि, अर पिता परमेश्वर ल इस्राएल का दुश्मनों तैं हरौंण मा मदद कैरी। दाऊद ल यरूशलेम नगर तैं जीत के वे तैं अपड़ी राजधानी बंणै, जख उ रै अर अर शासन कैरी। दाऊद चालीस सालों तक राजा रै। वे बगत, इस्राएल सामर्थी अर अमीर बंणि गै छो।

दाऊद एक मन्दिर बनांण चांदु छो जख सभि इस्राएली पिता परमेश्वर की आराधना कैरी साका अर वे कु बलिदान चढ़ै साका। करीब 400 सालों बट्टी, उ लोग मूसा का बंणयां मिलाप वला तम्बू मा पिता परमेश्वर की आराधना कना छा अर वे कु बलिदान चढ़ाणा छा।

पर उख नातान नौ कु एक भविष्यवक्ता छो। पिता परमेश्वर ल दाऊद बट्टी यु बुल्णु कु भेजि; "तिल भौत सी लड़ै लड़िनि, इलै तू मि कु ये मन्दिर तैं नि बंणै सकली। तेरु नौंनो ये तैं बंणांलो। तभी भि, मि त्वे तैं भौत सी आशीष तैं दयुलु। तेरु वंशज हमेशा कु मेरा लुखुं पर राजा का रूप मा शासन करलो।" हमेशा कु शासन कन वलो दाऊद कु एकमात्र वंशज मसीह छो। मसीह पिता परमेश्वर कु चुंणयूं आदिम छो जु दुनिया का लुखुं तैं ऊंका पापों बट्टी बचालो।

जब दाऊद ल नातान कु संदेश तैं सूंणी त वेल पिता परमेश्वर कु धन्यवाद कैरी अर वेकी आराधना कैरी। पिता परमेश्वर वेकी महिमा तैं बढांदु रांदु छो अर वे तैं भौत आशीष दींणु छो। यां मा कुई शक नि च, दाऊद नि जंणदु छो कि पिता परमेश्वर यूं बातों तैं कब करलो। ये बगत हम जणदा छा कि इस्राएललियों तैं एक लम्बा बगत तक, लगभग 1,000 साल तक मसीह का आंणु को इन्तेजार कन होलो।

दाऊद ल भौत सालों तक न्यायपूर्वक अपड़ा लुखुं पर शासन कैरी। वे बड़ी निष्ठा बट्टी पिता परमेश्वर ल वे तैं आशीषित कैरी। जबकि, अपड़ा जीवन का आखिर मा वेल पिता परमेश्वर का विरुद्ध खतरनाक पाप कैरी।

एक दिन दाऊद ल अपड़ा महल बट्टी भैर झांकी अर एक सुंदर जनन तैं नयौंद देखि। उ वीं तैं नि जंणदु छो, पर वेल मालूम कैरी कि वींको नौ बतशेबा छो।

अपड़ी नजरों तैं हटांण का बजाय, दाऊद ल वीं तैं अफ मा लांणु कु कै तैं भेजी। उ वीं दगड़ी सये अर फिर वीं तैं वापस वींका घौर भेजी दींनि। कुछ बगत का बाद बतशेबा ल यु बोलि के दाऊद मा रैबार भेजि कि व गर्भवती च।

बतशेबा कु आदिम ऊरिय्याह नौ का एक आदिम छो। उ दाऊद का अच्छा सिपैयूं मा बट्टी एक छो। वीं बगत उ लड़ै कनु कु भैर गयूं छो। दाऊद ल ऊरिय्याह तैं लड़ै मा बट्टी वापस बुलै के वे तैं वींकी जनन दगड़ी रांणु कु बोलि। पर हैंका सिपै लड़ै मा ही छा इलै ऊरिय्याह ल घौर जांण से मना कैरी दींनि। तब दाऊद ल ऊरिय्याह तैं वापस लड़ै मा भेज दींनि अर सेनापति बट्टी वे तैं लड़ै मा एक इन जगह पर रखणु कु बोलि जख दुश्मन सबसे ज्यादा ताकतबर हो कि उ मोरि जौ। तब इन हवे कि ऊरिय्याह लड़ै मा मोरि गै।

ऊरिय्याह का लड़ै मा मोरि जांण का बाद दाऊद ल बतशेबा बट्टी ब्यो कैरी दींनि। बाद मा, वीं ल दाऊद का नौंना तैं जन्म दींनि। दाऊद ल जु कैरी वे बट्टी पिता परमेश्वर भौत गुस्सा छो, इलै वेल नातान भविष्यवक्ता तैं दाऊद तैं यु बतांणु कु भेजि कि वेको पाप कथग बुरा छो। दाऊद ल अपड़ा पाप कु पश्चताप कैरी अर पिता परमेश्वर ल वे तैं माफ कैरी दींनि। अपड़ा बच्यां जीवन मा, अपड़ा मुश्किल बगत मा भि दाऊद पिता परमेश्वर का पिछनै-पिछनै चलि अर वेकी बातों तैं मांणी।

पर दाऊद कु बच्चा मोरि गै। इन के पिता परमेश्वर ल दाऊद तैं दंड दींनि। यांका अलावा, दाऊद का मुरणा का बाद, वेका अपड़ा परिवार का कुछ लुखुं ल वेका विरुद्ध लड़ै कैरी, अर दाऊद की अपड़ी ताकत भि कम हवे गै छै। पर पिता परमेश्वर विश्वासयोग्य छो अर अभि भि वेल उ कैरी जु पिता परमेश्वर ल वे बट्टी वादा कैरी छो, जब कि दाऊद ल वेकी आज्ञा तैं अनदेखा कैरी। बाद मा, दाऊद अर बतशेबा की दुसरी सन्तान पैदा हवे, अर वेको नौ सुलैमान रखि।