18. बंटयूं राज्य

दाऊद राजा ल चालीस सालों तक इस्राएल पर राज्य कैरी। तब उ मोरि गै, अर वेका नौंना सुलैमान ल इस्राएल पर राज्य कन शुरू कैरी। पिता परमेश्वर ल सुलैमान बट्टी बात कैरी अर वे बट्टी पूछि कि उ सबसे ज्यादा क्य चांद कि पिता परमेश्वर वे कु कैरो। सुलैमान ल पिता परमेश्वर बट्टी मांगी कि उ भौत बुद्धिमान बंणि जौ। ईं बात ल पिता परमेश्वर तैं खुश कैरी, इलै पिता परमेश्वर ल सुलैमां तैं दुनिया कु सबसे बुद्धिमान आदिम बंणै दींनि। सुलैमान ल भौत सी बातों तैं सीखि अर उ एक बुद्धिमान शासक छो। पिता परमेश्वर ल वे तैं भौत ही ज्यादा अमीर बंणै दींनि।

यरूशलेम मा सुलैमान ल वे मन्दिर तैं बंणै जैकु वेका बुबा ल योजना बंणै छै अर सामान तैं इकठ्ठा कैरी छो। अब लोग मिलाप वला तम्बू मा न बल्कि मन्दिर मा ही पिता परमेश्वर की आराधना करदा छा अर वेकु बलिदान चढांदा छा। पिता परमेश्वर ऐ के मन्दिर मा मौजूद रौंदो छो, अर उख उ अपड़ा लुखुं का दगड़ी रौंदो छो।

पर सुलैमान ल दुसरा देशों की जननों बट्टी प्रेम कैरी। वेल भौत सी, लगभग 1000 जननों बट्टी ब्यो कैरी के पिता परमेश्वर की आज्ञा कु अनदेखा कैरी! यांमा बट्टी भौत सी जनन हैंका देश बट्टी अईं अर अफ दगड़ी अपड़ा दिबतों तैं लैंनि अर ऊंकी आराधना कना रैनी। जब सुलैमान बुढिया हवे गै त वेल भि ऊंका दिबतों की आराधना कैरी।

ईं वजह से पिता परमेश्वर सुलैमान बट्टी गुस्सा छो। वेल बोलि कि इस्राएल देश तैं द्वी राज्यों मा बांटण का द्वारा वे तैं दंड दयालो। उ सुलैमान का मुरण का बाद इन करलो।

सुलैमान का मुरण का बाद, रहबाम राजा बंणि। इस्राएल देश का सभि लोग वे तैं अपड़ो राजा का रूप मा स्वीकार कनु कु एक दगड़ी कठ्ठा हवीनि। ऊंल रहबाम बट्टी शिकेत कैरी कि सुलैमान ल ऊं बट्टी भौत ज्यादा मेहनत करवे छै अर भौत सी चुंगी वसूल कैरी छै। ऊंल रहबाम बट्टी बिनती कैरी कि ऊं बट्टी कम काम करौनु।

पर रहबाम ल ऊं तैं बड़ी ही मूर्खता ल जवाब दींनि, " तुम बुल्दयां कि मेरा बुबा सुलैमान ल तुम बट्टी भौत ज्यादा मेहनत करवे। पर मि तुम बट्टी वे बट्टी भि ज्यादा मेहनत करवोलु, अर मि तुम तैं वे बट्टी भि ज्यादा दुखी करुलु।"

जब लुखुं ल वे तैं इन बुल्द सूंणि त वे मा बट्टी भौत ल वेका विरुद्ध बवाल कैरी। दस गोत्रों ल वे तैं छोड़ दींनि; वे दगड़ी अब बस द्वी गोत्र ही बचिनि। यूं गोत्रों ल अफ तैं यहूदा कु राज्य बोलि।

और दस गोत्रों ल यारोबाम नौ का एक आदिम तैं अपड़ो राजा बंणै दींनि। यु गोत्र देश का उत्तर-पूर्वी हिस्सा मा छा। ऊंल अफ तैं इस्राएल कु राज्य बोलि।

पर यारोबाम ल पिता परमेश्वर का विरुद्ध बलवा कैरी अर लुखुं बट्टी पाप करवै। वेल अपड़ा लुखुं का द्वारा आराधना कनु कु द्वी मूर्तियों तैं बंणवै। उ अब यहूदा का राज्य मा यरूशलेम मा पिता परमेश्वर का मन्दिर मा वेकी आराधना कनु कु नि गै।

यहूदा अर इस्राएल का राज्य कु दुश्मन बंणि गै अर ज्यादा तर एक- हैंका का विरूद्ध लड़ै कन लगि गै।

इस्राएल का नया राज्य मा, सैरा ही राजा दुष्ट छा। यांमा बट्टी कुई भि राजा वेकी जगह पर राजा बंनणै की चाह रखण वला हैंका इस्राएलियों का द्वारा मरै गै छा।

इस्राएल राज्य का भि राजाओं ल अर ज्यादातर लुखुं ल मूर्तियों की आराधना कैरी। जब ऊंल इन कैरी, त उ ज्यादा तर वेश्याओं का दगड़ी सयेनि अर कई बार मूर्तियों का अगनै बच्चों तैं भि बलि कैरी।

यहूदा राज्य का राजा, दाऊद का वंशज छा। यूं राजाओं मा बट्टी कई अच्छा आदिम छा जौल न्यायपूर्वक राज्य कैरी अर पिता परमेश्वर की आराधना कैरी। पर यहूदा का ज्यादात्र राजा दुष्ट छा। ऊंल दुष्टता का दगड़ी राज्य कैरी, अर मूर्तियों की आराधना कैरी। ईख तक कि यांमा बट्टी कुछ राजाओं ल झूठा दिबतों का अगनै अपड़ा बच्चों तैं भि बलि कैरी दींनि। यहूदा का ज्यादातर लुखुं ल भि पिता परमेश्वर का विरूद्ध बलवा कैरी अर हैंका दिबताओं की आराधना कैरी।