26. यीशु अपड़ी सेवा तैं शुरू करद

शैतान की अजमेशों कु इनकार कना का बाद, यीशु वापस गलील का इलाका मा ऐ। यु ही व जगह च जख उ रांदो छो। पवित्र आत्मा वे तैं भौत सामर्थ दींणु छो, अर यीशु एक जगह बट्टी दुसरे जगह गै अर लुखुं तैं शिक्षा दींनि। सभियूं ल वेका बारा मा अच्छी बातों तैं बोलि।

फिर यीशु नसरत नगर मा गै। जब उ छुट्टो छो त ये ही गाऊं मा रांदो छो। विश्राम का दिन, उ आराधना कनै की जगह पर गै। अगवों ल वे तैं यशायाह भविष्यवक्ता की संदेश की एक किताब दींनि। उ चांदा छा कि उ वे मा बट्टी पढौ। तब यीशु ल वीं किताब तैं खोली के वे मा बट्टी एक हिस्सा तैं पैढी।

यीशु ल इन पैढी, "पिता परमेश्वर ल मि तैं अपड़ो आत्मा दींनि कि मि कंगालों मा प्रचार कैरी साकु। वेल मि तैं इलै भेजि कि कैदियों तैं आजाद कैरू, अंधों तैं फिर से द्रष्टि दयूं, अर ऊं तैं छुटकारा दयूं जूं तैं दुसरा लोग दबांण छिनी। यु उ बगत च जब पिता परमेश्वर हम पर दया करलो अर हमारी मदद करलो।"

फिर यीशु बैठ गै। सभि लोग वे तैं बड़ा ध्यान से दिखणा छा। उ जंणदा छा कि पवित्रशास्त्र कु जु भाग वेल अभि पैढी छो उ मसीह का बारा मा छो। यीशु ल बोलि, "जु बात मिल अभि तुम कु पढिनि, उ वे बगत पूरी हूंणी छिनी।"सभि लोग हैरान छा। ऊंल बोलि, "क्य यु यूसुफ कु नौंनो नि च?"

तब यीशु ल बोलि, "यु सच च कि लोग कै इन भविष्यवक्ता तैं कभि स्वीकार नि करदींनि जु ऊंका नगर मा पलयूं- बढयूं हो। एलिय्याह भविष्यवक्ता का बगत मा, इस्राएल मा भौत सी विधवा छै। पर जब साढे तीन साल तक बरखा नि हवीनि त पिता परमेश्वर ल एलिय्याह भविष्यवक्ता तैं इस्राएल मा कै विधवा की मदद कनु कु नि भेजि। यांका बदला, वेल एलिय्याह तैं कै हैंका देश की विधवा मा भेजि।"

जब यीशु बुल्णु रै, " अर एलीशा भविष्यवक्ता का बगत मा, इस्राएल मा भौत सा लोग चमड़ी का रोग बट्टी परेशान छा। पर एलीशा ल ऊं मा बट्टी कै तैं भि खूब नि कैरी। वेल बस इस्राएल का दुश्मनॉ का सेनापीटीआई नामान तैं खूब कैरी।" पर जु लोग यीशु की बातों तैं सुनणा छा उ यहूदी छा। इलै जब ऊंल वे तैं यु बुल्द सूंणी त उ यीशु पर गुस्सा हवे गैनी।

नासरत का लुखुं ल यीशु तैं पकड़ी दींनि अर वे तैं आराधना की जगह बट्टी घसीट के भैर ली गैनी। उ वे तैं मरणु कु मूड़ी फिकण कु एक पोड पर ली गैनी। पर यीशु भीड़ बट्टी निकली गै अर नासरत नगर तैं छोड़ी के चलि गै।

फिर यीशु सैरा गलील का इलाका मा गै, अर बड़ी भीड़ वे मा ऐ। उ इन भौत सा लुखुं तैं ले के ऐनी जु बीमार अर अपाहिज छा। ऊंमा बट्टी कुछ देखि, चलि, सूंणि अर बोलि नि सकदा छा, अर यीशु ल ऊं तैं खूब कैरी।

भौत सा इन लोग भि यीशु मा लये गैनी जूं पर दुष्टात्माए छै। यीशु ल दुष्टात्माओं तैं ऊं लुखुं बट्टी निकली जांणे की आज्ञा दींनि अर उ निकली गैनी। उ दुष्टात्माए चिलै-चिलै के बुल्णी छै, "तू परमेश्वर कु नौंनो छै!" भीड़ का लोग हैरान छा, अर ऊंल पिता परमेश्वर की स्तुति कैरी।

फिर यीशु ल बारह आदिमों तैं चुंणि जौ तैं वेल अपड़ो प्रेरित बोलि। ऊं प्रेरितों ल वे दगड़ी यात्रा कैरी अर वे बट्टी शिक्षा पै।