28. अमीर जवान शासक

एक दिन, एक अमीर जवान अगुवा ल यीशु मा ऐ के पूछि, "हे अच्छा गुरु जी, हमेशा कु जीवन पांणु कु मि तैं क्य कन पुडलो?" यीशु ल वे बट्टी बोलि, "तू मि तैं 'अच्छो' किलै बुल्णी छै? बस एक ही अच्छो च अर उ पिता परमेश्वर च। पर जु तु हमेशा कु जीवन पांण चांदी त पिता परमेश्वर की व्यवस्था कु पालन कैर।"

वेल पूछि, "मि तैं कौन-कौन सी आज्ञाओं कु पालन कन चयणु च?" फिर यीशु ल जवाब दये, "हत्या नि कन। व्यभिचार नि कन। चोरी नि कन। झूठ नि बुल्ण। अपड़ा बुबा अर ब्वे कु आदर कन, अपड़ा पड़ोसी तैं अफ जन प्रेम कन।"

पर वे जवान आदिम ल बोलि, "मि अपड़ा बचपन से ही यूं सभि आज्ञाओं कु पालन करदी अयु। मि तैं हमेशा का जीवन मा रांणु कु अब भि क्य कनै कि जरूरत च?" यीशु ल वे जनै देखि अर वे बट्टी प्रेम कैरी।

यीशु ल जवाब दींनि, "जु यु सिद्ध हूंण चांणी चै त जै के अपड़ो सभि कुछ बेचि के वे धन तैं गरीबों तैं दये दे, अर त्वे तैं स्वर्ग मा धन मिललो। तब ऐ के मेरा पिछनै हवे जा।"

जु यीशु ल बोलि जु वे जवान आदिम ल सूंणी त उ भौत उदास हवे गै, किलैकि उ भौत अमीर छो अर उ अपड़ी धन सम्पत्ति तैं दींण नि चांदु छो। उ मुडी के यीशु का समणी बट्टी चलि गै।

तब यीशु ल अपड़ा चेलों बट्टी बोलि, "पिता परमेश्वर का राज्य मा अमीर लुखुं को दाखिल हूंण कठिन च! हाँ, एक अमीर आदिम का पिता परमेश्वर का रज्य मा दाखिल हूंण की तुलना मा कै ऊँट कु सुई का छेद मा बट्टी निकल जांण आसान च।"

जब चेलों ल यीशु की छुईं सूंणी त उ हैरान हवे गैनी। ऊंल बोलि, "जु यु इन च त पिता परमेश्वर कै तैं बचालो?"

यीशु ल चेलों तैं देखि के बोलि, "लोग अपड़ा आप तैं नई बचै सकदींनि। पर पिता परमेश्वर कु कुछ भि कन मुश्किल नि च।"

पतरस ल यीशु मा बोलि, "हम जु तेरा चेला छां अपड़ो सभि कुछ छोड़ी के तेरा पिछनै हवे ग्यां। त हम कु क्य प्रतिफल होलो?"

यीशु ल जवाब दये, "हर एक आदिम जैल मेरा कारण अपड़ो घौर, भये, बैंण, बुबा, ब्वे, बच्चा, या सम्पत्ति छोड़ी हो, उ वे बट्टी 100 गुणा ज्यादा पालो अर हमेशा कु जीवन तैं भि पालो। पर भौत सा छिनी जु पैला छिनी उ पिछला होला, अर भौत सा छिनी जु पिछला छिनी उ पैला होला।"