45. स्त्तिफनुस अर फिलिप्पुस

पैला मसीही अगवों का बीच मा स्त्तिफनुस नौं कु एक आदिम छो। सभि लोग वेका आदर करदा छा। पवित्र आत्मा ल वे तैं सामर्थ अर बुद्धि प्रदान कैरी छै। स्त्तिफनुस ल भौत सा चमत्कार कैरी छा। जब वेल यीशु पर विश्वास कना का बारा मा ऊं तैं सिखै त भौत सा लुखुं ल विश्वास कैरी।

एक दिन, स्त्तिफनुस यीशु का बारा मा सिखै छो, अर कुछ इन यहूदी ऐ जौंल यीशु पर विश्वास नि कैरी छो अर वे दगड़ी घपरोल कन शुरू कैरी। उ भौत गुस्सा हवे गैनी, इलै उ धार्मिक अगवों मा गै अर वेका बारा मा झूठ बोलि। "हम ल स्त्तिफनुस तैं मूसा अर पिता परमेश्वर का बारा मा बुरी बात बुल्द सुणी!" इलै धार्मिक अगवों ल स्त्तिफनुस तैं गिरफ्तार कैरी अर वे तैं महायाजक अर यहूदियों का हैंका अगवों का समणी ले के ऐ। और भि झूठा गवाह ऐ अर ऊंल स्त्तिफनुस का बारा मा झूठ बोलि।

महायाजक ल स्त्तिफनुस बट्टी पूछि, "क्य यु लोग तेरा बारा मा सच बुल्णा छा?" स्त्तिफनुस ल महायाजक तैं जवाब दींण कु भौत सी बातों तैं बुल्ण शुरू कैरी दींनि। वेल बोलि कि अब्राहम का बगत से यीशु का बगत तक पिता परमेश्वर ल इस्राएल का लुखुं कु भौत सा अनोखा काम करीनि। पर लुखुं ल हमेशा पिता परमेश्वर की आज्ञा तैं नि मांणी। स्त्तिफनुस ल बोलि, "तुम लोग पिता परमेश्वर का विरूद्ध ढीट अर बलवा कन वला हो। तुम ल हमेशा पवित्र आत्मा तैं अस्वीकार कैरी, जन कि हमारा पुरणों ल हमेशा पवित्र आत्मा तैं अस्वीकार अर हमेशा वेका भविष्यवक्ताओं तैं मारि दींनि। पर जु ऊंल कैरी वेकी तुलना मा तुम ल और भि बुरो कैरी! तुम ल मसीह तैं मारि दींनि!"

जब ऊं धार्मिक अगुवों ल यु सूंणि, त उ इथग गुस्सा हवे गैनी कि ऊंल अपड़ा कनदूडों तैं बंद कैरी दींनि अर ऊंची आवाज मा चिलै। उ स्त्तिफनुस तैं घसीट के नगर बट्टी भैर ली गैनी अर वे तैं मरणु कु ढुंगा उठैनि।

जब स्त्तिफनुस मुरणु छो, उ बोलि, "हे यीशु, मेरी आत्मा तैं स्वीकार कैर!" तब उ अपड़ा घुटनों पर गिरी अर फिर से बोलि, "हे प्रभु, यु पाप ऊं पर नि लगै।" तब उ मोरि गै।

वे दिन, यरूशलेम मा रांण वला भौत सा लुखुं ल यीशु की आज्ञा तैं सुनण अर मनण वलों तैं परेशान कन शुरू कैरी, इलै विश्वासी लोग हैंका जगह पर भागी गैनी। पर यांका बाद भि, जख कखी भि उ गैनी ऊंल यीशु का बारा मा प्रचार कैरी।

फिलिप्पुस नौं कु एक विश्वासी छो। जन कि हैंका भौत सा विश्वासियों ल बोलि छो उ भि यरूशलेम बट्टी भागी गै छो। उ सामरिया का क्षेत्र मा चलि गै। उख ऊंका लुखुं मा यीशु का बारा मा प्रचार कैरी। भौत सा लोग ल वे पर विश्वास कैरी अर उद्धार पै। एक दिन, फिलिप्पुस मा पिता परमेश्वर की तरपां बट्टी एक स्वर्गदूत ऐ अर वे बट्टी जंगल मा जांणु कु, अर एक सड़क पर चलणु कु बोलि। फिलिप्पुस उख चलि गै। जब उ वीं सड़क पर चलणु छो, त वेल एक आदिम तैं अपड़ा रथ मा जांद देखि। यु आदिम कुश देश कु एक महान अधिकारी छो। पवित्र आत्मा ल फिलिप्पुस बट्टी बोलि कि जै के वे आदिम का दगड़ा-दगड़ी चलि।

इलै फिलिप्पुस रथ का समणी गै। वेल सूंणि कि उ कुशी पिता परमेश्वर का वचन तैं पढ़णु छो। जु यशायाह भविष्यवक्ता ल लिखी छो उ वे तैं पढ़णु छो। "उ वे तैं वध किये जांण वला ढिबरा का जन ली गै, अर जन एक चिनखो शांत रौंद, वेल भि एक शब्द नि बोलि। ऊंल वे दगड़ी बुरो बरतौ कैरी अर वेको आदर नि कैरी। ऊंल वे तैं जान से मारि दींनि।"

फिलिप्पुस ल वे तैं कुशी बट्टी पूछि, "जु तु पढ़णी छै क्य तु वे तैं समझदी भि छै?" वे कुशी ल जवाब दये, "न। जब तक कुई मि तैं नि समझालो, तब तक मि ये तैं नि समझी सकदु। किरपा कैरी के मेरा समणी ऐ के बैठ। यशायाह यु अपड़ा बारा मा लिखणु च य कै और का बारा मा?"

फिलिप्पुस रथ पर चढ़ी के बैठी गै। तब वेल वे कुशी आदिम तैं उ बतै जु यशायाह ल यीशु का बारा मा लिखी छो। फिलिप्पुस ल पिता परमेश्वर का वचन का भौत सा हैंका हिस्सों की भि चर्चा कैरी। इन के, वेल वे आदिम तैं यीशु का बारा मा शुभ संदेश सुणै।

फिलिप्पुस अर उ कुशी चलि के पांणि का समणी ऐ। वे कुशी ल बोलि, "देख! इख पांणि च! क्य मि बपतिस्मा ले सकदु छो?" अर वेल रथ चलांण वला सारथी कु रथ तैं रुकणु कु बोलि।

तब उ पांणी मा चलि गैनी, अर फिलिप्पुस ल वे कुशी तैं बपतिस्मा दींनि। जब उ पांणि बट्टी भैर ऐनी, त पवित्र आत्मा अचानक ही फिलिप्पुस तैं उठै के कै हैंकी जगह पर ली गै। उख फिलिप्पुस ल लुखुं तैं यीशु का बारा मा बतांणु रै।

उ कुशी अपड़ा घौर की यात्रा पर अगनै बढ़ी गै। उ खुश छो कि उ अब यीशु तैं जंणदु च।