47. फिलिप्पी मा पौलुस अर सीलास
जब शाऊल ल पूरा रोमी साम्राज्य मा यात्रा करिनि त वेल अपड़ो रोमी नौं "पौलुस" कु इस्तेमाल कन शुरू कैरी दींनि। एक दिन, पौलुस अर वेका दगड़िया सीलास फिलिप्पी नगर मा यीशु का बारा मा शुभ संदेश सुनांणु कु गै। उ नगर का भैर गाड का छाला एक जगह पर गैनी जख लोग प्रार्थना कनु कु कठ्ठा छा। उख उ लुदिया नौं की जनन बट्टी मिलिनि जु एक व्यापारी छै। उ पिता परमेश्वर बट्टी प्रेम करदी छै अर वेकी आराधना करदी छै।
पिता परमेश्वर ल लुदिया तैं यीशु का बारा मा संदेश पर विश्वास कनु कु मजबूत कैरी। पौलुस अर सीलास ल वीं तैं अर वींका परिवार तैं बपतिस्मा दींनि। वीं ल पौलुस अर सीलास तैं अपड़ा घौर ठहरणु कु न्यूती, इलै उ उख ठैरी गैनी।
पौलुस अर सीलास लुखुं बट्टी अक्सर वीं जगह पर मिलदा छा जख यहूदी लोग प्रार्थना करदा छा। रोज जब उ उख जांदा छा त एक नौकरयांण नौंनि जु दुष्टात्मा का काबू मा छै ऊंको पीछा करदी छै। ईं दुष्टात्मा का द्वारा व लुखुं को भविष्य बतांदी छै, इलै व भविष्य बतांण वली का रूप मा अपड़ा स्वामी कु भौत सी धन कमांदी छै।
ऊंका जांदी बगत या नौकरयांण नौंनि चिलांदी छै, "यु आदिम परम प्रधान परमेश्वर कु सेवक च। यु तुम तैं उद्धार पांणों कु बट्टो बतांणा छिनी!" वा हर रोज इन ही करदी छै ज्यां बट्टी पौलुस नाराज हवे गै।
आखिर मा, एक दिन जब व नौकरयांण ल चिलांण शुरू कैरी, त पौलुस ल वीं जनै मुडी के वीं का भितर की दुष्टात्मा कु बोलि, "यीशु का नौं से ईं मा बट्टी निकली जा।" वे ही बगत वीं दुष्टात्मा ल वी नौंनि तैं छोड़ी दींनि।
वीं नौकरयांण का स्वामी भौत गुस्सा हवे गैनी। ऊं तैं मलूम हवे गै कि बगैर वीं दुष्टात्मा का व नौकरयांण नौंनि लुखुं तैं भविष्य नि बतै सकदी छै। यांको मतलब छो कि लोग अब वींका स्वामियों तैं अब पैसा नि दयाला कि व ऊंको भविष्य बतौ कि ऊंका दगड़ी अब क्य होलो।
इलै वीं नौकरयांण नौंनि का स्वामी पौलुस अर सीलास तैं रोमी अधिकारियों मा ली गैनी। ऊंल पौलुस अर सीलास तैं पीटी, अर फिर ऊं तैं जेलखना मा डाली दींनि।
ऊंल पौलुस अर सीलास तैं जेलखना का इन हिस्सा मा रखि जख सबसे ज्यादा सिपै छा। इख तक कि ऊंल ऊंका खुटों तैं लखडा का बड़ा टुकड़ों मा जकड़ी दींनि। पर पौलुस अर सीलास अधा राति का बगत, पिता परमेश्वर की स्तुति का गीत गांणा छा।
तब अचानक से, एक बड़ो भूकम्प हवे! जेलखना का सैरा द्वार खुलि गैनी, अर सैरा बंधियों का संगला खुलि के गिरी गैनी।
तब जेलखना कु दरोगा जागि गै। वेल देखि कि जेलखना का द्वार खुलयां छिनी। वेल सोचि कि सैरा बंधि बचि के भागि गैनी। उ डैरी गै कि ऊंका भागि जांण से रोमी आधिकारी वे तैं मारि दयाला, इलै उ अफ तैं मरणु कु तैयार हवे गै! पर पौलुस वे तैं देखि के चिलै, "रुकि जा! अफ तैं नुकसान नि पौछो। हम सभि इख ही छा।"
वे दरोगा ल कांपी के पौलुस अर सीलास मा ऐ के पूछि, "उद्धार पांणु कु मि क्य कैरु?" पौलुस ल जवाब दींनि, "प्रभु यीशु पर विश्वास कैर, त तू अर तेरु घराना उद्धार पालो।" तब उ दरोगा पौलुस अर सीलास तैं अपड़ा घौर ली गै अर ऊं का खुटों तैं धूंण लगि गै। पौलुस ल वेका घौर का सभि लुखुं तैं यीशु का बारा मा शुभ संदेश सुणै।
दरोगा अर वेका पूरा परिवार ल यीशु पर विश्वास कैरी, इलै पौलुस अर सीलास ल ऊं तैं बपतिस्मा दींनि। तब दरोगा ल पौलुस अर सीलास तैं खांणु खिलै, अर उ कठ्ठा हवे के खुश हवीनि।
हैंका दिन नगर का अगवों ल पौलुस अर सीलास तैं जेलखना बट्टी आजाद कैरी दींनि अर फिलिप्पी बट्टी चलि जांणु कु बोलि। पौलुस अर सीलास लुदिया अर कुछ हैंका दगड़ियों बट्टी मिलिनि अर वेका बाद नगर बट्टी निकली गैनी। यीशु का बारा मा शुभ संदेश फैलदी ही गै, अर मंडलि बढ़दी ही गै।
पौलुस अर हैंका मसीही अगवों ल भौत सी नगरों की यात्रा कैरी। ऊंल लुखुं तैं यीशु का बारा मा शुभ संदेश सुणै। ऊंल मण्डलियो का विश्वासियों तैं उत्साहित कन अर शिक्षा दींणु कु भौत सी चिठ्ठी भि लिखिनि। यांमाँ बट्टी कुछ चिठ्ठी बाइबल की किताब भि बंणि गैनी।
प्रेरितों का काम 16:11-40 बट्टी एक बाइबल की कथा
खुले लाइसेंस (CC BY-SA 4.0) के अंतर्गत उपयोग करने, बदलने और साझा करने के लिए निःशुल्क।