9. पिता परमेश्वर मूसा तैं बुलांद

यूसूफ का मुरण का बाद वेका सब रिशतेदार मिस्र देश मा ही रौंण लगि गैनी। उ अर वेका वंशज भौत सालों बाद तक मिस्र देश मा ही रैनी अर ऊंल भौत संतान पैदा हवीनि। उ इस्राएली कहलेनि।

भौत सालों का बाद, इस्राएलियो की संख्या भौत ज्यादा बढ़ी गै छै। अर मिस्री लोग अब ईं बात कु आभारी नि छा कि ऊं की मदद कनु कु यूसूफ ल भौत कुछ कैरी छो। उ इस्राएलियो बट्टी डैरी गैनी किलैकि उ संख्या मा ऊं बट्टी भौत छा। इलै वे बगत मिस्र पर शासन कन वलो फिरौन ल इस्राएलियो तैं मिस्रियों कु नौकर बंणै दींनि।

मिस्रियों ल इस्राएलियो तैं भौत सी इमारतों अर इख तक कि भौत सी नगरों तैं बनांणु कु मजबूत कैरी। ऊंल भौत मेहनत कैरी पर फिर वेल उतैं भौत दुःख दींनि, पर पिता परमेश्वर ल ऊं तैं आशीष दींनि अर ऊंकी और भि ज्यादा सन्तान पैदा हवीनि।

फिरौन ल देखी कि इस्राएलियो का भौत सी सन्तान पैदा हूंणी छिनी, इलै वेल अपड़ा लुखुं तैं इस्राएलियो का सभि नौंनो तैं नील गाड मा फेकी के मारि दींणे की आज्ञा दींनि।

एक खास इस्राएली जनन ल एक नौंना तैं जन्म दींनि। वीं ल अर वीं का जवें ल जथग हवे सकदु छो वे नौंना तैं छुपै के रखि।

जब नौंना का ब्वे-बाब वे तैं और नि छिपै सकिनि, त ऊंल वे तैं मारेण से बचांणु कु एक तैरण वली ठुपरी मा नील गाड का छाला पर निगला का बीच मा छोड़ी दींनि। वीं कि बड़ी बैंण यु दिखणु कु वेकी निगरानी कन लगी कि वे दगड़ी क्य होलो।

फिरौन की नौंनि ल वीं ठुपरी तैं देखि के वेका भितर झांकी। त एक बच्चा तैं देखि त वीं ल वे तैं अपड़ा नौंना का रूप मा ले लींनि। वीं ल एक इस्राएली जनन तैं वे तैं दूध पिलांणु कु काम पर रखि दींनि, बगैर यु जणयां कि उ वे नौंने कि ही ब्वे च। जब नौंनो इथग बड़ों हवे गै कि अब वे तैं अपड़ी ब्वे की दूध कि जरूरत नि छै, त वेल फिरौन की नौंनि मा वापस भेजि दींनि,अर वेको नौ मूसा छो।

एक दिन, जब मूसा बड़ो हवे गै छो, त वेल देखि कि एक मिस्री एक इस्राएली तैं पिटणु च। मूसा ल अपड़ा दगड़िया इस्राएली तैं बचांण की कोशिश कैरी।

जब मूसा ल सोचि कि वे तैं कुई नि दिखलो त मूसा ल वे मिस्री तैं मारि दींनि अर वेकी लांश तैं खडै दींनि। पर मूसा ल जु कैरी छो वे तैं कैल नि देखि छो।

फिरौन तैं पता चली गै कि मूसा ल क्य कैरी। वेल मूसा तैं मारि डलण की कोशिश कैरी, पर मूसा जंगल बट्टी भागी गै। फिरौन का सिपै वे तैं जंगल मा खुजै नि सकिनि।

मिस्र बट्टी दूर जंगल मा एक चरवाहा बंणि ग्ये छो। वेल उख एक जनन बट्टी ब्वो कैरी ऐ द्वी नौंनो तैं पैदा कैरी।

मूसा अपड़ा ससुर का ढिबरों का झुण्ड की रखवली करदु छो। एक दिन, वेल जगदा झिबलांण तैं देखि ज्वा भस्म हुयां बगैर जगणी छै। वीं तै दिखणु कु उ वीं झिबलांण का समणी ग्ये। जब उ वींका और नजीक गै त पिता परमेश्वर ल वे दगड़ी बात कैरी। परमेश्वर ल बोलि, "हे मूसा, अपड़ा जुतों तैं उतारी दे। तू एक पवित्र जगह पर खड़ो छै।"

पिता परमेश्वर ल बोलि, "मिल अपड़ा लुखुं का दुखों तैं देखि। मि त्वे तैं फिरौन मा भिजुलु कि तू इस्राएलियो तैं मिस्र देश की गुलामी बट्टी निकली के लौ। मि वे तैं कनान देश दयुलु, उ देश जैको मिल अब्राहम, इसाहक अर याकूब बट्टी वादा कैरी।"

मूसा ल पूछि, "जु लुखुं ल जनण चाही कि मि तैं कैल भेजि त मि क्य बोलु?" पिता परमेश्वर ल बोलि, "जु मि छो सु छो। वेल बोलि, 'मि छो ल मि तैं त्वे मा भेजि।' ऊं बट्टी यु भि बोल, 'मि तुम्हरा पुरणों, अब्राहम, इसाहक, अर याकूब कु परमेश्वर यहोवा छो।' मेरु यु नौ हमेशा कु च।"

मूसा डरदु छो अर फिरौन मा जांण नि चांदु छो किलैकि वेल सोचि कि उ अच्छा ढंग से नि बोलि सकलो, इलै पिता परमेश्वर ल मूसा का भये, हारून, तैं वेकी मदद कनु कु भेजि।