12. इस्त्राएली मऊंओं कि मिस्र देशंञ निसिबा
इस्राएली मऊं मिस्र किन निसि डरोआं तुठोरे थिये। हेबे तेने परगरो नोथे, होरेक तेने वाइदा किऊरे देशार गाने थिये! ज़े भि इस्राएली गेठा, मिस्री से बदे तेनोर दिता, इटि च़ेक कि सोना रोपा होरेक ज़रूरी समानों च़ेक। अइक देशा कि मिन ज़ेंञ मऊंवीं परमेश्वरा पूटी विश्वास किया होरेक ज़ेखेए इस्राएली मऊं मिस्र किन निथे त तेने भि तेनो सा भुई गे।
दिया मुके बदड़ा कि एक मोड्डा थम तेनो अगरीं-अगरीं हणिंया। होरेक राति मुके अगि थम बणि गिया। परमेश्वर ज़े अगि ओ बदड़ा थमन थिया, हमेशा तेनो सा थिया होरेक तेनी सफरा मुके तेनो अगुवाई किया। तेनोर सिर्फ एतेके करिबा थिया कि तेस पिच़-पिच़े हणोंरा लोई।
मिन ध्याड़े पिच़ंञ, फिरौन ओ तेसी मऊंई अपें सेमर लेख्फी करि बिदा। से फिरि इस्राएलिउर अपां दास बणंइबा चाहना थिया। तेरे तेने इस्राएलिउ कि पीछा किया। इ परमेश्वरे थिया ज़ेनी तेनो सेमर लेख्फी करि बिदा। तेनी एरा तेरे किया किसबोलि से चाहनाति कि बदे इ प्रयानोरा लोई कि फिरौनंञ होरेक मिस्रियो कि बदे देवताओंञ, यहोवा परमेश्वर, मस्स तागतवर असे।
ज़ेखेईं इस्राएली मिस्र कि सेनईर अइब कईया त तेनोर पता लगिया कि फिरौना सेना रख्ता समुन्दरा बिच़ा शच़ि गेन। तेने डरोंआं डरिकर रोलिब ठारूए, “असे मिस्रर किस छोड़ि बिदा? असे मरिब तियार असु।”
मूसे इस्राएलिउर लाई, “डरिबा बंद करो! परमेश्वर अज़ तुईफा ओनि लड़ल होरेक तुसोर बच़ाल।” च़े परमेश्वरे मूसेर लाई, “इनों मऊंओर रख्ता समुन्दरारि अगलि बढ़िबेर बोल”।
च़े परमेश्वरे तेस बदड़ा थमर लेई कर इस्राएलिउ ओ मिस्रिउ कि बिच़ा छ़ई छ़ईया ताकि मिस्री मऊंवी इस्राएलिउर कई बटोरा न लोई।
परमेश्वरे मूसेंञ समुन्दरा पूटी अपां हथ बढ़ईबेर बोलिया। च़े परमेश्वरे ब्याने सा समुन्दरा पाईंर इसो-ओसो करि बिदा, ज़ेसी बजेहे समुन्दरा बिच़ंञ एक बत बणिं गिया।
इस्राएली मऊं एम्फा दुईयो तरफे पाईं कि भिति सा शुक्का धर्ता पूटी समुन्दरंञ हणिब ठारूए।
च़े परमेश्वरे तेस बतंञ बदड़र उछ़ुई बिदा ताकि मिस्री मऊंवी इस्राएलिउर बच़ि कर गईब काओरा लोई। मिस्रिए तेनोर प्रवईबे ओनि तेनोकी पिच्छ़ीं गईबे की फैंसला किया।
च़े तेने समुन्दरा बते तेस बता पूटी इस्राएलिउ कि पीछा किया, पर परमेश्वरे मिस्रिउर डरई बिदा होरेक रथोर शच़ई बिदा। तेने बाकुईब ठारुए, “नशो! इस्राएलिउ तरफे परमेश्वर द्रड़ेओना!”
बदे इस्राएली समुन्दरा कि अइक हारोरिंञ अपरि गे। च़े परमेश्वरे मूसेर लाई फिरि पांयांरि हथ अगलि कर। ज़ेखेए मूसे एरा किया, च़े पांईं मिस्री सेने पूटी आया होरेक फिरि तेरी-ई भुई गिया। मिस्रिउ कि पूरा सेना पाईंन डूबि गिया।
ज़ेखेईं इस्राएली कईया कि मिस्री मरि गिउरे थिये च़े तेने परमेश्वरा पुटि विश्वास किया। तेने विश्वास किया कि मूसा परमेश्वरा तरफे बोलना थिया।
इस्राएली मऊं तेरे भि डरोआं तुठोरे थिये किसबोलि परमेश्वरे तेनोर मरिबेंञो दास भुईबेंञ बच़ई बिदोरा थिया। हेबे तेने परमेश्वरा अराधना ओ तेसी भाषे करिबे ओनि आज़ाद थिये। इस्राएली एम्फां आज़ादी मनईबे ओनि परमेश्वरर महिमा दीबे ओनि केतिबा घीतोर बोलिया किसबोलि परमेश्वरे तेनोर मिस्रा कि सेने सा बच़ाओरा थिया।
परमेश्वरे इस्राएलिउर बर्षोत एक त्योहार मनइबे हुकम दिता इ हीत करिबे ओनि कि केरा परमेश्वरे मिस्रिउर केरा डक्शी किवाया होरेक तेनोर परगर भुईबेंञ आज़ाद किया। इ फसह कि त्योहार गणुंआ। इ त्योहार मनईबे ओनि एक ठीक-ठाक उर्नु बलि करिबा थिया, तेसर चियइबा थिया, होरेक तेसर सुमा न गिउरा रोटि सा खईबा थिया।
निर्गमन पाठ 12:33-15:21 अंञ एक बाइबला कथा
खुले लाइसेंस (CC BY-SA 4.0) के अंतर्गत उपयोग करने, बदलने और साझा करने के लिए निःशुल्क।