13. इस्‍त्राएला मऊंओं सा परमेश्‍वरा कि वाचा

इस्राएलिउर रख्‍ता समुन्‍दरंञ पांरीं लेईकर गई पिच़ंञ, परमेश्‍वर तेनोर बंणंञ भूईकर सीनै बोलने घऊ आरी लेई गिया। इ सेए घऊ थिया ज़ेटी मूसे त्रन्‍णां बोर्च़ा कइयाति। तेने तेसे घऊआ पाई एम्‍फा तम्बू ठेरिया।

परमेश्‍वरे मूसा ओ इस्राएला कि बदे मऊंओर बोलिया, “तुसोर हमेशा मेरे गप्‍पेयोर मनिबा असे होरेक ज़े वाचा हऊं तुसो सा बननूं तेसर बणंई थेईबा असे। अगर तुसे एरा करोले, त तुसे मेरा इनाम किमती धन, यहूदी पुजारी की राज्‍य, होरेक एक पवित्र जाति गणेंओले।”

परमेश्‍वरा द्वारे तेस कच़ा अइबे ओनि मऊंवी त्राई दियो च़ेक एम्फेयोंर छक्‍कन किया। च़े परमेश्‍वर सीनै घऊआ पूटी ओथा। ज़ेखेईं परमेश्‍वर आया त तेटी भुंयोल आया, बिजली च़ल्‍की, धूं भुआ, होरेक रणंशिञों की ज़ोरे च़ाला खनिया। च़े मूसा अपीं तेस घऊआ पुटि चढ़ि गिया।

च़े परमेश्‍वरे मऊंओ सा एक वाचा किया। परमेश्‍वरे बोलिया, “हऊं तुइफां परमेश्‍वर, यहोवा भोऊं। हऊं-ए भोऊं ज़ेनी तुसोर मिस्रा की परगर भुईबेंञ भइलि खनिया। केसोआ होरेक देऊ-आ की आराधना म करो।”

मूर्ति म बणांओ होरेक तेनो आराधना म करो, किसबोलि हऊं, यहोवा, तुइफां एक्‍के परमेश्‍वर भोऊं। मदम गप्‍पेयो ओनि मेरा नाऊं म लेओ। सब्‍ता ध्‍याड़ेर पवित्र मनिबे ओनि हीत थेओ। बोलिबे मतलब, छ: दी पूरा तुइफां बदे कम करो, अइत्‍वार तुईफां नह्च़ि करिबे ओ मूर हीत करिबे ध्याड़ा भो।”

“अपें या बा-ओ कि आदर करो। हत्‍या म करो। झ़केउंआं कम म करो। चोरी म करो। मेपें पड़ोसी कि घर्नि, तेसी घर, या तेसी कोसंञ भि समानर लेईबे हीट म थैओ।”

परमेश्‍वरे तेने मऊंओर ज़े नियमों दितोरे थिये तेने तेनो नियमोंर मनिबे ओनि राजि भुए। तेने सिर्फ परमेश्‍वरा मऊं भुईबे ओ सिर्फ तेसी आराधना करिबे ओनि राजि भुए।

परमेश्‍वरे इस्राएलिउर एक मोड्डा तम्‍बू बणंइबेर बोलिया ज़े मिलापा कि तंबू थिया। परमेश्‍वरे तेनोर हेरालि दिता की केरा बणंइबा असे, होरेक तेसी अण्‍डीं केनो चीजोर थेइबा असे। परमेश्‍वरे तेस तंबूर दूई पूरीउन बणंइबे ओनि एक डरोंआं मोड़ा पार्दा बणंइबोनि बोलिया। परमेश्‍वर तेस पार्दे कि पिच्‍छ़ी हारोरिंञ पूरीन अयल होरेक तेटी बेशल। ज़ेटी परमेश्‍वर थिया तेस पूरीन गइबे इजाज़त सिर्फ मोड़ा यहूदी पुजारिर थिया।

तेनो मऊंओर तेस मिलापा तम्‍बू समटे एक बेदीर बणइंब पड़ल। कऊं भि ज़े परमेश्‍वरा कि व्‍यवस्‍था कि आज्ञा न मनल से तेस वेदी पूटी एक जानवर लेई अयल। च़े पुजारी तेसर बलि करल होरेक वेदी पूटी परमेश्‍वरा ओनि बलि रूपन ज़ाल। परमेश्‍वरे बोलिया कि तेस जानवरा रत तेस मऊं कि पापर घटि बिज़ल। एरा ठो, हेबे परमेश्‍वर तेस पापर न हेरल। से मऊं परमेश्‍वरा नज़रीन “शुच्‍चा” गणेओल। परमेश्‍वरे मूसे भाई हारूनर होरेक हारूना वंशजोर अपां याजक भूईबे ओनि चुनिया।

च़े परमेश्‍वरे इने दश आज्ञा रूणांकि दूई पट्टी पूटी लिखीकर मूसे आरी दी बिदा। परमेश्‍वरे पालन करिबे ओनि मऊंओर केतेक्‍बा कानूनों दिता। अगर तेने इने बदे कानूनों भाषे किया त परमेश्‍वरे तेनोर आशीष दिबे ओ तेनोर बच़ई थैइबे कि वाईदा किया। पर परमेश्‍वरे बोलिया कि अगर तेने इनो गप्‍पेयो कि पालन न किया त परमेश्‍वर तेनोर सज़ा देल।

एस्‍सी ध्‍याड़े च़ेक, मूसा सीनै घऊआ पूटी ए बेठा। से परमेश्‍वरा सा गप्‍पा करना थिया। पर मऊं तेसर च़ोखि-च़ोखि छपि करि गे। तेरे तेने हारूना कच़ा सोना लेई आये होरेक तेसर एक मूर्ति बणइबे ओनि बोलिया ताकि तेने परमेश्‍वरा ठारि तेसी आराधना करि बटोरा लोई। एरा ठो, तेने परमेश्‍वरा विरोधन पाप किया।

हारूने बंगडे ठो एक सोने मूर्ति बणांया। तेने मऊंवीं तेस मुर्ति आराधना करिबा च़ुक्‍सी करि बिदा होरेक तेसर बलि चढ़ाया! तेनो पापा बजे परमेश्‍वर तेनो सा डरोंआ रोषुआति। परमेश्‍वर तेनोर नाश करि बिज़िबा चाहन्‍ना थिया। पर मूसे तेनोर न मारिबे ओनि परमेश्‍वरंञ प्रार्थना किया। परमेश्‍वरे तेसि शबस शुंईं तेनोर नाश न किया।

तेस पिच़ंञ मूसा सीनै घऊआ पूटींञ बुलिर ओथा। से रूणां की दुई पटि लेओरा थिया ज़ेस पूटी परमेश्‍वरे दश आज्ञा लिखोरे थिये। च़े तेनी तेस मूर्तिर कईया। से एतेक रोषेओरा थिया कि तेनी तेने दुई पटि त्रोई बुस-बुस करि बिदे।

च़े मूसे तेस मूर्तिर पींईं कर तेस बुर-बुर करि बिदा, होरेक तेसी से बुर-बुर किउरा तेसर पाईन मियंई तेसर तेनो मऊंओर पिलई बिदा। परमेश्‍वरे तेनो मऊंओं पूटी एक खरी बिदा होरेक तेनो बिच़ंञ केतेक्‍बा मऊं मरि गे।

ज़ेनो पटिउर मूसे त्रोई बिदाति तेनो ठारि मूसे दश आज्ञाओं कि खर्के पटिउर बणांया। च़े से फिरि घऊआ पूटी चढ़ि गिया होरेक प्रार्थना किया कि परमेश्‍वर तेनोर माफ करल। परमेश्‍वरे मूसे कि शुंईया होरेक तेनोर माफ किया। खर्के पटिउ पूटी दश अज्ञाओर लेई मूसा घउअंञ बुलिर ओथा। च़े परमेश्‍वरे सीनै घउअंञ दी वईदा किउरा देशा च़ेक इस्राएलिऊ कि अगुवाई किया।