14. बणां भटकिबा

इस्राएलिउर बदे कानूनों बतई पिच़ंञ परमेश्‍वरे सीनै घऊंअंञ बत हेरालिया। परमेश्‍वर तेनोर वाईदे देशन लेई गईबा चाहना थिया। इ देश कनान भि गणेओना थिया। परमेश्‍वर बदड़ा थम बणि तेनो अगरीं-अगरीं हणिंया, होरेक तेने तेस पिच़-पिच़े हणे।

परमेश्‍वरे अब्राहम, इसहाक ओ याकूबा सा वाईदा कियाति कि से वाईदा किउरा देश तेनो वंशजोर देल, पर इस मुके तेटि केतेक्‍बा जाति मऊं बेशने थिये। तेने कनानी गणेओने थिये। इने कनानी मऊं परमेश्‍वरा आराधना करने नोथे होरेक परमेश्‍वरा आज्ञा मन्‍ने नोथे। तेने हफ्‍सी की देउओ की आराधना करने थिये होरक मदम-मदम कमों करने थिये।

परमेश्‍वरे इस्राएलिउर बोलिया, “ज़ेखेईं तुसे तेस वाईदे कि देशन गाओले त तेटाकि बदे कनानिऊंञ छुटकारा लेई बिज़ो। तेनो सा म मिलो होरेक तेनो सा ब्‍या भि म करो। तुसोर तेनोकि बदे मूर्तिउर खतम करि बिज़िबा असे। अगर तुसे मेरा आज्ञा न मनोले त, च़े तुसे मेरे ठारि तेनो देउओ की आराधना करिब ठारेओले।”

ज़ेखेए इस्राएली कनान ठारि कच़ा अपरे, मूसे इस्राएला कि हर जातिञ एक-एक करि बारा मुषुल्‍डेओर चुनिया। तेनी तेनोर गइकर तेस देशाकी भेद लेईबे आज्ञा दिता कि हेरो से देश केरा असे। तेनोर तेनो कनानिऊ की भेद भि लेइबा थिया कि तेने तागतबर असुना या कमज़ोर असुन।

तेने बारा मुषुल्‍ड्ले पूरा कनान देशाकी दूई बी ध्‍याड़े च़ेक सफर करि पलाटुए। तेने मऊंओर बताया, “से देश उपजाऊ असे होरेक फसल भि मस्‍ह भोना!” पर दश भेदी लाई, “तेनो नगर डरोंआ मज़बूत असे होरेक तेने मऊं मोड्‍डे फुके असुन! अगर असे तेनो पूटी हमला करले त, अस्‍पीं पक्‍का यहर्ज़ि करि गऊंले होरेक तेने अस्‍प्‍योंर मारि बिज़ेले।”

तेरी-इ कालेब ओ यहोशू होरेक दुई भेदीए बोलिया, “इ छेच्‍छ़ैईं भो कि कनाना मऊं लम्‍मे ओ तागतवर असुन, पर अस्‍पीं ज़रुर तेनोर यहर्बि करि बटले! परमेश्‍वर हईंपा ओनि लड़ल।”

पर मऊंवीं कालेब ओ यहोशू कि न शुंईया। तेने मूसा ओ हारूना पूटी रोषुई बोलिया, “तुसे असोर एरा घाटे डरइबे ज़ोगा ठारि किस लेई आओरे असु? असोर मिस्रनए बेशिब ज़ोगा थिउरा भोसेक। अगर अस्‍पीं तेस देशन गऊंले त अस्‍पीं लड़ाईन मरि गऊंले, होरेक कनाना की मऊं हईंपीं घर्निउर-ओ मठेओर परगर बणंई बिज़ेले।” तेने मऊं तेनोर वापिस मिस्रारि लेईकर गइबे ओनि एक होरेक परधान चुनिबा चाहने थिये।

ज़ेखेईं तेने मऊंवी पूरा बोलिया त परमेश्‍वर डरोंआ रोषुई गिउरा थिया। परमेश्‍वरे मिलापा तम्‍बून अइकर बोलिया, “तुसे मेरा विरोधन लड़ाई किया, तेरे तुसो बदेओर इस जंगला भटकिब पड़ल। हर एक मऊं ज़े भि बी बरियोंञ या तेसिंञ मस्‍ह उमरा भोल तेटि मरि गाल होरेक कद्‍दी भि तेस देशन अंडुई नोटे ज़े हऊं तुसोर देनूं। सिर्फ कालेब ओ यहोशू तेटि अंडेओले।”

ज़ेखेईं मऊंवी परमेश्‍वरर एरा बोलिब शुंईया, त तेने दु:खी भुई गे किसबोलि तेने पाप किउरा थिया। तेरे तेने कनाना कि मऊंओ पूटी हमला करिबे फैंसला किया। मूसे तेनोर न गईबोनि चेतावनी दिता किसबोलि परमेश्‍वर तेनो सा न गाल, पर तेने तेसी न शुंईया।

परमेश्‍वर इस लड़ाईन तेनो सा न गियाति, तेरे कनानिऊ सा तेने यहर्ज़ि करि गे होरेक तेनो बिच़ंञ केतेक्‍बा ज़िऊंर मारि बिदा। धले इस्राएली मऊं कनान किंञ पलाटुए। अइना दुई बी बरि च़ेक, तेने जंगला इसो-ओसो भटकेले।

इस्राएलिऊ की जंगला भटकिबे दूई बी बरि पूरा, परमेश्‍वरे तेनो कि ज़रूरतोर पूरा किया। परमेश्‍वरे तेनोर स्‍वर्गंञ “मंण्‍णां” गणेयोना रोटि दिता। परमेश्‍वरे तेनोर मठे आकारा च़ई बिदे ताकि तेनोंञ खइबेर मांसा भूरा लोई। तेस मूके, परमेश्‍वरे तेनोकी डबूंओर बूटर च़ीरूइबेंञ बच़ई थैईया।

इटि च़ेक कि परमेश्‍वरे तेनोर पीबे ओनि चमत्‍कारा-सा घऊअंञ पाईं च़ेक खनिया। पर इसी बावजूद, इस्राएली मऊंवी परमेश्‍वर ओ मूसे विरोधन शिकायत किया होरेक कुंण-कुंण किया। तांबी, परमेश्‍वर विश्‍वासा ज़ोगा थिया। तेनी ज़े वाईदा किउरा थिया कि से अब्राहम, इसहाक, होरेक याकूबा वंशजो ओनि करल से परमेश्‍वरे किया।

एक मुके ज़ेखेंईं तेनो एटि पांईं नोथा, परमेश्‍वरे मूसेर बोलिया, “घऊआ सा गप्‍पा कर, होरेक तेटिंञ पांईं निसल।” पर मूसे घऊआ सा गप्‍पा न किया। इसी बजाए, तेनी लोऊई सा घऊअर दूई फेरा द्रल दिता। एरा करि तेनी परमेश्‍वरा निरादर किया। बदेओर पीबे ओनि घऊअंञ पांई त निसि आया, पर परमेश्‍वर मूसे सा रोषुआ। परमेश्‍वरे बोलिया, “किसबोलि तेईं एरा किया, तेरे तु वाईदा किउरे देशन अंडुई नोटे।”

ज़ेखेईं इस्राएली मऊं दूई बी बरि च़ेक बणंन भटकि मुकोरे थिये, तेखेईं ज़ेने परमेश्‍वरा विरोधन लड़ाई कियाति तेने बदे मरि गे। च़े परमेश्‍वर तेनोर फिरि तेस वाईदे देशा कच़ा लेई गिया। हेबे मूसा मस्‍ह बूउवी गिउरा थिया, तेरे परमेश्‍वरे मऊंओर अगुवाई करिबे ओनि तेसर साथि यहोशू चुनिया। परमेश्‍वरे मूसेंञ इ वाईदा भि किउरा थिया की एक झा से तेनो मऊंओं कच़ा मूसे घाटे एक परमेश्‍वरा तरफे बोलनेर बिज़ल।

च़े परमेश्‍वरे मूसेर एक घऊआ च़ोन्‍ज़े पूटी गईबे ओनि बोलिया ताकि तेनी वाईदे ठारिर हेरि बटोरा लोई। मूसे तेस वाईदे देशर कईया पर परमेश्‍वरे तेसर तेतन गइबे आज्ञा नेता। च़े मूसा मरि गिया, होरेक इस्राएली बीओ दश दी च़ेक शोक मनाया। यहोशू तेनोकि खर्का परधान बणिं गिया। यहोशू एक रूठू परधान थिया किसबोलि तेनी परमेश्‍वरा पुटि भरोसा किया होरेक तेसी गप्‍पेयोर मनिया।