15. वाईदे देश
पिच्छ़ों मुख्खा, हेबे से ध्याड़ा अई मुकोरा थिया कि इस्राएली मऊं वाइदे देश, कनानन गाले। तेस देशन यरीहो नाऊंआ की एक नगर थिया। तेसी सुरक्षा ओनि तेसी च़ोउरो कुणी पक्का ठो भित दितोरा थिया। यहोशूई तेस नगरी दूई भेदियोर बिदा। तेस नगरी राहाब नाउवां की एक झ़केवीं ज़लऊं बेशनिति। तेनी तेन दूई भेदियोर युंकाया, तेस पिच़ंञ तेनी तेनोर नगरींञ बच़ि निसिबे ओनि साथि किया। तेनी एरा तेरे किया किसबोलि से परमेश्वरा पुटि विश्वास करनिति। ज़ेस मुके इस्राएली मऊं यरीहोर नाश करले तेखेईं तेने राहाब होरेक तेसी टबरर बच़ईबे वाईदा कियाति।
इस्राएली मऊंओंर वाईदे की देशन गईबे ओनि यरदन नाऊंआ ने टपिबा थिया। परमेश्वरे यहोशूर बोलिया, “यहूदी पुजारीओर एगीं गईबे दे।” ज़ेखेईं यहूदी पुजारी यरदन नेईन एन्फां पईरि थैया त पांईं की च़लिबा रूकी गिया, ज़ेनी लेई इस्राएली मऊं नेईं पांरि शुक्का धर्ति पुटि गई बटोरा लोई।
ज़ेखैईं तेने मऊं यरदन ने टपि मुके त परमेश्वरे यहोशुर बोलिया कि यरीहो पूटी हमला करिबे ओनि छक्कन बेशो, हालांकि से नगर डरोंआ पक्का थिया। परमेश्वरे तेनो मऊंओर बोलिया कि तेनोकि यहूदी पुजारी होरेक सैनिकोर छ: दियो च़ेक तेस नगरी चोउरो फेरे किर्ज़ि करिबा असे। च़े यहूदी पुजारी ओ सैनिके तेरी-इ किया।
च़े छ़: दियो पिच़ंञ, इस्राएली तेस नगरी कि च़ोउरो फेरे सत फेरा कोरो लवई पिच़ंञ, यहूदी पुजारी रणशिंञ फुकिया होरेक सैनिके ज़ोरे हक खनिया।
च़े यरीहो कि च़ोउरो फेरे कि भित झ़ई गिया! ज़ेरा परमेश्वरे आज्ञा दिति इस्राएली नगरी कि हर चीज़र नाश करि बिदा। तेने सिर्फ राहाब ओ तेसी टबरर छोड़ि बिदा, ज़ेने इस्राएलिउ कि हिस्सा बणिं गेति। ज़ेखेंई कनानन बेशने होरेक मऊंवीं शुंईयां कि इस्राएली यरीहोर नाश करि बिदोरा असे त, तेने डरि गे कि इस्राएली तेनो पुटि भि हमला करेले।
परमेश्वरे इस्त्राएलिओर आज्ञा दितोरा थिया कि कनानन बेशनि कोसंञ भि जाति सा शांति सा मिलिबा नाईं। पर गिबोनियों नाऊंआ कि एक कनानी जाति यहोशू सा हफ्सी बिच़ारोरा थिया कि तेने कनान किंञ दूरा अयक ठारि बेशने ठो भोन। तेने यहोशू सा तेनो सा शांति सा मिलि बेशिबे ओनि शबस किया। यहोशू ओ होरेक इस्त्राएली परधानेए परमेश्वरंञ न पुच्छ़िया कि तेनोर खि करिब लोइना भो। इसि बजाए तेने गिबोनियों सा शांति सा मिलि गे।
त्राई दियो पिच़ंञ, इस्त्राएलिओर पता लगिया कि गिबोनी कनानने बेशने भोन। तेने रोषुए किसबोलि गिबोनी तेनोर धोखा दितोरा थिया। पर तेने तेनो सा शांति सा मिलि बेठे किसबोलि से परमेश्वरा समटे किउरा थिया। च़े मिन ध्याड़े पिच़ंञ, कनान बेशने एक अयक ज़ाति, एमोरियो कि रज्ज़े शुंईंया कि गिबोनिये इस्त्रालिओ सा शांति सा हतुई गेन, तेरे तेने अपुंण-पुंणा सैनिकोर एकु-कु करि एक मोड़ा सेना बणंई गिबोना पूटी हमला करि बिदा। गिबोनिये तेनोर साथि करिबे ओनि यहोशू कच़ा एक उज़ाब बिदा।
च़े यहोशुई इस्त्राएली सैनिकोर ठोक्कन किया होरेक गिबोनिओ कच़ा अपरिबे ओनि रात पूरा च़ले। दोतेंईं राति तेने एमोनियो कि सैनिकोर हैरान करि बिदा होरेक तेनो पूटी हमला करि बिदा।
तेस दिया परमेश्वर इस्रालिउ ओनि लड़िया। तेनी एमोरिओर डरई बिदा होरेक तेनी मोड़े-मोड़े शरू झ़वईकर मस्स ज़ेञ एमोरियोर मारि बिदा।
परमेश्वरे धुपर भि सर्गा एक ठारि थमई बिदा ताकि इस्रालिउर एस्सी ध्याड़ा हतेओरा लोई ताकि तेने एमोरिओर यहर्बि करि बटोरा लोई। तेस दिया, परमेश्वर इस्रालिउ ओनि डक्शी कियाति।
ज़ेखेईं परमेश्वर तेने सैनिकोर यहर्बि करि पिच़ंञ, केतेक्बा कनानी ज़ाति मऊं इस्रालिउ पुटी हमला करिबे ओनि ठोक्कन भोए। यहोशू ओ इस्राली हमला करि तेनोर नाश करि बिदा।
इनो लड़ाई पिच़ंञ, परमेश्वरे इस्राएला कि हर एक जातिर वाईदा किउरा देशन तेनो हिस्सा दिता। च़े परमेश्वरे इस्रालिउर तेनोकी बदे दायरे पूटी शांति दिवाया।
ज़ेखेईं यहोशू बूउवी गिया त तेनी इस्राएला कि बदे मऊंओर ठोक्कन भुई अयो बोलिया। च़े यहोशुई तेनो मऊंओर हीत किवाया कि तेने तेस वाचेर मनिबे वाइदा किउरा थिया ज़े परमेश्वरे तेनो सा सीनै घऊआ पूटी किउरा थिया। तेने मऊंवीं परमेश्वरा ओनि विश्वासा ज़ोगा बेशिबे होरेक तेसी कानूनाकि पालन करिबे वाईदा किया।
यहोशू पाठ 1-24 च़ेक एक बाइबला कथा
खुले लाइसेंस (CC BY-SA 4.0) के अंतर्गत उपयोग करने, बदलने और साझा करने के लिए निःशुल्क।