16. बच़ाना
यहोशू मरिबे पिच़ंञ इस्राएलिए परमेश्वरा कि आज्ञा न मनिया। तेने परमेश्वरा कि कानूनोर न मनिया, होरेक तेने तेस वाईदे देशंञ बच़ोरे कनानिउर भईलिर न खनिया। इस्रालिए एम्फां सच्च़ा परमेश्वर, यहोवार छोड़ि कनानिउ देउआ कि अराधना करिबा च़ुख्फि करि बिदा। इस्रालिउ कच़ा कोई रज्ज़ा नोथा, तेरे ज़े तेनोर ठीक च़ेयोना असे से तेने करने थिये।
परमेश्वरा कि हुकुम न मनिबे द्वारे इस्राएलिए रिवाज़ा शुरुआत किया ज़ेसर केत्तिया फेरा दोहरायाति। इ रिवाज़ एरा ठो च़लिया, मिन बरिउ च़ेक इस्राएली परमेश्वरा हुकुम मन्ने नोथे, च़े परमेश्वर तेनोर तेनो बईरिउ सा यहर्बि करिबे द्वारे सज़ा देना थिया। इने बईरि इस्राएलिउंञ तेनोकि चीज़ोर च़ोरी बिज़ने थिये, तेनोकि जायदातर नाश करि बिज़ने ठो थिये, होरेक तेनो बिच़ंञ मस्स ज़ियोंर मारि बिज़ने थिये। फिरि ज़ेखैंईं इस्राएलिउ कि बईरि तेनो पुटि केत्तिया बरिउ च़ेक अत्याचार करने थिये, तेस पिच़ंञ इस्राएली एम्फां पापंञ पश्चाताप करने थिये होरेक परमेश्वरंञ तेनोर बच़ईबे ओनि प्रार्थना करने थिये।
हर बार ज़ेखैंईं इस्राएली पश्चाताप करने थिये त परमेश्वर तेनोर बच़ाना थिया। से एक बच़ाने तेसी द्वारे एरा करना थिया। एक एरा घाटे मऊं ज़े तेनोकि बईरिउ कि खिलाफन लड़ना थिया होरेक तेनोर यहर्बि करि बिज़ना थिया। च़े देशन शान्ति भोना थिया होरेक से बच़ाना तेनो पुटि रुठू रीति सा शासन करना थिया। परमेश्वरे तेनो मऊंओर बच़ईबे ओनि केत्तिया ज़िञ बच़ानेओर बिदा। परमेश्वरे एरा फिरी तेखैईं किया ज़ेखैंईं तेनी मिद्यानियोर, ज़ेने कच़ा बईरि कि ज़ाति कि थिये, तेनोर इस्राएलिउर यहर्बि करिबे कि इज़ाज़त दिता।
मिद्यानिए सत बरिउ च़ेक इस्राएलिउ कि फसलर लूटिया। इस्राएली मऊं डरोंआ डरि गिउरे थिये, होरेक तेने कूअन युंकूई गाने थिये ताकि मिद्यानी तेनोर लोई बटोरा न लोई। आखिरकार, तेनोर बच़ईबे ओनि तेने परमेश्वरर हक दिता।
गिदोन नावां कि एक इस्राएली मुशुड्ला थिया। एक झा, से एक यूंकेउरा ठारि गेहूं ठुड़किला थिया ताकि मिद्यानी तेसर च़ोरी बटोरा न लोई। यहोवा कि स्वर्गदूते गिदोना कच़ा अईकर बोलिया, “हे ताग्ती सैनिका, परमेश्वर तु साथे असे। ग होरेक इस्राएलिउर मिद्यानिउंञ बच़ा।”
गिदोना कि बा ए मूर्तिउ समटे बलिदान करिबे ओनि एक वेदी बणांयाति, बदेओंञ मुहंडा परमेश्वरे गिदोनर तेस वेदीर त्रोईबे ओनि बोलिया, पर गिदोन मऊंओं सा डरना थिया, तेरे से रात भुईबे ओनि च़ोखिया। च़े तेनी तेस वेदिर त्रोई बुस-बुस करि बिदा। तेनी परमेश्वरा ओनि एक खर्का वेदिर बणांया होरेक तेस पुटि परमेश्वरा ओनि बलि चढ़ाया।
होर्दी दोतैंईं मऊंवी कया कि केन्या वेदिर त्रोईकर खण्णीं करि बिदोरा असे, तेरे तेने डरोंआं रोषुए। तेने गिदोनर मारि बिज़िबे ओनि तेसी घरे गे, पर गिदोना बाई लाई, “तुसे किस तुईंपे देउओ कि मदद करिबे कोशिश करनूं? अगर से देऊ भो त तेसर अपां बचाव अपींर करिब देओ!” किसबोलि तेनी एरा बोलिया तेरे मऊंवीं गिदोनर न मारिया।
च़े इस्राएलिउर लूटिबे ओनि मिद्यानी मऊं फिरि आये। तेने एतेक बदे ज़ेञ थिये कि तेनोर गिणिं भि बटिबे नोथा। गिदोने तेनो खिलाफन लड़िबे ओनि इस्राएलिउर साथे बुलाया। गिदोने परमेश्वरंञ दूई चिन्ह गेठा ताकि ई पक्का भुई गिउरा लोई कि परमेश्वर छ़ेच्च़ैंई कि तेसर इस्राएलर बच़ईबे ओनि बोलना असे।
मुहंडा चिन्हा ओनि, गिदोने पेरु कि उनर धरत्रि पुटि थेई परमेश्वरर बोलिया कि दोतैंईंक्वां ओसर सिर्फ पेरु कि तेस उना पुटि पड़ोरा लोई पर धरत्रि पुटि नूं। परमेश्वरे एरीई किया। होर्दी राति, तेनी परमेश्वरर बोलिया कि धरत अल्ला भूरा लोई पर पेरु उन शुक्का छ़ुटोरा लोई। परमेश्वरे एरा भि किया। इने दुई चिन्हो बजहे, गिदोने विश्वास किया कि परमेश्वर छ़ेच्चैईं चाहना कि तेनी इस्राएलिउर मिद्यानिउंञ बच़ाओरा लोई।
च़े गिदोने सैनिकोर अपीं कच़ा बुलाया होरेक बीओ बारा हजार मुषुड्ले आये। पर परमेश्वरे तेस्सा लाई कि इने मस्स ज़ेंञ असुन। च़े गिदोने तेनो बदेओर बीओ दुई हजार ज़िउर घरेआर पलाटेरि बिदा ज़ेने लड़ाईंञ डरने थिये। परमेश्वरे गिदोना सा लाइ कि इने मुषुड्ले एबैंईं भि मस्स ज़ेंञ थिये। तेरे गिदोने त्राई शऊ सैनिकोञ अलावा तेनो बदेओर बिज़ छ़इया।
तेस राति परमेश्वरे गिदोनर लाई, “मिद्यानिउ कि तम्बुन गईकर तेनोर गप्पा करिब शुंण। ज़ेखैंईं तु शुंणल कि तेने खि गप्पा करनेन त तु तेनो पुटि हमला करिबेंञ न डरल।” तेरे तेस राति, गिदोन बुन तेनोकी तम्बुन गिया होरेक तेनी एक मिद्यानी सैनिकर अपें साथिर गप्पा करिब शुंईयां ज़े तेनी सुंईंयेन काओरा थिया। तेस मुषुड्ले कि साथि लाई, “इस सुंईंये कि मतलब भो कि गिदोना सैना अस्पीं मिद्यानी सैनिकोर यहर्बि करि बिज़ल!” ज़ेखैंईं गिदोने इ शुंईंया त तेनी परमेश्वरा कि स्तुति किया।
च़े गिदोन अपें सैनोको कच़ा पलाटुआ होरेक तेनो बिंच़ञ हर एकीर रणशिंञ, एक ज़ना बांण, होरेक एक मशाल दिता। तेने तेस तम्बुर घेरि बिदा ज़ेटि मिद्यानी सैनिक डेश किउरे थिये। गिदोना कि त्राई शऊ सैनिके एम्फा मशाला बांड़ घटोरा थिया तेरे मिद्यानी मऊंवीं तेस मशाले कि प्रागेर कई नोटिया।
च़े गिदोना कि बदे सैनिके एम्फां भांणर साथे त्रोई कर अचानके मशालो कि अगिर प्रकट करि बिदा। तेने एम्फां रंणशिंञों फुकिया होरेक हल्ला किया, “यहोवा कि होरक गिदोना कि तलवार!”
परमेश्वरे मिद्यानिउर डरई बिदा, तेरे तेने एम्फेओर मारिब-कटिब ठारुए। तेरीइ, गिदोने उज़ाबुओर मस्स ज़ेंञ इस्राएलिउर मिद्यानियों कि पीछा करिबेर तेनोकी मदद करिबेर बुलईबेर बिदा। तेने तेनो बिच़ंञ मस्स ज़ियुंर मारि बिदा होरेक छ़ुटोरे तेनोकि पीछा करि तेनोर इस्राएल देशंञ भईलिर खनि बिदा। तेस दिया एक लाख, बी हजार मिद्यानी मरि गे। होरा करि परमेश्वरे इस्राईलर बच़ाया।
तेने मऊं गिदोनर एम्फां रज्ज़ा बणईबा चाहनेति, पर गिदोने तेनोर एरा करिब नेता, पर तेनी तेनोंञ ज़ेवरातो मञे ज़े तेनो बिच़ंञ हर एक मिद्यानिउंञ लूटि लेई गेति। तेने मऊंवीं डरोंआ मस्स सोना गिदोनर दिता।
च़े गिदोने तेस सोनेंञ एक खास डबूं बणांया ज़ेरा कि मोड़े यहूदी पुजारी लयोने थिये। पर मऊंवीं तेसी अराधना करिबा च़ुख्फि करि बिदा ज़ेरा कि से एक मूर्ति भो।
च़े परमेश्वरे फिरि इस्राएलर सज़ा दिता किसबोलि तेने मूर्ति कि अराधना कियाति। परमेश्वरे तेनोकि बईरिउर तेनोर यहर्बि करिब ज़ोगा बणांया। आखिरकार तेने फिरि परमेश्वरंञ मदद करिबे ओनि प्रार्थना किया, होरेक परमेश्वरे तेनो कच़ा तेनोर बच़इबे ओनि एक होरेक बच़ानेर बिदा। इए गप्पा केत्तिया फेरा भुआ, इस्राएली मऊं पाप करेले, परमेश्वर तेनोर सज़ा देल, तेने पश्चाताप करेले, होरेक परमेश्वर तेनोर बच़इबे ओनि केसोआरा बिज़ल। केत्तिया बरिउ च़ेक, परमेश्वरे मस्स ज़ेञ बच़ानेओर बिदा ज़ेने इस्रालिउर तेनोकी बईरिउंञ बच़ाया।
आखिरकार, तेने मउंवीं होरेक देशो कि ठो परमेश्वरंञ एम्फा ओनि एक रज्ज़े कि मांग किया। तेने एक एरा घाटेक रज्ज़ा चाहनेति ज़े लमा ओ ताग्ती भुरा लोई, होरेक ज़ेनि लड़ाईन तेनोकि अगुवाई करि बटोरा लोई। परमेश्वरर इ विनती पसंद नाया, पर तेनी तेनोर तेरीइ घाटे रज्ज़ा दिता ज़ेरा तेने गेश्नेति।
न्यायियों पाठ -1-3; 6-8; 1 शमूएल 1-10 च़ेक एक बाइबला कथा
खुले लाइसेंस (CC BY-SA 4.0) के अंतर्गत उपयोग करने, बदलने और साझा करने के लिए निःशुल्क।