17. दाऊदा सा परमेश्‍वरा वाचा

शाऊल इस्राएलिउ कि मुहड्क्‍वां रज्‍ज़ा थिया। से सलाटा-ओ लमा थिया, ज़ेरा तेने मऊं चाहने थिये हो तेरा। इस्राएला मुहड्क्‍वां राज-आ मुके शाऊल एक रुठू रज्‍ज़ा थिया। पर पिच़ंञ से एक मदम मऊं बणि गिया ज़ेनी परमेश्‍वरा गप्‍प्‍योर न मनिया, तेरे परमेश्‍वरे एक अयक मऊंर चुनिया ज़े एक झा तेसी ठारि रज्‍ज़ा बणल।

परमेश्‍वरे दाऊद नाऊंआ की एक छ़ोकरा मुषुल्‍लेर चुनिकर एक झा शाऊला ठारि रज्‍ज़ा भुइबे ओनि छक्‍कन करिबा च़ुक्‍फी किया। दाऊद बैतलहम नगरी कि पवाल थिया। केतिबा फेरा, दाऊदे शेर ओ भ्रबुर मारि बिदोरा थिया किसबोलि दाऊदा द्वारे पारिबे मुके तेसी बा-कि पेरुओ पूटी तेने हमला कियाति। दाऊद एक योंञीं-ओ धर्मी मऊं थिया। तेनी परमेश्‍वरा पूटी भरोसा किया होरेक तेसी गप्‍प्‍योर मनिया।

ज़ेखेई दाऊद एक छ़ोकरा मुषुल्‍ला थिया, तेनी लमा-ओ बिल्‍ड्ला गोलियता सा लड़ाई कियाति। गोलियत एक तकड़ा सैनिक थिया। से डरोंआ तागती ओ लगभग त्राई मीटर लमा थिया! पर परमेश्‍वरे गोलियतर मारिबे होरेक इस्राएलिर बच़इबेर दाऊदर साति कियाति। पर पिच़ंञ, दाऊदे इस्राएला की बइरिओ पूटी केतिबा फेरा डक्‍शी किया। दाऊद एक मोड़ा सैनिक बणिं गिया, होरेक तेनी केतिबा लड़ाइन इस्राएली सैनिको कि अगुवाई किया। मऊंए तेसीकी मस्‍स तारिफ किया।

मऊंवी दाऊदा सा एरा घाटे दा किया की शाऊल तेस सा ज़ेगदंञ करिब ठारुआ। शाऊल तेसर मारि बिज़िबा चाहना थिया, तेरे दाऊद तेस सा होरेक तेसी सैनिको सा युंकुइबे ओनि बणांरि नशि गिया। एक झा, ज़ेखेईं शाऊल ओ तेसी सैनिक दाऊदर लोण्‍णे थिये त शाऊल एक कू-अन उठि गिया। इ से-हे कू-उ थिया ज़ेतन दाऊद युंकेओरा थिया, पर शाऊले तेसर न कइया। दाऊद शाऊला पिच्‍छ़ीं तेसी कच्‍च़ा उठि गिया होरेक तेसी डबुंअंञ एक खण्‍णीं कटि लेईया। पिच़ंञ, ज़ेखेंई शाऊल तेस कूअंञ निथा त दाऊदे तेसर हक करि तेस प्रातोरे तेस डबूंअर हेरालिया। एरा ठो, शाऊले ज़ाई बिदा कि दाऊदे रज्‍ज़ा बणिंबे ओनि तेसर मारिबेंञ मना करि बिदोरा असे।

मिन ध्‍याड़े पिच़ंञ, शाऊल लड़ाइन मारि गिया, होरेक दाऊद इस्‍त्राएला रज्‍ज़ा बणिं गिया। से एक रुठू रज्‍ज़ा थिया, होरेक मऊंवी तेस सा दा थैइया। परमेश्‍वरे दाउदर आशीष दिता होरेक तेसर सफल बणांया। दाऊदे केतेक्‍बा लड़ाई लड़े, होरेक परमेश्‍वरे इस्‍त्राएला की बइरिओर यह्र्र्बि करिबे ओनि तेसर साति किया। दाऊदे यरुशलेम नगरीर डक्‍शी करीकर अपां राजधानी बणांया, ज़ेटि से बेठा ओ राज किया। दाऊद दूवी बी बरि च़ेक रज्‍ज़ा बणि बेठा। इस मुके, इस्‍त्राएल तागती-ओ धनवान बणिं गिया।

दाऊद एक मंदर बणंइबा चाहना थिया ज़ेटि बदे ज़ेंञ इस्राएली परमेश्‍वरा की अराधना करि बटोरा लोई होरेक परमेश्‍वरा ओनि बलिदान करि बटोरा लोई। लगभग च़ोउर शऊ बरिओंञ, तेने मऊं मूसे बणांओरा मिलापा तम्‍बुन परमेश्‍वरा अराधना करने थिये होरेक तेसी ओनि बलिदान चढ़ाने थिये।

पर तेटि नातान नाऊंआ की एक परमेश्वरा तरफे बोलना मऊं थिया। परमेश्‍वरे तेसर दाऊदारि इ बोलिबे ओनि बिदा, “तेपें केतेक्‍बा मस्‍ह लड़ाई लड़ोरे असुन, तेरे तपीं मेरा ओनि मंदर न बणांल। तेरा कोआ इसर बणांल। तां-भि, हऊं तपींर मस्‍ह आशीष देऊं। तेपां एक वंश हमेशा कि ओनि मेरे मऊंओं पूटी रज्‍ज़े रुपन राज करल।” हमेशा कि ओनि राज करना से दाऊदाकी एक्‍के वंशज मसीह थिया। मसीह परमेश्‍वरा की चुनोरा मऊं थिया ज़े संसारा कि मऊंओर तेनो पापंञ बच़ाल।

ज़ेखेईं दाऊदे नाताना कि संदेशर शुंईया त तेनी परमेश्‍वरर शबस किया होरेक तेसी महिमा किया। परमेश्‍वर तेसी इज्‍ज़तर बढ़ानाति होरेक तेसर मस्‍ह आशीष देनाति। बेशक, दाऊद न ज़ाण्‍णाति कि परमेश्‍वर इनो गप्‍प्‍योर केखेंई करल। इस मुके असे ज़ाऊं कि इस्राएलिउर केतेक्‍बा मुके च़ेक, लगभग एक हजार बर्षा च़ेक मसीह कि अइबेर च़ोखिब लगल।

दाऊदे केतिबा बर्षा च़ेक न्‍याया सा अपें मऊंओं पूटी राज किया। तेनी बड़ा आज्ञा साथे परमेश्‍वरा कि गप्‍प्‍योर मनिया होरेक परमेश्‍वरे तेसर आशीषित किया। हालांकि, अपें ज़िन्‍दगी की अंता मुके तेनी परमेश्‍वरा कि विरोधन भयानक पाप किउरा थिया।

एक झा दाऊदे अपें मेहलंञ भइलिर हेरिब होरेक एक सलाटि ज़लऊंर धोउइब कइया। से तेसर न प्रयांणाति, पर तेसर पता लगि गिया कि तेसी नाऊं बेतशेबा थिया।

अइकियार फिरिबे ठारि, दाऊदे तेसर अपीं कच़ा अणिंबे ओनि केसोआरा बिदा। तेनि तेस सा डेश करि तेसर घरेआर बिज़ छ़ईया। मिन ध्‍याड़े पिच़ंञ बेतशेबे इ बोलिकर दाऊदा कच़ा उज़ाब बिदा कि से पेटाली असे।

बतशेबे घ्याता नाऊं उरिय्‍याह थिया। से दाऊदा की रुठ सैनिको बिच़ंञ थिया। इस मुके से लड़ाई लड़िबे ओनि भइरीं गिउरा थिया। दाऊदे उरिय्‍याहर लड़ाईंञ अइ बोलिकर तेसर अपीं घर्नि सा बेशिबे ओनि बोलिया। पर होरेक ठो सैनिक लड़ाइन थिये तेरे उरिय्‍याहे घरेयारि घइबेंञ ठलि बिदा। च़े दाउदे उरिय्‍याहर लड़ाइन बिज़ छ़इया होरेक दाउदे मोड़े सैनिको अधिकारी उरिय्‍याहर एरा घाटे ठारि बिज़िबेर बोलिया ज़ेटि बइरि बदेओंञ जादा ताग्‍ती भूरे लोई ताकि से मरि गिउरा लोई। च़े एरा भुआ कि उरिय्‍याह लड़ाइन मरि गिया।

उरिय्‍याह कि लड़ाइन मरि गई पिच़ंञ दाऊदे बेतशेबा सा ब्‍या करि बिदा। पिच़ंञ, तेनी दाऊदा कि कोएर जनम दिता। दाऊदे ज़े कियाति तेस बजेहे परमेश्‍वर तेस पूटी डरोंआ रोषेओरा थिया, तेरे परमेश्‍वरे नातान परमेश्‍वरा तरफे गप्‍पा करनेर दाऊदर इ बतइबे ओनि बिदा कि तेसी पाप केतेक मदम थिया। दाऊदे अपें पापाकि पश्‍चाताप किया होरेक परमेश्‍वरे तेसर माफ करि बिदा। अपां छ़ुटोरा जीवनन, अपां खरी मुके दाऊद परमेश्‍वरा पिच़-पिच़े च़लिया होरेक तेसी गप्‍प्‍योर मनिया।

पर दाऊदा बई मरि गिया। एरा करि परमेश्‍वरे दाऊदर सज़ा दिता। इसिंञ अलावा, दाऊदा मरने च़ेक, तेसी परिवारा की मिन मऊंवीं तेसी विरोधन लड़ाई किया, होरेक दाऊदा की अपां शक्‍ति थोड़ुई गिउरा थिया। पर परमेश्‍वर विश्‍वासाज़ोगा थिया होरेक एबेंईं भि परमेश्‍वरे से-हे किया ज़े दाऊदा सा वाइदा किउरा थिया कि से करल, हालांकि दाऊदे परमेश्‍वरा की आज्ञा न मनियाति। पिच़ंञ, दाऊद-ओ बतशेबा कि अयक बई भुआ, होरेक तेने तेसी नाऊं सुलैमान थैइया।