3. डढ़ा कि अईबा
एस्सी मुके पिच़ंञ, संसारन एस्सी मऊं बेशने थिये। तेने मस्स मदम-ओ झ़गड़ालू भुई गिउरे थिये। इ बदे एतेक मदम थिया कि परमेश्वरे इ आखरी फैसला लेईया कि इस पूरे संसारर डढ़ा-सा नाश करि बिज़ू।
पर परमेश्वर नूह-सा खुश थिया। से एक धर्मी मऊं थिया, ज़े मदम मऊंओ बिच़ा बेशना थिया। परमेश्वरे नूहर बताया कि हऊं एक मोड्डा डढ़ अणिंब तियार असु। इ बजे, परमेश्वरे नूहर एक मोड्डा पाईं कि झाज बणइंबे ओनि बोलिया।
परमेश्वरे नूहर मोड्डा पाईं कि झाज़र बणंईंबे ओनि बोलिया, ज़े लगभग शऊआ पुटि दुई बी मीटर लमा, बीओ त्राई मीटर बिल्ड्ला होरेक सढ़े तेराह मीटर उथा भोल। नूहे तेस मोड्डे पाईं कि झाज़र कठोआ सा बणंईबे थिया होरेक तेतन त्राई मंज़िला, केतिया पूरी, एक छपरा होरेक एक उंञूं बणंईबे थिया। से मोड्डा झाज़ नूह, तेसी परिवार, होरेक धरत्री पुटि पाठि-पाठि जानवरोर डढ़ंञ बच़ई थेली।
नूहे परमेश्वरा आज्ञा मनिया। तेनी ओ तेसी त्राई कोए तेरी घाटे मोड्डा पाईं कि झाज़ बणांया ज़ेरा परमेश्वरे तेनोर बताओरा थिया। किसबोलि से झाज़ डरोआं मोड़ा थिया तेरे तेस बणइंबेर तेसर केतिया बरि लगिया। नूहे मऊंओर डढ़ अइब पाठि चेतावनी दिता होरेक तेनोर परमेश्वरारि पलाटुईबे ओनि बोलिया, पर तेने तेस पुटि विश्वास न किया।
परमेश्वरे नूह होरेक तेसी टबरो ओनि-ओ जानवरो ओनि अन्न ठोक्कन करिबेर बी बोलिया। ज़ेखैईं बदे दिर तियार थिया, च़े परमेश्वरे नूहर बोलिया कि इ मोक्का तेसी, तेसी घर्नि कि, तेसी त्राई कोओ होरेक तेनो घर्निऊर मियंइकर अठ ज़ेईंयों मोड्डे पाईं कि झाज़ा पुटि गईबे कि थिया।
परमेश्वरे पाठि-पाठि जानवरोर होरेक च़ई-च़करू-ओ कि ज़लऊं-मुषुड्लेर नूह कच़ा बिदा ताकि तेने मोड्डे पाईं कि झाज़न गई बटोरे लोई होरेक डढ़-आ मुके सही-सलामत बच़ोरे लोई। परमेश्वरे एरा पाठि–पाठि जानवरो कि सत मुषुड्ले होरेक सत ज़लऊंओर बिदा ज़ेनोर बलि च़ढ़इबोनि इस्तेमाल करि बटोरा लोई। ज़ेखेए तेने बदे मोड्डे पाईं कि झाज़न अपरे त अपीं परमेश्वरे मोड्डे पाईं कि झाज़ा कि द्वारर बंद करि बिदा।
च़े सन्दा अइबा च़ुक्सी किया, सन्दा भुइला किया, भुईला किया। रूकिब मेतेंई दुई बी ध्याड़े च़ेक रात-दीन सन्दा भुइला किया। धत्रि अण्डीं किंञ पांईं निसिब ठारुआ। पूरा संसारा कि हर चीज़ इटि च़ेक कि उथे-उथे घऊओ च़ेक पांईंन डुबि गे।
शुक्का धत्रि पुटि बेशने हर चीज़ मरि गे, पर ज़ेने मऊं होरेक जानवरो मोड्डे पाईं कि झाज़न थिये तेने बच़ि गे। से मोड्डा पाईं कि मोड्डा झाज़ पाईं पुटि तारि दीला छ़ुटा होरेक मोड्डे पाईं कि झाज़ा अण्डी हर चीज़र डुबिबेंञ बच़ई थेइया।
संदा अइदा बंदुई पिच़ंञ, पन मां च़ेक मोड्डा पाईं कि झाज़ पाईं पुटि तारी दिला बेठा, होरेक तेस मुके पाईं थोड़ुईब ठारूआ। च़े एक झा से मोड्डा पाईं कि झाज़ घऊ-आ पुटि टिकिया, पर धरत अयता भि पाईं सा भरेओरा थिया। त्राई मां-ओ पिच़ंञ, घऊआ मुखो कविब ठारूए।
च़े दुई-बी ध्याड़े पिच़ंञ, नूहे एक काउअर इ हेरिबेर भइलिर बिदा कि खि पाईं शुकि गिउरा थिया-आ या नोथा। से काऊ शुक्का धर्त लोईबे ओनि इसो-ओसो फंज़ी करला छ़ुठा, पर तेसर शुक्का ठार नाथुआ।
च़े तेस पिच़ंञ नूहे एक घुघुटिर भइलिर बिदा। पर तेसर भि शुक्का धर्त नाथुआ, तेरे से नूह कच़ा पलाटुई गेई। एक हप्ते पिचंञ तेनी तेस घुघुटिर फिरि बिदा, च़े से अपें शुंटा मुख जैतून-आ कि लप लेई पलाटुई। पाईं थोड़ेओनाति, ओइरी फिरि उब्ज़िब लगोरे थिये।
नूह-ए एक हफ्ता च़ेक च़ोखिकर दुई हफ्ते पिच़ंञ तेस घुघुटिर भइलि बिदा। इसंञ फेरा, तेसर बेशिबे ठार हतुई गिया च़े से न पलाटुई। पाईं शुकनाति।
दुई माओ पिच़ंञ परमेश्वरे नूहर लाई, “हेबे तेरा-ओ तेरा टबर होरेक बदे जानबरो मोड्डे पाईं कि झाज़ंञ भइलि निसि अयो। मस्स ज़ेंञ ओलादो होरेक पोत्रे - पड़पोत्रे जाओ होरेक पृथ्वीन भरूई गाओ।” च़े नूह-ओ तेसि टबर मोड्डे पाईं कि झाज़ंञ भइलि निसि आये।
नूह-आकि भइरीं निसि अई पिच़ंञ, तेनी एक बेदी बणांया होरेक बलि ओनि इस्तेमाल करि बटिबे ठो पाठि-पाठि जानवरो बिच़ंञ मिन ज़ेयुंर बलि चढ़ाया। परमेश्वर तेस बलिंञ खुश भुआ होरेक नूहो तेसी टबरोर आशीष दिता।
परमेश्वरे बोलिया, “हऊं वायदा करनूं कि मऊंआं द्वारे किउरे मदम कमों कि बजे हऊं फिरि कदी धत्रि पुटि श्राप न देऊं या डढ़ा सा धत्रिर नाश न करू, हालांकि मऊं मठेन्ज़ेंञ दिए पापी भोन।
च़े परमेश्वरे अपां किउरा वायदे कि चिन्हा रुपन पहला इन्द्रधनुषर बणांया। ज़ेखेंईं भि सर्गा इन्द्रधनुष कइना, च़े परमेश्वर हीत करल कि तेनी खि वायदा किऊरा असे होरेक तेरी तेसी मऊं भि हीत करेले।
उत्पत्ति पाठ 6-8 च़ेक एक बाइबला कथा
खुले लाइसेंस (CC BY-SA 4.0) के अंतर्गत उपयोग करने, बदलने और साझा करने के लिए निःशुल्क।