5. वायदे कोआ

अब्राम ओ सारै कि कनान देशा अपरिबे कि दश बरिऊ पिच़ंञ, एबेंईं च़ेक भि तेनोंञ मठे नोथे। तेरे, अब्रामा घर्नि सारै तेसर बोलिया, “परमेश्‍वरे मूर एबेईं च़ेक मठे भुईब ज़ोगा किउरा नाई होरेक हेबे हऊं बई ज़मईबे ओनि बुवि गिउरि असु, हेरो, मेरि परगर हाजिरा इटि असे। तेस्सा भि ब्‍याह करि बिज़ कि तेनी मेरा ओनि बई जई बटोरा लोई।”

च़े अब्रामे हाजिरे सा ब्‍या करि बिदा। हाजिरेर एक बई भुआ, होरेक अब्रामे तेसि नाऊं इश्‍माएल थैईया। पर सारै हाजिरे सा जेगदंञ करिब ठारूई। ज़ेखेंईं इश्‍माएल तेरहा बरिऊ कि थिआ, परमेश्‍वरे फिरि अब्राम सा गप्‍पा किया।

परमेश्‍वरे बोलिया, “हऊं बदेओंञ मोड़ा परमेश्‍वर भोऊं। हऊं तू सा एक वाचा करू।” च़े अब्रामे फ्‍यक्‍स किया। परमेश्‍वरे अब्रामर इ भि बोलिया, “तु केतेक्‍बा जातिऊ कि बा भोल। हऊं तूर ओ तेरे बंशजोर तेनो एम्‍फां भुईबे ओनि कनान देशाकि जिमि दी बिज़ू होरेक हऊं हमेशा कि ओनि तेनो परमेश्‍वर भोऊं। तूर तेपें घराने कि बदे मुषुड्लेओ कि खतना करिब पड़ल।”

“तेरि घर्न सारै एक कोआ जालि से वाईदे कोआ भोल। तेसी नाऊं इसहाक थेओ। हऊं तेस्‍सा मेपां वाचा बणईं थेऊं होरेक से एक मोड्डा जाति बणिं गाल। हऊं इश्‍माएलर भि एक मोड्डा जाति बणऊं, पर मेरा वाचा इसहाका सा भोल।” च़े परमेश्‍वरे अब्राम नाऊं लेख्‍फी करि अब्राहम करि बिदा, ज़ेसी मतलब भो “मस्‍ह ज़िऊं कि बा”। परमेश्‍वरे सारै नाऊं लेख्‍फी करि सारा करि बिदा ज़ेसी मतलब भो “बदेओ या”।

तेस ध्‍याड़ेन अब्राहमे अपें घरे कि बदे मुषुड्लेओ कि खतना किया। लगभग एक बरी पिच़ंञ, ज़ेखैईं अब्राहम शऊ बरिऊ कि थिया होरेक सारा च़ोउर बीओ दश बरिओ थी, तेखेंए सारे अब्राहमा कोएर जाया। ज़ेरा परमेश्‍वरे तेनोर बोलोरा थिया तेने तेसी नाऊं इसहाक थैइया।

ज़ेखेंईं इसहाक छ़ोकरा भुआ त परमेश्‍वरे इ बोलिकर अब्राहमा विश्‍वासाकि परीक्षा किया, “तेपें एकलौते कोएर लेई, होरेक तेसर मेरा ओनि बलि रूपन मारि बिज़।” फिरि अब्राहमे परमेश्‍वरा गप्‍पा मनिया होरेक अपें कोएर बलि दीबे ओनि छक्‍कन किया।

ज़ेखेंई अब्राहम ओ इसहाक बलि चढ़इबे ठारियार गइला थिये तेखेंई इसहाके पुछ़िया, “हे बा, अस्‍प्‍यों कच़ा बलि चढ़इबे ओनि कठो त असुन, पर बलि करिबे ओनि छेड्ल्‍लू कोटि असे?” अब्राहमे जुवाब दिता, “हे मेरा कोआ, परमेश्‍वर बलि चढ़इबे ओनि छेड्ल्‍लू इन्‍तज़ाम करि बिज़ल।”

ज़ेखेंईं तेने बलि चढ़इबे ठारि अपरि गे, च़े अब्राहमे इसहाकर बनि कर वेदी ठारि लेटई बिदा। से अपें कोएर मारिब तैयार थिया कि परमेश्‍वरे बोलिया, “च़ोख! कोएर नुक्‍सान म अपरा! हेबे मेंईं ज़ाईं बिदा कि तु मूं सा डरना किसबोलि तेंईं मेपें एकलौते कोएर भि मूंञ बच़ई न थैइया।”

कच़ा ज़ेंञ अब्राहमे एक पेरूर कईया ज़े बोर्चेओ बिच़ा शतोरा थिया। इसहाका ठारि बलि ओनि परमेश्‍वरे पेरु कि इन्‍तज़ाम कियाति। अब्राहमे तुषिकर पेरूर बलि चढ़ई बिदा।

च़े परमेश्‍वरे अब्राहमर बोलिया, “किसबोलि तु मेरा ओनि बदे दिर दिबे हीट लेओरा थिया, तेपें एकलौते कोएर भि, तेरे हऊं तूर आशीष दीबे वाइदा करनूं। तेरे वंशजो सर्गा तारेओंञ भि जादा भोले। किसबोलि तैंईं मेरा भाषे किउरा असे तेरे हऊं तेरे परिवारा द्वारे संसारा बदे कुलोर आशीष देऊं।”