7. परमेश्‍वर याकूबर आशीष देना असे

ज़ेखेए तेने मठे मोड़े भूई गे त याकूबर घरे बेशिबा रूठ च़ेवा, पर एसावर बणां जीवोर मारिबा रूठ च़ेवा। रिबके याकूबा सा दा थैया, पर इसहाके एसावा सा दा थैया।

एक झा, ज़ेखेए एसाव शिकार करि पलाटुआ त से मस्‍स भूकरे थिया। एसावे याकूबा सा बोलिया, “ज़े तेपें बणांउरा असे तेटिंञ अईदेक ज़ेंञ बगत मूर देओ।” याकूबे जुवाब दिता, “मुहंडा ई वाईदा कर कि ज़ेठा कोआ भूईबे बजहंञ हर एक चीज ज़े तपींर हतेओना, तेने बदे तपीं मूर देल।” इकरी एसावे तेने बदे चीजोर याकूबर दीबे वाईदा करि बिदा। च़ा याकूबे तेसर बगत दिता।

इसहाक एसावर आशीष दीवा चाहन्‍नाति। पर इसि अगरंञ कि तेनी ऐरा किया, रिबका ओ याकूबे, याकूबा कका एसाव बणिंकर अपें बा सञींर धोखा दिता। इसहाक बूआ थिया होरेक हेबे हेरि नोटना थिया। तेरे याकूबे एसावा डबूं लवा होरेक छेड्ल्‍लु खलर अपें मूथू ओ हथा जिल्‍बी करि बिदा।

याकूब इसहाका कच़ा आया होरेक बोलिया, “हऊं एसाव भोऊं। हऊं तेरे आओरा भोऊं ताकि तु मूर आशीष दे।” ज़ेखेंए इसहाके छेड्ल्‍लु खलर बुदा-होरेक डबूंओर शिञिंया, त तेनी च़ेता कि से एसाव भो होरेक तेसर आशीष दिता।

एसावे याकूबा सा जेगदंञ किया किसबोलि याकूबे तेसी ज़ेठा कोए की अधिकारर होरेक साथे तेसी आशीषोर भि च़ोरी बिदाति। तेरे तेनी तेनो बा कि मरिबे पिच़ंञ याकूबर मारी बिज़िबे कि योजना बणांया।

पर रिबके एसावा की योजनेर शुंईं बिदा। तेरे तेनी होरेक इसहाके याकूबर तेसी नातियो सा बेशिबे ओनि मस्‍स दूरेआर बिज़ छ़ईया।

याकूब केतेक्‍बा बरियो च़ेक रिबके नातियो सा बेठा। तेस्‍से मुकेंञ तेनी ब्‍याह किया होरेक बारा कोओर होरेक एक कुईर जाया। परमेश्‍वरे तेसर डरूवां सउखार बणंईं बिदा।

बी बरियो च़ेक कनान देशन अपें घरेंञ दूरे बेशि पिच़ंञ, याकूब अपें टबर, अपें परगरो, होरेक अपें जानवरो की बदे छुंडो सा तेसोरी पलाटुआ।

याकूब तेरे मस्‍स डरोरा थिया किसबोलि तेनी च़ेता कि एसाव एबैईं भि तेसर मारि बिज़िबा चाहना थिया। तेरे तेनी तक्‍सा रूपन जानवरो की छुंडोर एसावा कच़ा बिदा। ज़ेने परगर तेने छुंडोर लेईकर गेति तेने बोलिया, “तेरा परगर याकूब, इने जानवरोर तूर देना। से यूरनाए अइला असे।”

पर एसाव हेबे याकूबा कि नुक्‍सान न चाहनाति। इसी मुहन्दे, से तेसर एक फेरा फिरी हेरिकर मस्‍स तुठोरा थिया। तेस पिच़ंञ याकूब कनान देशन रूठू करि बेठा। च़ा इसहाक मरि गिया होरेक याकूबोर एसावे तेसर पथि बिदा। ज़े वाचे कि वाईदा परमेश्‍वरे अब्राहमा सा कियाति तेने हेबे इसहाकंञ याकूबा पूटि अई गिउरा थिया।