8. परमेश्वर यूसुफओ तेसी टबरर बच़ाना असे
केतिबा बरियो पिच़ंञ, ज़ेखेए याकूब बूआ भुई गिउरा थिया, च़ा तेनी अपें दईला कोआ यूसुफर तेसी भाईयो कि जांच करिबोनी बिदा ज़े जानवरो की छुंडो देखभाल करनेति।
यूसुफा भाईठो तेस्सा मस्स जेग्दंञ करने थिए किसबोलि तेनो बा तेस्सा मस्स दा करना थिया होरेक तेरे भि कि यूसुफे सूईंया हैरियाति कि से तेनो शासक भूई गाल। ज़ेखेए यूसुफ अपें भाईऊ कच़ा आया त तेने तेसर कैदी बणईं बिदा होरेक तेसर परगरो की सौदा करने तेनोर बिक्रीं बिदा।
घरे पलाटुइबे अगरंञ यूसुफा भाईए यूसुफा डबूंअर च़ीरीकर बकरी रतन सेलई बिदा। फिरि तेने से डबूं अपें बार हैरालिया ताकि से इ च़ेअल कि खि बणां जानवरे यूसूफर मारि बिदोरा असे। याकूब मस्स दु:खी थिया।
परगरो सौदा करने तेने मऊंवी यूसुफर मिस्र देशारि लेई गे। नील नेई मुक्खीं बसोरा मिस्र एक मोड़ाओर तागतवर देश थिया। तेने परगरो की सौदा करने तेने यूसुफर एक सउकार सरकारी अधिकारिर परगरा रूपन बिक्रीं बिदा। यूसुफे अपें मालिका की रूठेआशी सेवा किया, होरेक परमेश्वरे यूसुफर आशीष दिता।
तेसी मालिका घर्नीं यूसुफा सा ज़बरज़स्ती करिबे कोशिश किया, पर यूसुफे एरा ठो परमेश्वरा विरोधन पाप करिबेंञ मुकरि गिया। से रोशुई गेई होरेक यूसुफा पूटि हफ्सी कि इल्ज़ाम लवई बिदा, तेरे तेसर प्रई कर कैदन बिज़ छ़ईया। इटि च़ेक की कैदन भि, यूसुफ परमेश्वरा ओनि सच्च़ा बेठा, होरेक परमेश्वरे तेसर आशीष दिता।
दूई बरियो पिच़ंञ, यूसुफ निर्दोष भूई भि कैदन थिया, एक राती, फिरौन, ज़ेरा कि मिस्रा मऊं अपें रज़्ज़ेर हक देने थिये, फिरौने दूई सुंइयां हैरिया ज़ेनि लेई से मस्स च़िनि गिया। तेसी केन्नी भि सलाहकारे तेसर तेने सुंइयों कि मतलब बतई नोटिया।
परमेश्वरे यूसुफर सुंईयें मतलब बतईबे तागत दितोरा थिया, तेरे फिरौने यूसुफर जेलखानेंञ अपीं कच़ा बुलाया। यूसुफे तेसर तेने सुंये मतलब बताया होरेक बोलिया, “मिस्र देशन परमेँश्वर मस्स फसलो कि सत बरियो पिच़ंञ अकाला की सत बरी बिज़िब तियार असे।”
फिरौनर यूसुफंञ एतेक असर भुआ कि तेनी तेसर मिस्र देशा कि अयक बदेओंञ तागतवर मऊं ठहरई बिदा।
यूसुफे मऊंओंञ रूठू फसलों की सत बरियो दौरान मस्स बगतर ठोक्कन करिबेओनि बोलिया। ज़ेखेए सत बरियो अकाल आया तेखेए यूसुफे मऊंओर से बगत बिक्रिंयां ताकि तेनोर खईबोनि पूरेओरा लोई।
से अकाल मिस्र देशन ज़ेत्ती नोथा, पर कनान देशन भि डरईब ज़ोगा थिया ज़ेटी याकूबोर तेसी टबर बेशने थिये।
तेरे याकूबे अपें बदेओंञ ज़ेठे मठेओर बगत लेईबोनि बिदा। ज़ेखेए तेने बगत लेईबोनि यूसुफा समटे खा भुए त तेने भाई-ई यूसुफर न प्रांया। पर यूसुफे तेनोर प्रयांई बिदा।
इ पता करिबोनि कि खि तेने बदली गेना तेनोर परखी पिच़ंञ, यूसुफे तेनोसा बोलिया, “हऊं तुइपां भाई यूसुफ भोऊं! डरो माओ। ज़ेखेए तुप्सें मूर परगरा रूपन बिक्रीं बिदाति त तुप्से मदम करिबे कि च़ेताति, पर परमेश्वरे तेस मदमर भलाई करिबेओनि इस्तेमाल किया! अयोहोर मिस्र देशन बेशो ताकि हऊं तुइपां होरेक तुइफे टबरोओनि बगता इंतज़ाम करि बटू।”
ज़ेखेए यूसुफा भाई-ई घरेआरी पलाटुए होरेक अपें बा याकूबर बताया की यूसुफ एबैईं भि ज़ीना असे त से मस्स तुषि गिया।
हालांकि याकूब एक बूआ मऊं थिया तांबी से अपें टंडे – टबरो सा मिस्र देशारि उठि गिया, होरेक तेने तेटी बसि गे। याकूबा मरिबे अगरंञ, तेनी अपें एकिकी मठेओर आशीष दिता।
वाचे कि वाईदा ज़े परमेश्वरे अब्राहमा सा कियाति से इसहाका पुटि होरेक तेस पिच़ंञ याकूबोर, तेस पिच़ंञ तेसी बारा कोओर होरेक तेनोकि टबरो पुटि अई गिउरा थिया। तेने बारा मठेओ औलाद इस्राएला की बारा ज़ात बणिं गे।
उत्पति पाठ 37-50 एक बाइबला कथा
खुले लाइसेंस (CC BY-SA 4.0) के अंतर्गत उपयोग करने, बदलने और साझा करने के लिए निःशुल्क।