10. गेल सिनीनौर

परमेश्वर नी मूसा एठा हारून के चेतावनी जीके कि फिरौन गा मेरान ओले मेटे दिकुनी मंडीके, “इस्राएल गा परमेश्वर इनी मंडीवा होय, “इंजा कुरकू के सेन डाए।” पेनो फिरौन नी दिकुगा बान आजुमडुका एठा इस्राएलकु के सेने गा घल्जी आरा गा बेदला डीचनी दिकुके कठीन मेहनत दडा गा घल्जी मजबूर केकु।

फिरौन डी कुरकू के सेन ड़ाए टे टाऊलगी बान मेन लक्केका, इनिघल्जी परमेश्वर नी मिस्र लिंजेन गेल भयानक सिनीनौर कुल्के। इनी सिनीनौर गा द्वारा, परमेश्वर नी फिरौन के टिपीके कि डीच फिरौन एठा मिस्र गा गोमेचकु टे एठाभी शक्तिशाली होय।

परमेश्वर नी नील गडा के पचना गेन बदलाके, पेनो फिरौन नी आएभी इस्राएली कुरकू के सेन डाए डुका बाने।

परमेश्वर नी पूरा मिस्र गेन डेड्डाकु कुल्केकु। फिरौन नी डेड्डाकु के लेंक्कीनकु गा घल्जी मूसा टे अनुराध डाके। पेनो सेबाई डेड्डाकु गुजू गा बादोन, फिरौन नी हेजा मन के जिद्दी आरुये एठा इस्राएली कुरकू के मिस्र टे ओट डाए डुका बाने।

इनिघल्जी परमेश्वर नी तोतोरकु गा सिनीनौर कुल्के। डेगा डीचनी बिंजकु गा सिनी कुल्के। फिरौन नी मूसा एठा हारून के हाकोलेकू एठा दिकुटे मंडीके कि अगर दिकु डी सिनीनौर के भी रोकातिंज्की मेटे इस्राएली कुरकू मिस्र के के आराटे सेने साकतावा होय। जब मूसा नी प्रार्थना डाके मेटे परमेश्वर नी मिस्र लिंजटे बिंजकु के म्याधेळेन केकु। पेनो फिरौन नी हेजा मन के जिद्दी आरुये एठा डी कुरकू के आजादी टे सेन डाए डुका बाने।

येनेगा सम्मान, परमेश्वर नी मिस्रीकु गा सेबाई पालतू जानवरकु के बीमार टे गोच डाएकेकु। पेनो फिरौन गा मन जिद्दी आरोएन डा एठा डीचनी इस्राएली कुरकू के सेन डाए डुका बाने।

मेटे परमेश्वर नी मूसा टे फिरौन गा सम्मान हवा गेन होप तेटाप्पा गा घल्जी मंडीके। जब डीचनी येनोगो डाके मेटे मिस्र गा कुरकू गा म्वार लिंजेन कासु मिनी उजू ओटजे, पेनो इस्राएली कुरकू के चोच्काभी तकलिप बान दडुका। परमेश्वर नी फिरौन गा मन के जिद्दी आरुके, एठा फिरौं नी इस्राएली कुरकू गा आजादी टे सेन डाए डुका बाने।

येनेगा बादोन, परमेश्वर नी बाराप एठा मिस्र गा घोनेच फलनौर के नशोके एठा जो जेकाभी बल्लान ओटबा डीचके गोच्केनेच। फिरौन नी मुसा एठा हारून के हाकोके किंज एठा दिकिंजा टे मंडीके, “इंज्नी पापो डाके होय। आपे कुरकू सेने साकतावा होय।” इनिघल्जी मूसा नी प्रार्थना डाके, एठा बदळा टे बरप बोचो बंदोएन।

पेनो फिरौन नी डाबोलटे पापो डावे एठा हेजा मन के जिद्दी आरुये। डीचनी इस्राएली कुरकू के अजादी टे सेन डाए डुका।

इनिघल्जी परमेश्वर नी मिस्र लिंजेन तोतोरकु गा गोंजा के हेज डाए के। इनी तोतोरकु डी सेबाई अनोजो के जोम्जे डीके बारप नी नशोके डा।

डाबोलटे परमेश्वर नी अंधराके जो आफाई दिननौर टाएन आरुका थंदळके। येटेन येटो ठायका किरीच डा मिस्री कुरकू इकुगा उरानौर टे बान ओटडुका। पेनो तोटेन इस्राएली कुरकू थंदळ डा देटेनका उजाला डा।

इनी आराई सिनीनौर गा बादोन भी, फिरौन नी इस्राएली कुरकू के अजादी टे सेने टे बान मेंके। चोयाकी फिरौन नी बान आजुम डुका डा। इनिघल्जी परमेश्वर नी म्या आखरी सिनी के कुकूल गा योजना आरुके। इनी फिरौन गा मन के बदलाएवा।