18. भागो के राज्य

दाऊ द राजा नी चालीसो साल टाएन राजो डावे। मेटे डीच गोएन, एठा दियागा कोंटे सुलैमान नी इस्राएल गा लिंजेन राजो दडा सुरुके। परमेश्वर नी सुलैमान टे डावे एठा कोम्बराके कि डी सेबाई टे जादा चोच चाहतावा होय कि परमेश्वर दियागा घल्जी डाए। सुलैमान नी परमेश्वर टे आसिवे कि डीच डीचके ठायका दिमागदार आरुकेचफ इनी बातो नी परमेश्वर के कुशोकेनेच, इनिघल्जी परमेश्वर नी सुलैमान के दुनिया गा सेबाईटे दिमागदार कोरो आरुकेनेच। सुलैमान नी घोनेच्का बातो के इथुके एठा डीच म्या दिमागदार राजो मिठाच डा। परमेश्वर नी डीचके घोनेच लकपति आरुकेनेच डा।

यरूशलेम गेन सुलैमान नी डी मंदिर के आरुके डेगा घल्जी दियागा बाटे नी योजना आरुके डा एठा सामोन के गोलाके डा। नका कुरकू मिलातिंजू मिनी डेरा गेन परमेश्वर गा आराधना दडा डा एठा दियागा घल्जी बलि इपेपेळेच डा। परमेश्वर हेंडो मंदिर गे थंदळ लक्कू डा, एठा देटेन डीच हेजा कुरकू गा सेंग्गोन थंदळ लक्कू डा।

पेनो सुलैमान नी दूसरा देशो गा जापाएकु टे प्यार डावे। डीचनी घोनेच्का अंदजोटे १००० जापाएकु टे ब्याह डाटे परमेश्वर गा खिलाफ डाके! इंकू तालाटे घोनेच का जापाएकु टे दूसरा देशो टे हेन एठा हेजागा गोमेचकु के सालेकू एठा दिकुगा आराधना दडा सुरुके। जब सुलैमान बुड्डाएन मेटे डीचभी नी दिकुगा गोमेच्कू गा आराधना डाके।

इनी वाजाटे परमेश्वर सुलैमान टे खीजोके डा। डीचनी मंडीके डीच इस्राएल देशो के बारी राज्य गेन कखातिंज गा द्वारा डीचके दण्डो जेबा डीच सुलैमान गा गुजू गा बादोन येनोगो डाएवा।

सुलैमान गा गुजू गा बादोन, रहबाम राजा आरुके। इस्राएल देशो गा सेबाई कुरकू डीचके इकुगा राजा गा रुपो गेन ममानातिंज गा घल्जी म्या सेंग्गोन गोलाएन। दिकुनी रहबाम टे शिकायत डाके कि सुलैमान नी दिकुटे भेबाव मेहनत डाके डा एठा घोनेचका टेक्सा साउसिलबे डा। दिकुनी रहबाम टे अनुरोध डाके कि दिकुटे कामय कम डाए चाले।

पेनो रहबाम नी दिकुके खाट का मूर्खाता टे जवाब जीके, “आपे मंडीवा होय कि इंजा बाटे सुलैमान नी आपेटे काठीन मेहनत डाके। पेनो इंज आपेटे देटे जादा काठीन मेहनत दडा होळाकोम्बा, एठा इंज आपेके देटेभी जादा तक्लिप जेवा।”

जब कुरकू नी दियाटे येनोगो मंडीटे आजुम्के दिकु तालाटे चोटोका कुरकू नी दियागा खिलाफबेन हिंजमान डावे। गेल खानदान नी डीचके आराकेनेच; दियागा सेंग्गोन बारी कोणकिंज का बचातिंज्के। इनी बारी कोणकिंज नी खुदके यहूदा गा राज्य मंडीके।

बाकि गा गेल कोंकू नी यारोबान जीमू गा म्या कोरो के आपना राजा आरुकेनेच। इनी कोणकु देशो गा उत्तर-पूर्व भागो गेन डा। दिकुनी खुदके इस्राएल गा राज्य मंडीके।

पेनो यारोबान नी परमेश्वर गा खिलाफ बेन विरोध डाके एठा कुरकू टे पापो डाके। डीचनी आपना कुरकू गा द्वारा आराधना दडा गा घल्जी बारी मूर्तिनौर के आरुके। दिकु नका यहूदा गा राज्य गेन यरूशलेम गेन परमेश्वर गा मंदिर गेन दियागा आराधना दडा गा घल्जी बान सेंडूका।

यहूदा एठा इस्राएल गा राज्य दुश्मन आरोएन एठा अक्सर इनिज-दियागा खिलाफ बेन लड़ाई लज्जे।

इस्राएल गा उनाई राज्य गेन, सेबाई का राजाकु दुष्ट डा। इंकूटे चोटोका राजा दियागा जगान राजा आरुगा गा इच्छा दोडो मिंकू अलग्गो इस्राएली कुरकू गा द्वारा गोएन मेना डा।

इस्राएल राज्य गा सेबाई का राजाकु नी एठा येठाभी कुरकू नी मूर्तिनौर गा आराधना डाके। जब दिकुनी येनोगो डाके, मेटे दिकु अक्सर रांडोकु गा सेंग्गोन गिटीचके एठा येटे टाएन कि चोटोका बार मूर्तिनौर गा सम्मान चफ्नीकूके बलि भी डाके।

यहूदा राज्य गा राजा, दाऊद गा पिढी डा। इनी राजाकु तालाटे चोटोका भला कोरोकु डा दिकुनी न्यायपूरा राजो डाके एठा परमेश्वर गा आराधना डाके। पेनो यहूदा गा येठाभी राजा दुष्ट डा। दिकुनी दुष्टता टे राजो डाके, एठा मूर्तिनौर गा आराधना डाके। येटे टाएन कि इंकू तालाटे अदा राजाकु नी लाबाळ गोमेच्कू गा सम्मान इकुगा चफ्नीकूके भी बलि जीके। यहूदा गा येठाभी कुरकू नी भी परमेश्वर गा खिलाफ बेन विरोध डाके एठा अलग्गो गोमेच्कू गा आराधना डाके।