20. गुलामी टे एठा हीरा

इस्राएल गा राज्य एठा यहूदा गा राज्य बाएरा भी नी परमेश्वर गा खिलाफ बेन पापो डाके। दिकुनी डी वादा के टुक्काके जो परमेश्वर नी दिकुगा सेंग्गोन सीनै टुक्की लिंजेन टोल्के डा परमेश्वर नी दिकुके मन बबादला एठा डाबोलटे दियागा आराधना दडा गा घल्जी चेतावनी जिऊ के हेजा परमेश्वर गा कोनेटे मंडी मिंकू के कुल्केकु, पेनो दिकुनी दिकुगा बातो के ममानातिंज टे बान मेंके।

इनिघल्जी परमेश्वर नी दिकुगा दुश्मनकु के दिकुके नशो दडा गा द्वारा बारी भी राज्य के दण्डो जीके। अश्शूर म्या अलग्गो देशो डा जो भेबाव शक्तिशाली आरोएन डा। दिकु दूसरा देशो गा बेदला भेबाव खुच्चोळ डा। दिकुनी हेंडो इस्राएल गा राज्य के नशोके। अश्शूरीकु नी हेंडो इस्राएल गा राज्य गेन घोनेच्कुके गोच्केकु, जो होना डीके लुटातिंजे, एठा देशो गा चोटोका हिस्सा के जुल्के।

अश्शूरीकु नी सेबाई अगुवाकु, लकापति कुरकू, एठा येनोगो कुरकू के जो किमती चीजो आरू साकता डा म्या सेंग्गोन गोलाकेकु एठा दिकु दिकुके अश्शूर देशोन साईंय्येकु। इस्राएल गेन बस थोळाका गिरबो इस्राएलीकु बचातिंज्के।

डाबोलटे अश्शूरी कुरकू डी देशो गेन थंदळ गा घल्जी दूसरा देशोकु के साटे हेन। डी दूसरा देशोकु नी पूरानौर के डाबोलटे आरुके। जो इस्राएली कुरकू देटेन थंदळके डा दिकुनी ब्याह डावे। इनी कुरकू गा पिढी समरी मंडेवा।

यहूदा गा राज्य गा कुरकू नी डोके कि टोनोगो परमेश्वर नी दिया लिंजेन विश्वास बान दडा एठा दियागा बातो के बान ममानातिंज गा वाजाटे इस्राएल गा राज्य गा कुरकू के दण्डो जीके डा। पेनो मेटे पेनो दिकुनी कनानीकु गा गोमेच्कू गा मूर्तिनौर गाआराधना डाके। परमेश्वर नी दिकुके चेतावनी जिऊ गा घल्जी परमेश्वर गा कोनेटे मंडी मिंकूके कुल्केकु, पेनो दिकुनी आजुम्टे बान मेंके।

अंदजोटे १०० साल गा बादोन अश्शूरीकु नी इस्राएल गा राज्य के नशोके। परमेश्वर नी बेबीलोन नबूकदनेस्सर के यहूदा गा राज्य लिंजेन हामला दडा गा घल्जी कुल्केनेच बेबीलोन म्या शक्तिशाली देशो डा। यहूदा गा राजा नबूकदनेस्सर गा भाग्य आरू एठा चोटोका साल डीचके घोनेच सेबाई डामा गा जिऊ गा घल्जी राजेन होय।

पेनो चोटोका साल गा बादोन, यहूदा गा राजा नी बेबीलोन गा खिलाफबेन झागळा डावे। इनिघल्जी बेबीलोनकु नी डाबोलटे हेंडो यहूदा गा राज्य लिंजेन हमला डाके। दिकुनी यरूशलेम पूरा लिंजेन कब्जाये, मंदिर के नशोके, एठा मंदिर गा खजाना के लुटातिंजे।

झागळा दडा गा वाजाटे यहूदा गा राजा के दण्डो जिऊ गा घल्जी, नबूकदनेस्सर गा सैनिककु नी राजा गा कोंटे के दियागा सम्मान गोच्केनेच एठा डाबोलटे डीचके अंधळाकेनेच। येनेगा बादोन, डी राजा के साईंय्येनेच ताकि डीच बेबीलोन गा जेलेन गोयु।

नबूकदनेस्सर एठा दियागा सेना यहूदा गा राज्य गा अंदजोटे सेबाईका कुरकू के बेबीलोन गेन साईंय्येकु, बस सेबाईटे गिरबो कुरकू के टाऊन आराटे ताकि दिकु खिटीन अनोजो ओटकी। टेमो गा इनी जमाना के गुलामी मंडीके मेना होय डेन परमेश्वर गा कुरकू के वायदा गा देशो टे ओटगा घल्जी मजबूरकेकु डा।

भलाका परमेश्वर नी हेजा कुरकू के दिकुगा पापो गा घल्जी गुलामी गेन सगा द्वारा दण्डो जीके, तोभी डीच दिकुके या हेजा वायदानौर के बान भुल्लाडुका डा। परमेश्वर नी हेजा कुरकू गा निगरानी दडा सुरुके डोकी एठा हेज कोंटे मंडी मिंकू गा द्वारा दिकुटे बातो मंडी डा। डीचनी वायदा डाके कि सत्तर साल गा बादोन, डीच डाबोलटे वायदा गा देशो गेन हिरावा।

अंदजोटे सत्तर साल गा बादोन, फारस गा राजा कुस्रू नी बेबीलोन के हरातिंज्के, इनिघल्जी बेबीलोन गा साम्राज्य गा बेदला फारस गा साम्राज्य नी चोटोका देशो लिंजेन राजो डावे। इस्राएली कुरकू नका यहूदी मंडीवा डा। दिकु तालाटे घोनेच्कुकानी इकुगा पूरा जीवन बेबीलोन गेन बितातिंज्के डा। बस घोनेच थोडा बुड्डा यहूदीकु गा यहूदा गा देशो यादो डा।

फारसी कुरकू भेबाव ताखात मिंकू डा, पेनो दिकुनी इकुगा जीटाके मिंकू कुरकू लिंजेन दया डाके डा। फारसी कुरकू गा राजा आरुगा थोडा टेमो गा बादोन, कुस्रू नी म्या हुकूम जीके कि कि तुनिकभी यहूदी जो यहूदा के हिरा चाहता डा, डीच फारस टे ओट्टे डाबोलटे यहूदा गेन सेने साकतावा होय। येटे टाएन कि डीचनी दिकुके मंदिर के डाबोलटे आरुगा घल्जी डामा भी जीके। इनिघल्जी गुलामी गा सत्तर साल गा बादोन, यहूदीकु गा म्या सानी समूह यहूदा गेन यरूशलेम पूरा गेन हिराके।

जब दिकु यरूशलेम पूरा गेन आदिरजे मेटे दिकुनी मंदिर के एठा पूरा गा उफुन भी कोने गा दीवार के डाबोलटे आरुके। फारसी कुरकू आएभी दिकु लिंजेन राजो दडा डा लेकिन म्या बार डाबोलटे दिकु वायदा गा देशो गेन थंदळ लक्कू डा एठा मंदिर गेन आराधना दडा लक्के डा।