21. परमेश्वर मसीह गा वायदा दडावा होय

जब परमेश्वर नी दुनिया के आरूके डा, डीच हाडाई डा कि दियेन बादोन तुनिका दिन मसीह के कुकूल होना। डीचनी आदम एठा हव्वा टे वायदा डाके कि डीच येनोगो डाएवा। डीचनी मंडीके कि हव्वा टे म्या पिढी जनम सेगेवा जो बिंज गा कापर के कुचलातिंज्कुवा। जो बिंज नी हव्वा के धोका जीके डीच बिंदोक शैतान डा। परमेश्वर गा मतलब डा कि मसीह पूरा खिजाटे शैतान के हरातिंजेचबा।

परमेश्वर नी अब्राहम टे वादा डाके डा कि दियागा द्वारा दुनिया गा सेबाई जाटोनौर गेन आशीष घाटाऊवा। परमेश्वर बादोन तुनिका टेमो लिंजेन मसीह के कुकूल गा द्वारा इनी वादा के पूरा डाएवा। डी मसीह दुनिया गा हर म्या जाटो तालाटे कुरकू के दिकुगा पापो टे आराकुवा।

परमेश्वर नी मूसा टे वादा डाके डा हेजे मिनी टेमो गेन डीच मूसा गा रोंगो म्या अलग्गो परमेश्वर गा कोनेटे मंडी मिठाच के कुलेच्बा। इनी परमेश्वर गा कोनेटे मंडी मिठाच मसीह होंगा। इनी रिती टे, परमेश्वर नी डाबोलटे वादा डाके कि डीच मसीह के कुलेच्बा।

परमेश्वर नी राजा दाऊद टे वादा डाके डा कि दियागा म्या पिढी मसीह डाऊवा। डीच राजा आरुवा एठा परमेश्वर गा कुरकू लिंजेन हमेशा गा घल्जी राजो दडावा।

परमेश्वर नी यिर्मयाह परमेश्वर गा कोनेटे मंडी मिठाच टे बातो डावे एठा मंडीके कि म्या दिन डीच उनाई वादा टोलेवा। डी उनाई वादा इस्राएल गा सेंग्गोन सीनै टुक्की लिंजेन टोल्के मिनी जुना वादा गा खिजा बान डाऊ। जब कुरकू गा सेंग्गोन डीच हेजा उनाई वादा के टोलेवा, मेटे डीच दिकु लिंजेन खुदके कोरो रुपोटे ओडेवा। हर म्या कोरो दियाटे प्यार डोएवा एठा दियागा नियम गा पालन दडा गा इच्छा डोएवा। परमेश्वर नी मंडीके कि इनी दियागा नियम गा दियागा दिलनौर लिंजेन ओल्के खिजा डाऊवा। एठा परमेश्वर दिकुगा पापो के मापोंएवा। डी च मसीह होगा जो दिकुगा सेंग्गोन डी उनाई वादा के टोलेवा।

परमेश्वर गा कोनेटे मंडी मिंकूनी इनी भी मंडीके कि मसीह म्या परमेश्वर गा कोनेटे मंडी मिठाच होंगा। म्या परमेश्वर गा कोनेटे मंडी मिठाच डी कोरो होय जो परमेश्वर गा वचननौर के आजुम्बा होय एठा डाबोलटे कुरकू लिंजेन परमेश्वर गा खाबोर गा एलान दडावा होय। देटे कुकूल गा परमेश्वर नी वायदा डाके डा डीच मसीह म्या पक्का परमेश्वर गा कोनेटे मंडी मिठाच होंगा। मतलब डीच मसीह परमेश्वर गा खाबोरनौर के अच्छा खिजाटे आजुमेवा, एठा डीच कुरकू के डी खबोरनौर के अच्छा खिजाटे इथूकोम्बा।

इस्राएली याजककु नी कुरकू गा घल्जी परमेश्वर गा सम्मान बलिदान पेपेळेच चालुका डोके। इनी बालिदान कुरकू गा पापो गा घल्जी दिकुके परमेश्वर द्वारा नंगा साब गा जागान पेळेचके मेना डा। याजकनी कुरकू गा घल्जी प्रार्थना भी डाके। पेनो, डीच मसीह पक्का महायजक होंगा जो परमेश्वर के जिऊ गा घल्जी म्या पक्का बलि गा रुपो गेन खुदके पेळेजेवा। मतलब, डीच चोलाकाभी पापो बान दडुका, एठा जब डीच खुदके बलि जिऊ गा घल्जी जेवा, मेटे दुनिया गा तुनिकाभी अलग्गो बलि जरुरी बान डाऊ।

कुरकू गा समूह लिंजेन राजा एठा प्रधान राजो दडावा होय, एठा चोलाका-चोलाका दिकु गलतीनौर दडावा होय। राजा दाऊद नी बस इस्राएली कुरकू लिंजेन राजो डावे, पेनो राजा दाऊद गा पिढी मसीह पूरा दुनिया लिंजेन राजो डाएवा, एठा डीच हमेशा गा घल्जी राजो दडावा। येनेगा आलावा न्यायपूरा रितीटे राजो दडावा, एठा सही निर्णय के सेगेवा।

परमेश्वर गा कोनेटे मंडी मिंकूनी मसीह गा बारेन घोनेच्का बातो के मंडीके। उदाहरण गा घल्जी, मलाकी नी मंडीके कि मसीह गा हेजे टे पेला म्या अलग्गो परमेश्वर गा कोनेटे मंडी मिठाच हेजेवा। डीच परमेश्वर गा कोनेटे मंडी मिठाच कास होंगा। येनेगा अलावा, यशायाह परमेश्वर गा कोनेटे मंडी मिठाच नी ओल्के कि मसीह म्या कुंवारी टे सवा। एठा मिका परमेश्वर गा कोनेटे मंडी मिठाच नी मंडीके कि मसीह बैतलहम पूरा गेन जनम सवा।

यशायाह परमेश्वर गा कोनेटे मंडी मिठाच नी मंडीके कि मसीह गलील गा इलाका गेन सुबनबा। जो कुरकू भेबाव दुखी होय मसीह दिकुके शांति जेवा। डीच कैदीकु के भी आजादी जेवा। मसीह बीमारी के एठा जो आजुम साकता बाने, डोगे बान साकता, मंडी बान साकता, या सेंदरा बान साकता दिकुके भी सजाकुवा।

याशयाह परमेश्वर गा कोनेटे मंडी मिंकू नी इनी भी मंडीके कि कुरकू मसीह टे नफरत डाएवा एठा डीचके ममानातिंजटे बान मेनेवा। अलग्गो परमेश्वर गा कोनेटे मंडी मिंकूनी मंडीके कि म्या सेंग्गो दियागा खिलाफ बेन बिट्बा। जकर्याह परमेश्वर गा कोनेटे मंडी मिठाच नी मंडीके कि दियागा इनी सोपती येनोगो दडा गा घल्जी दूसरा कुरकू टे चांदी गा तीसो चिक्खा सेगेवा। येनेगा अलावा, अदा परमेश्वर गा कोनेटे मंडी मिंकूनी मंडीके कि कुरकू मसीह के गोजेज्बा, एठा इनी कि दिकु दियागा कपळे गा घल्जी पट्टा हुंजूवा।

परमेश्वर गा कोनेटे मंडी मिंकूनी इनी भी घाल्के कि मसीह टोनोगो गुजूवा। यशायाह नी भविष्यवाणी डाके कि कुरकू मसीह लिंजेन उलीच बेजेवा, दियागा मजाक उळातिंजेवा, एठा डीचके मुंडाएच्बा। दिकु डीचके पोपागेच्बा एठा डीच खाट तक्लिप एठा कासून गुजूवा, जब कि डीचनी चोच्काभी गलत बान दडुका होंगा।

परमेश्वर गा कोनेटे मंडी मिंकूनी इनी भी घाल्के कि मसीह पापो बान दडा। डीच पक्का डाऊवा। पेनो डीच इनिघल्जी गुजूवा परमेश्वर डीचके अलग्गो कुरकू गा पापो गा वाजाटे नंगा सब होळाएच्बा। दियागा गुजू टे कुरकू परमेश्वर गा सेंग्गोन मिलातिंजून पक्काऊवा। इनिघल्जी परमेश्वर चाहतावा होय कि मसीह गोयु।

परमेश्वर गा कोनेटे मंडी मिंकूनी इनी भी घाल्के कि परमेश्वर मसीह के गोएन मिठाच जाटे जीटाएच्बा। इनी दर्शातिंजेवा होय कि इनी सेबाई उनाई वादा के टोटोल गा परमेश्वर गा योजना डा, ताकि डी कुरकू के बचातिंज्केकु होना दिकुनी दियागा खिलाफ बेन पापो डाके होय।

परमेश्वर नी परमेश्वर गा कोनेटे मंडी मिंकू लिंजेन मसीह गा बारेन घोनेच्का बातो के ओडेवा, पेनो मसीह डी परमेश्वर गा कोनेटे मंडी मिंकू तालाटे जेगा गा भी जीवनकाल गेन बान हेजडुका डा। इनी भविष्यवाणी गा जीऊ गा ४०० टे येठाभी साल गा बादोन, सही टेमो लिंजेन, परमेश्वर मसीह के इनी दुनिया गेन कुलेच्बा।