22. यूहन्ना गा जनम

आखरी गेन, परमेश्वर नी हेजा परमेश्वर गा कोनेटे मंडी मिंकू टे बातो डावे डा इनिघल्जी डी कुरकू टे बातो डाकि होना डा। पेनो डी टेमो टे साटे डाबोलटे ४०० साल गा सेने टाएन डीचनी दिकुटे बातो बान दडुका। मेटे परमेश्वर नी जर्कयाह जीमू गा परमेश्वर गा कोनेटे मंडी मिठाच गा मेरान स्वर्गदूत के कुल्केनेच। जकर्याह एठा दियागा जापाएटे एलीशिबा परमेश्वर गा आदर दडा डा। डीच ठायका बुड्डाएन डा, एठा दियेन तुनिका कोण बान दडुका।

डी स्वर्गदूत नी जकर्याह टे मंडीके, “अमा जापाए गा म्या कोण डाऊवा। आम दियागा जीमू यूहन्ना डोकी। परमेश्वर डीचके पवित्र आत्मा टे भेट्टेच्बा, एठा यूहन्ना कुरकू के मसीह के मनेन गा घल्जी तैयारेज्बा।” जकर्याह नी जवाब जीके, “इंज एठा इंजा जापाए कोणके दडा गा घल्जी ठायका बुड्डाएन होय! इंज टोनोगो चिनाए कि आपे इंजाटे सच्चो मंडी लक्के होय?”

डी स्वर्गदूत नी जकर्याह के जवाब जीके, “अमा मेरान इनी अच्छा खाबोर के सगा घल्जी इंज परमेश्वर गा द्वारा कुल्के मेना। चोयाकी आमनी इंजा लिंजेन विश्वास बान दडुका, इनिघल्जी सनी गा जनम सा टाएन आम मंडी गेन पक्काऊ बाने।” तुरुटोका, जकर्याह मंडी गेन शक्ति बाऊ डा। मेटे डी स्वर्गदूत जकर्याह गा मेरा टे ओले मेना। येनेगा बादोन, जकर्याह उरान हिराके एठा दियागा जापाएटे लाज हेन।

जब एलीशिबा तुरुई महीना गा लज्के डा, मेटे डीका स्वर्गदूत अचानक टे एलीशिबा गा सगाकु लिंजेन ओटजे मेना, दियागा जीमू मरियम डा। मरियम कुंवारी डा एठा ब्याह डाऊ गा घल्जी यूसुफ जीमू गा कोरो गा सेंग्गोन दियागा मंगनी डाएन मेना डा। स्वर्गदूत नी मंडीके, “आम लाजुवा मेना एठा म्या कोणके जनम जेवा। आमेन दियागा जीमू यीशु दोडो होना होय। डीच सर्व-शक्तिमान परमेश्वर गा कोंटे डाऊवा एठा हमेशा गा घल्जी राजो दडावा।”

मरियम नी जवाब जीके, “इनी चोथान टे डाऊवा, चोयाकी इंजनी मेटे कुंवारी मेना?” डी स्वर्गदूत नी समझातिंज्केनेच, “पवित्र आत्मा अमा लिंजेन हेजेवा, एठा परमेश्वर गा शक्ति अमा लिंजेन हेजे लक्कूवा। इनिघल्जी डी सनी पवित्र आत्मा होंगा, एठा डीच परमेश्वर गा कोंटे होंगा।” जो डी स्वर्गदूत नी मंडीके दिया लिंजेन मरियम नी विश्वास डाके।

इनी डाऊ गा तुरुटो बादोन, मरियम नी ओलेडो एलीशिबा टे मिलातिंज्के। जैसा का मरियम नी डीचके नमस्कार डाके, एलीशिबा गा कोंटे तालान ओएन। दिकुगा घल्जी परमेश्वर नी जो डाके डेगा बारेन डी जापाए म्या सेंग्गोन कुशोएन मेना। एलीशिबा गा सेंग्गोन आफाई महीना थंदळ गा बादोन, मरियम उरा गेन हिराएन।

येनेगा बादोन, एलीशिबा नी हेजा कोंटे के जनम जीके। जकर्याह एठा एलीशिबा नी डी सनी गा जीमू यूहन्ना डोके, जैसा कि डी स्वर्गदूत नी हुकूम जीके डा। मेटे परमेश्वर नी जकर्याह के मंडी गेन पक्काकेनेच। जकर्याह नी मंडीके, “परमेश्वर गा स्तुति डायु, चोयाकी डीचनी हेजा कुरकू गा मदत दडा के यादो डोके! हे इंजा कोण, आम सर्व शक्तिमान परमेश्वर गा कोनेटे मंडी मिठाच होंगा। आम कुरकू के घालेवा कि डीच टोनोगो आपना पापो गा घल्जी माफी आसे साकतावा होय!”