23. यीशु गा जनम

यूसुफ जीमू गा म्या धर्मी कोरो गा सेंग्गोन मरियम गा मंगनी डाएन मेना डा। जब डीचनी आजुम्के कि मरियम लज्के होय मेटे दियेन मालूम डा कि डीच दियागा कोणटे बाऊ डा। पेनो डीच मरियम के बदनाम दडा बान चाहता डा, इनिघल्जी डीचनी दिया लिंजेन कृपा दडा गा एठा डीचके कायोमटेका तालक जिऊ गा सोचातिंज्के। पेनो येनेटे पेला कि डीच येनोगो दडा, म्या स्वर्गदूत नी दियागा सपना गेन हेंडो दियाटे बातो डावे।

डी स्वर्गदूत नी मंडीके, “हे यूसुफ, मरियम के अमा जापाए गा रुपो गेन साटे हेजे टे बाकी हिघरा। दियागा तालान जो सनी होय डीच पवित्र आत्मा गा कोनेटे होय। डीच म्या कोण के जनम जेवा। दियागा जीमू यीशु डोकी (डेगा मतलब होय, ‘यहोवा बबाचातिंज्बा होय’), चोयाकी डीच कुरकू के दिकुगा पापो टे बचातिंज्कुवा।”

इनिघल्जी यूसुफ नी मरियम टे ब्याह डावे एठा डीचके हेजा जापाएटे गा रुपो उरान सालेनेच, पेनो दियागा कोंटे के जनम जिऊ टाएन डीच दियागा सेंग्गोन बान गिटिचडुका।

जब मरियम गा जनम जिउ गा टेमो मेरान डा, मेटे डीचनी एठा यूसुफ नी बैतलहम सेने गा म्या लम्बा यात्रा डावे। दिकुन डेन सेनेका होना डा चोयाकी रोमी अधिकारी इस्राएल गेन थंदळ मिंकू सेबाई कुरकू गा गिनती दडा चाहता डा। दिकु चाहता डा कि सेबाई कुरकू देटेन सेने देटेन दिकुगा जुनाकु थंदळ डा। राजा दाऊद गा जनम बैतलहम गेन डाएन डा, एठा डी मरियम एठा यूसुफ बर्खिंज गा जुनाकु डा।

मरियम एठा यूसुफ बैतलहम गेन ओले, पेनो देटेन जानवरकु के दोडो मिंकू जगा गा अलावा दिकुगा थंदळ गा घल्जी तुनिका जगा बाऊ डा। डीका जगा डा देटेन मरियम नी हेजा कोंटे के जनम जीके। डीचनी डीचके गवनी गेन गिटिचकेनेच चोयाकी देटेन दियागा घल्जी तुनिका गुदळी बाऊ डा। दिकुनी दियागा जीमू यीशु डोके।

डी रातो, देटेन मेरा गा का खिटीन अदा ताठ्याकु इकुगा मेंडाकू गा गोंजा के जगली लक्के डा। अचानक टे, म्या चमकातिंजू स्वर्गदूत दिकु लिंजेन ओटजे मेना, एठा दिकु हिघराएन। डी स्वर्गदूत नी मंडीके, “बाकी हिघरा, चोयाकी चोयाकी इंजा मेरान आपेगा घल्जी अच्छा खाबोर होय। बैतलहम गेन मसीह, स्वामी के जनम डाएन होय!”

ओलेडो डी सानी के घागाटा लक्के, एठा आपे डीचके कपळे गेन करूपकेनेच एठा गावनी गेन गिटिचटे डोगेच्बा।” अचानक टे, बादळा स्वर्गदूतकु टे भेट्टेन। दिकु परमेश्वर गा स्तुति दडा लक्के डा। दिकुनी मंडीके, “सेबाई महिमा स्वर्ग गेन सुबांके परमेश्वर गेन घाटायु। पृथ्वी लिंजेन डी कुरकू गेन शांति डायु दिकुगा डीच चिंता दडावा होय!”

मेटे स्वर्गदूत ओले मेना। डी ताठ्याकु भी इकुगा मेंडाकु के आराटे सनी के दोडो ओले। झाल्लोका दिकु डी जागान आदिरुवा देटेन यीशु डा एठा दिकुनी डीचके गावनी गेन गिटिचटे डोकेनेच, जैसा कि डी स्वर्गदूत नी मंडीके डा। दिकु भेबाव कुशोके डा। मेटे डी ताठ्याकु देटे टे हिराएन डिंगान दिकुगा मेंडाकु डा। दिकुनी जो चोच्काभी आजुम्के एठा डोके डी सेबाई गा घल्जी दिकु परमेश्वर गा स्तुति दडा लक्के डा।

पूर्व गेन लेंक्कीन म्या देशो गेन अदा कोरोकु डा। दिकुनी इफिलकु के डोकेकु डा एठा दिकु दिमागदार डा। दिकुनी म्या खाटका बेळे इफिल के बादळा गेन डोकेनेच। दिकुनी मंडीके कि येनेगा मतलब होय कि यहूदी कुरकू गा म्या उनाई राजा गा जनम डाएन होय। इनिघल्जी दिकुनी डी सनी के दोडो गा घल्जी इकुगा देशो टे यात्रा दडा गा निर्णय डाके। म्या लम्बा यात्रा गा बादोन, दिकु बैतलहम गेन हेन एठा डी उरा के डोके देटेन यीशु एठा दियागा आंटे-बाटे ठहरातिंज्के डा।

जब इनी कोरोकु नी यीशु के हेजा आंटे गा सेंग्गोन डोकेनेच मेटे दिकुनी टोपेरे जेगाटे दियागा आराधना डाके। दिकुनी यीशु के किमती भार जीके। डाबोलटे दिकु उरा गेन हिराएन।