24. यूहन्ना यीशु के बपतिस्मा जिऊवा होय

एलीशिबा एठा जकर्याह गा कोंटे यूहन्ना, खाटजे कि म्या परमेश्वर गा कोनेटे मंडी मिठाच आरोएन। डीच डोंगोंरेन थंदळ लक्कू डा, एठा डोंगोंर निलीकु डा एठा तोतोरकु के जोम लक्कू डा, एठा ऊँटो गा कतळे टे आरुके मिनी कपळे उरी लक्कू डा।

घोनेच्का कुरकू यूहन्ना गा बातो आजुम गा घल्जी डोंगोंरेन ओटके। डीचनी इनी मंडीटे दिकुगा प्रचार डाके, “मन बदलाए, चोयाकी स्वर्ग गा राज्य मेरान होय!”

जब कुरकू नी यूहन्ना गा खाबोर के आजुम्के, मेटे दिकु तालाटे घोनेच्कु नी इकुगा पापो टे मन मन बादलाके, एठा यूहन्ना नी दिकुके बपतिस्मा जीके। युहन्ना के दोडो घल्जी घोनेचका धार्मिक अगुवाकु भी हेन, पेनो दिकुनी इकुगा पापो टे मन बबादला या कुबूलडुका बाने।

यूहन्ना नी धार्मिक अगुवाकु टे मंडीके, “हे जेर मिंकू बिंजकु! मन बदलाए एठा आपना व्यवहार के बदलाए। परमेश्वर हर डी सिंज के गेडेवा जो अच्छा फल बान सा, एठा डीच दिकुके सिंगेल गेन टेप्पाकुवा।” जो परमेश्वर गा कोनेटे मंडी मिंकू नी मंडीके डा यूहन्ना नी डीके पुराके, “डोगे, झल्लो का इंज अमा सम्मान इंजा खाबोर कुकूल मिठाच कुलेच्बा जो अमा घल्जी कोरा के तैयारेवा।”

अदा धार्मिक अगुवाकु नी यूहन्ना टे कोम्बाराके कि चोच डीच मसीहा होय। यूहन्ना नी जवाब जीके, “इंज मसीह बाऊ मेना, पेनो डीच इंजागा बादोन हेजे लक्के होय। डीच येटो महान होय कि इंज दियागा बुट्टा गा चिखाल कोखाला गा भी लायको बाऊ मेना।”

हेजे दिन, यीशु बपतिस्मा सा गा घल्जी यूहन्ना गा मेरान हेन। जब यूहन्ना नी डीचके डोकेनेच, मेटे डीचनी मंडीके, “डोगे! परमेश्वर गा मेंडा कोंटे जो दुनिया गा पापो के टूलटे सेगेवा।”

युहन्ना नी यीशु टे मंडीके, “इंज आमके बपतिस्मा जिऊ गा लायको बाऊ मेना। बाजाए येनेगा जरुरी होय कि आम इंज्के बपतिस्मा जिली।” पेनो यीशु नी मंडीके, “आमके इंजाटे बपतिस्मा जिऊ होना, चोयाकी दडा गा घल्जी सही कामय इनिका होय।” इनिघल्जी यूहन्ना नी डीचके बपतिस्मा जीके, जबकि यीशु नी चोलाका पापो बान दडुका डा।

बपतिस्मा जिऊ गा बादोन जब यीशु डा टे ओटजेडो बल्लान हेन, मेटे परमेश्वर गा आत्मा कबुत्त्र गा रुपो गेन ओटजे एठा इटान हेनडो दिया लिंजेन ठहरातिंजे। डीका टेमो, परमेश्वर नी स्वर्ग टे बातो डावे। डीचनी मंडीके, “आम इंजा कोण होय। इंज अमाटे प्यार दडावा होय, एठा इंज अमाटे भेबाव कुशो मेना।”

परमेश्वर नी यूहन्ना टे मंडीके डा, “पवित्र आत्मा इटान हेंडो जेका लिंजेन ठहरातिंजुवा डी चके आम बपतिस्मा जेवा।” डीचका परमेश्वर गा कोंटे होय। पेनो जब यूहन्ना नी यीशु के बपतिस्मा जीके, मेटे डीचनी परमेश्वर बाटे के बातो दडा टे आजुम्के, कोण परमेश्वर के डोकेनेच, जो कि यीशु होय, एठा डीचनी पवित्र आत्मा के डोके।