25. शैतान यीशु गा अंदजो सा लक्के होय

यीशु गा बपतिस्मा डाऊ गा तुरुटो बादोन का, पवित्र आत्मा डीचके डोंगोरेन साईंय्येनेच। यीशु देटेन चालीसो दिन एठा चालीसो राटो डा। डी टेमो डीचनी उपासो डाके, एठा शैतान नी यीशु गा मेरा नहेंडो पापो दडा गा घल्जी दियागा अंदजो साके।

पेला, शैतान नी यीशु टे मंडीके, “अगर आम परमेश्वर गा कोंटे होय टासो, मेटे इनी गोटा के सोकळा आरुकी ताकि आम जोम्जा होना!”

पेनो यीशु नी शैतान टे मंडीके, “परमेश्वर गा वचन गेन इनी ओल्के होय, ‘जीटा थंदळ गा घल्जी कोरोकु के बस सोकळा गा जरुरी बाऊ होय, पेनो दिकुन हर डी बातो गा जरुरी होय जो परमेश्वर दिकुटे मंडीवा होय!’”

मेटे शैतान यीशु गा मंदिर गा सेबाई टे ऊँचा टोनान साईंय्येनेच। डीचनी दियाटे मंडीके, “अगर आम परमेश्वर गा कोण होय मेटे येटे टे इटान उयु, चोयाकी ओल्के होय, ‘परमेश्वर आमके तुटूल गा घल्जी हेजा स्वर्गदूत के हुकूम जेवा कि अमा नंगा लिंजेन गोटाटे उजू बान पेडाऊ।’”

पेनो यीशु नी डी बान दडुका जो शैतान नी दियाटे दडा गा घल्जी मंडीके डा। येनेगा बाजाए, डीचनी मंडीके, “परमेश्वर हर म्याखोम टे मंडीवा होय, ‘आम प्रभु अमा परमेश्वर गा अंदजो बाकी सा।’”

डाबोलटे शैतान नी डीचके दुनिया गा सेबाई राज्य टिपीके। डीचनी डीचके टिपीके कि डीच चोटो शक्तिशाली डा, एठा डीच चोटो पूराका डा। डीचनी यीशु टे मंडीके, “इंज आमके इनी सेबाई जेवा अगर आम टोपरे जेगाटे इंजा आराधना डाए।”

यीशु नी जवाब जीके, “हे शैतान, इंजा मेराटे सेंजू! परमेश्वर गा वचन गेन डी कुरकू के हुकूम जेवा होय, ‘बस आपना प्रभु परमेश्वर गा आराधना डाए। परमेश्वर गा रुपो गेन बस दियागा का आदर डाए।’”

यीशु नी शैतान गा अंदजो टे हार बान मनातिंजडुका, इनिघल्जी शैतान दियागा मेराटे ओले मेना। मेटे स्वर्गदूतकु हेंडो यीशु गा सेवा दडा लज्जे।