27. दयालु सामरी गा कहानी

म्या दिन, यहूदी नियम गा म्या कास कोरो यीशु गा मेरान हेन। डीच सेबाईकु के इनी तीटीपी चाहता डा कि यीशु गलत रिती टे शिक्षा जिऊ लक्के डा। इनिघल्जी डीचनी मंडीके, “हे गुरु, हमेशा जीवन घाटाऊ गा घल्जी इंज चोच डाए?” यीशु नी जवाब जीके, “परमेश्वर गा नियम गेन चोच ओल्के होय?”

डी कोरो नी मंडीके, “डीच मंडीवा होय कि हेजा परमेश्वर टे हेजा सेबाई मन, जान, शक्ति, एठा दिमाग टे प्यार डोकी। एठा हेजा मेराकू टे इकुगा रोंगो प्यार डोकी।” यीशु नी जवाब जीके, “आम म्यादम सही होय! अगर आम येनोगो डाए, मेटे आमके हमेशा गा जीवन घाटाऊवा।”

पेनो डीच नियम गा कास कुरकू के तीटीपी चाहता डा कि दियागा जीवन बिबातातिंज गा तरीका सही डा। इनिघल्जी डीचनी यीशु टे कोम्बराके, “सही होय, मेटे इंजा मेराकू जे होय?”

यीशु नी डी नियम गा कास कोरो के म्या काहानी घागल गा द्वारा जवाब जीके। “म्या यहूदी कोरो डा जो म्या सळाक्को टे सेने लठ्ठाका यरूशलेम टे यरीहो गा यात्रा दडा लक्के डा।”

“पेनो अदा डाकु कुनी डीचके डोकेनेच एठा दिया लिंजेन हमला डाके। दिकुनी दियागा सेबाईका साईय्ये एठा डीचके अंदजोटे घोगेज टाएन मुंडाकेनेच। मेटे दिकु ओले मेना।”

“डेगा तुरुटो बादोन, म्या यहूदी याजक डीका सळाक्को टे ओले। डी याजक नी डी कोरो के सळाक्कोन सोडका डोकेनेच। जब डीचनी डीचके डोकेनेच मेटे डीच सळाक्को गा दूसरा कोनेन सम्मान ओले। डीचनी डी कोरो के पूरा खिजाटे डोकेनेच भी मका बान दोडुका।”

“येनेगा बादोन थोडाका टेमो ओले लिंजेन, म्या लेवी डी सळाक्कोन हेन। (लेवी यहूदी कुरकू गा म्या पिढी डा दिकुनी मंदिर गेन याजककु गा मदत डाके डा।) डी लेवी भी सळाक्को गा दूसरा कोनेटे ओले। डीचभी नी डी कोरो के डोकेनेच भी मका बान दोडुका।”

“दूसरा कोरो जो डी सळाक्कोन हेन डीच सामरिया गा कोरो डा। (सामरी एठा यहूदी इनिज-दियाटे नफरत दडा डा।) डी सामरी नी सळाक्कोन डी कोरो के डोकेनेच। डीचनी डोके कि डीच यहूदी डा, पेनो डाबोलटे भी डीचनी दिया लिंजेन खाट दया हेन। इनिघल्जी डीच दियागा मेरान ओले एठा दियागा घाव लिंजेन पट्टीनौर टोल्के।”

“डाबोलटे डी सामरी नी डी कोरो के हेजा गधा लिंजेन डोकेनेच एठा डीचके डी सळाक्को म्या सराय गेन साईंय्येनेच। देटे जगान डीचनी दियागा देखभाल दडा सुरुके।”

दूसरा दिन, डी सामरी के हेजा यात्रा के सुरुका दोडो गा जरुरी डा। डीचनी डी टेमो सराय गा प्रभारी कोरो के अदा डामा जीके। डीचनी दियाटे मंडीके, “इनी कोर गा देखभाल डाकी। अगर इनी डामा गा अलावा अमा अदा एठा डामा खर्चोएन टासो मेटे डाबोलटे हेजे टेमो इंज अमा डी खर्चोनौर के जेवा।”

डाबोलटे यीशु नी डी नियम गा कास कोरो टे कोम्बाराके, “आपे चोच सोचातिंज्बा होय? इनी आफाई कुरकू तालाटे जे डी कोरो गा मेराकू होय डीचके लुटातिंज्केनेच एठा मुंडाकेनेच मेना डा?” डीचनी जवाब जीके, “डीचका जो दिया लिंजेन दया डाके।” यीशु नी दियाटे मंडीके, आम सेने एठा येनोगोका डाए।”