3. अडी

घोनेच टेमो गा बादोन, दुनिया गेन घोनेच्का कुरकू थंदळ डा। दिकु भेबाव बुरा एठा आनोवा मिंकू आरोएन डा। इंकू येटो बुरा डा कि परमेश्वर नी म्या खाट अडी टे इनी पूरा दुनिया के नशो दडा गा निर्णय सावे।

पेनो परमेश्वर नूह टे कुशोके डा। डीच बुरा कुरकू गा तालान थंदळ मिठाच म्या धर्मी कोरो डा। परमेश्वर नी नूह के घाल्के कि डीच म्या खाटबेळे अडी के सेगे मिठाच होय। इनी वाजाटे, डीचनी नूह टे म्या खाट डोंगा आरु गा घल्जी मंडीके।

परमेश्वर नी नूह के अंदजो टे १४० मीटर लम्बा, २३ मीटर चावडा एठा १३.५ मीटर ऊँचा डोंगा आरु गा घल्जी मंडीके। नूह के डीके लकडी टे आरु डा एठा डेन आफाई तल, घोनेच्का खुली, म्या पदळी एठा खिड़की आरु गा डा। डी डोंगा नूह, दियागा परिवार, एठा ओटे गा हर रेंग्गो गा जानवरकु डी अडी टे सजाका डोकुवा।

नूह नी परमेश्वर गा बातो के आजुम्के। डीचनी एठा दियागा कोणकुटे नी डेनोगोका डोंगा आरुके जैसा परमेश्वर नी घाल्के डा। चोयाकी डी डोंगा भेबाव खाट डा इनिघल्जी आरु गेन चोटोका साल घाईय्ये। नूह नी कुरकू के हेजे मिनी अडी गा बारेन चेतावनी जीके एठा दिकुके परमेश्वर गा कोनेन इखाट गा घल्जी मंडीके, पेनो दिकुनी दिया लिंजेन विश्वास बान दडुका।

परमेश्वर नी नूह एठा दियागा परिवार के हेजा घल्जी एठा जानवरकु के घल्जी होना आटा गोगाला गा हुकूम भी जीके। जब सेबाईका तैयारके डा, मेटे परमेश्वर नी नूह टे मंडीके कि इनी टेमो दियागा, दियाका जापाए गा, दियागा आफाई कोणकु गा, एठा दिकुगा जापाएटे टाकू-पुरा बेल्लाटे इलार कुरकू गा डोंगा गेन सेने गा डा।

परमेश्वर नी हर जानवर एठा भूरी गा जापाए एठा धोटा के नूह गा मेरान कुल्केकु ताकि दिकु डोंगा गेन सेंजू होना एठा अडी गा वोजीटे सजाका थंडदळकु होना। परमेश्वर नी येनोगो हर रोंगो गा जानवरकु गा याई जापाएकु एठा याई धोटाकु के कुल्केकु दिकुके बलि पेपेळेच गा घल्जी उपयोग डाकी होना। जब दिकु सेबाईकु डोंगा लिंजेन आदिरजे मेटे खुद परमेश्वर नी डोंगा गा दरोजो के बंदोके।

मेटे डा घामा चालुके, एठा डा घामा चालुका डोके। बिना रुकातिंजू चालीसो दिन एठा चालीसो राटो टाएन डा घामा लक्के। सेबाई दुनिया गा हर म्या चीजो, येटे टाएन कि ऊँचा टे ऊँचा टुक्की भी डा गेन नामोएन।

लोखोळ ओटे लिंजेन थंदळ मिनी हर म्या चीजो गोएन, डी कुरकू एठा जानवरकु के अराटे जो डोंगा गेन डा। डी डोंगा डा लिंजेन उयार लज्जे डोंगा गा ताला गा हर म्या चीजो के नामुजू टे सजाका डोके।

डा घामा गा रुकातिंजू गा बादोन, मोनाई महीना टाएन डी डोंगा डा लिंजेन उयारका लाक्के, एठा डी टेमो गा दौरान डा कामु लज्जे डा। मेटे म्या दिन डी डोंगा म्या टुक्की गा चुटी लिंजेन टेंगेंजे, लेकिन दुनिया आए भी डाटे उगुरके मेना डा। आफाई महिना गा बादोन, टुक्की गा चुटीनौर डूगु लज्जे मेना डा।

डाबोलटे एठा चालीसो दिननौर गा बादोन, नूह नी म्या कावळा के इनी दोडो गा घल्जी कुल्केनेच कि चोच डा लोखोळजे डा। डी कावळा लोखोळ ओटे के घागाटा इंगान-हुगान आफिरका लक्के, पेनो दियेन येनोगो तुनिका जगा बान घाटाडुका।

डाबोलटे बादोन नूह नी म्या कबूत्तर के बल्लान कुल्केनेच। पेनो दियेन भी तुनिका लोखोळ ओटे बान घाटाडुका, इनिघल्जी डीच नूह गा मेरान डाबोलटे हिराके। म्या हप्ताह गा बादोन डीचनी डी कबूत्तर के डाबोलटे कुल्केनेच, एठा डीच हेजा चंचु गेन जैतून गा म्या डांगोल साटे डाबोलटे हिराके। डा स्यागु लाके डा, एठा कोंबो डाबोलटे ओट लाक्के डा।

नूह नी म्या हप्ताह एठा राह डोके एठा आफाई बार डी कबूत्तर के बल्लान कुल्केनेच। इनी बार, दियेन रुकातिंजू गा जगा घाटाएन एठा डीच डाबोलटे बान हेज्डुका। डा लोखोळु लक्के डा।

बारी महीना बादोन परमेश्वर नी नूह टे मंडीके, “नका आम एठा अमा परिवार एठा सेबाई जानवरकु डोंगा टे बल्लान ओडे। घोनेचका कोंकूटे एठा नतुकू-संतुकू डाकू चाले एठा पृथ्वी के भेट्टिकी।” इनिघल्जी नूह एठा दियागा परिवार डोंगाटे बल्लान ओटजे।

नूह गा डोंगा टे बल्लान हेजे गा बादोन, डीचनी म्या वेदी आरुके एठा बलि गा घल्जी उपयोग डाऊ रोंगो मिनी हर रोंगो गा जानवरकु तालाटे अदाकु के साटे बलि पेळेचके। परमेश्वर डी बलि टे कुशोएन एठा नूह एठा दियागा परिवार के आशीष जीके।

परमेश्वर नी मंडीके, “इंज वादा जेवा मेना कि कुरकू गा द्वारा डाके मिनी बुरा कामय गा वाजाटे इंज डाबोलटे चोलाकाभी ओटे के श्रापो बान जिऊ या अडी द्वारा दुनिया के नशो डाए बाने, हालाँकि कुरकू इकुगा बचपन गा टेमो टे का पापी होय।

डाबोलटे परमेश्वर नी हेजा वादा गा चिन्हा गा रुपो गेन पेला इंध्राधनुष के आरुके। जब चोलाकाभी बादळा गेन इंध्राधनुष डूगुवा मेना होय, मेटे परमेश्वर यादोएवा कि डीचनी चोच वादा डाके होय एठा डेनोगोका दियागा कुरकू भी यादोएवा।