4. अब्राहम गा सेंग्गोन परमेश्वर गा वादा

अडी गा चोटोंका साल गा बादोन, दुनिया गेन घोनेच्का कुरकू थंदळ लक्कू डा, एठा दिकुनी डाबोलटे परमेश्वर गा एठा इनिज-दियागा खिलाफ गेन पापो डाके। चोयाकी दिकु सेबाईकु म्याका भाषा मंडी लक्कू डा, इनिघल्जी दिकु म्या सेंग्गोन गोलाएन एठा दुनिया के भाबट्टी गा परमेश्वर गा हुकूम गा बजाए म्या पूरा के आरुके।

दिकु भेबाव घमंडी डा, एठा दिकुके टोनोगो जीवन बिबातातिंज होना इनी बारेन दिकु परमेश्वर गा हुकूम गा पालन दडा बान चाहता डा। येटेका टाएन कि दिकुनी म्या येनोगो चुंबी उरा के आरु सुरुके जो स्वर्ग टाएन आदिरुवा। परमेश्वर नी डोके कि अगर दिकु म्या सेंग्गोन बेल्लाटे बुराई दडाका लक्कुवा, मेटे दिकु घोनेच्का पापी कामयनौर के डाए साकतावा होय।

इनिघल्जी परमेश्वर नी दिकुगा भाषा के घोनेच्का अलग्गो भाषानौर गेन बदलाके एठा डी कुरकू के सेबाई दुनिया गेन फैलातिंज्के। जो पूरा के दिकुनी आरु सुरुके डा दिकु बाबेल मंडेवा, डेगा मतलब होय “गळबोळ”।

चोटोका साल गा बादोन, परमेश्वर नी अब्राहम जीमू गा म्या कोरो टे बातो डावे। परमेश्वर नी दियाटे मंडीके, “आपना देशो एठा परिवार के आराटे डी देशो गेन सेंजू जो इंज आमके घालेवा। इंज आमके आशीष जेवा एठा अमाटे म्या खाटबेळे जाटो आरोएवा। इंज अमा जीमू महान डाएवा। जो आमके आशीष जे इंज डीचके आशीष जेवा, एठा जो आमके श्रापो जेवा डीचके इंज श्रापो जेवा। अमा वाजाटे दुनिया गा सेबाई कुल आशीष घाटाऊवा।”

मतलब अब्राहम नी परमेश्वर गा बातोके आजुम्के। डीचनी हेजा सेबाई सेवकुके एठा सेबाई संपत्ति गेल्ला हेजा जापाएटे सारा के सावे एठा डी देशो के, कनान देशो के ओले मेना जो परमेश्वर नी डीचके टिपीके डा।

जब अब्राहम कनान गेन अदिरजे मेटे परमेश्वर नी दियाटे मंडीके, “आपना उफुन भी कोनेन डोगे। इंज आमके इनी सेबाई देशो जेवा एठा अमा पिढी हमेशा गा घल्जी एने लिंजेन हाक डोएवा।” मेटे अब्राहम डी देशो गेन सुबांजे।

मलिकिसिदक जीमू गा म्या कोरो डा जो महान परमेश्वर गा याजक डा। म्या दिन जब अब्राहम लड़ाई दडा गा बादोन हेजे लक्के डा मेटे डीच एठा अब्राहम मिलातिंजे। मलिकिसिदक नी अब्राहम के आशीष जीके एठा मंडीके “महान परमेश्वर जो स्वर्ग एठा पृथ्वी गा स्वामी होय डीच आमके आशीष जे।” डाबोलटे अब्राहम नी लड़ाई गेन जीटाएन मिनी सेबाई चीजो गा गेल्जा भागो मलिकिसिदक के जीके।

चोटोका साल ओले, पेनो आए भी अब्राहम एठा सारा गा तुनिका कोंटे बाऊ डा। परमेश्वर नी अब्राहम टे बातो डावे एठा डाबोलटे वादा डावे कि दियागा म्या कोंटे डाऊवा एठा जैसा बदळा गेन इफिलकु होय डेनोगोका दियागा घोनेच्का पिढी डाऊवा। अब्राहम नी परमेश्वर गा हुकूम लिंजेन विश्वास डावे। परमेश्वर नी घोषणा डावे कि अब्राहम म्या धर्मी कोरो डा चोयाकी डीचनी परमेश्वर गा हुकूम लिंजेन विश्वास डाके डा।

मेटे परमेश्वर नी अब्राहम टे म्या वादा डाके। कास रुपोटे, म्या वादा बारी समूह गा तालान इनिज-दियागा घल्जी कामयनौर के दडा गा म्या समझौता डाऊवा होय। परमेश्वर नी अब्राहम टे डी वादा मेटे डाके डा जब अब्राहम गिटिच लक्के डा, पेनो डीच मेटेभी परमेश्वर के आजुम साकता डा। “इंज अमा कोम्बोर टे ओट्टे आमके अमा म्या खुद गा कोण के जेच्बा। इंज अमा पिढीनौर के इनी कनान देशो जेवा मेना।” पेनो आए भी अब्राहम गा तुनिका कोणटे बाऊ डा।