31. यीशु डा लिंजेन सेंदरावा होय

मोनाई हजार कुरकू के आटा जोमगा गा बादोन, यीशु नी हेजा चेलाकू टे डोंगान सेने गा घल्जी मंडीके। डीचनी दिकुके गडा गा दूसरा कोनेन सेने गा घल्जी मंडीके जबकि डीच थोडा टेमो गा घल्जी डिंगान का ठहरातिंजे। इनिघल्जी चेलाकू ओले मेना एठा यीशु नी गर्दी के बीडाके कि दिकु इकुगा उरान सेंजू। येनेगा बादोन, यीशु प्रार्थना दडा गा घल्जी म्या टुक्की लिंजेन ओले मेना। देटेन डीच एकलाका डा, एठा डीचनी खाट टाएन प्रार्थना डाके।

डी टेमो, चेलाकू हेजा डोंगा के चालोए लठ्ठाका चेल्के डा, पेनो कोयो दिकुगा खिलाफ गेन खाट जोर टे अडी लक्के डा। भेबाव राटोन भी बस गडा तालान का आदिरके डा।

डी टेमो यीशु नी प्रार्थना दडा स्याके एठा हेजा चेलाकू गा मेरान डाबोलटे सेने सुरुके। डी डोंगा गा कोनेन सेने गा घल्जी डा गा मठान सेंदरा लज्जे।

मेटे चेलाकूनी डीचके डोकेनेच। दिकु भेबाव हिघराएन चोयाकी दिकुनी सोचातिंज्के डा कि डीच तुनिका भूतो होय।यीशु हाडाई डा कि दिकु हिघराएन डा, इनिघल्जी डीचनी दिकुके आवाज जीटे मंडीके, “हिघरा बाकी, इनिज इंज्का मेना!”

मेटे पतरस नी यीशु टे मंडीके, “हे प्रभु, अगर येटेन होय मेटे इंज्के डा लिंजेन सेंदरा टे अमा मेरान हेजे गा हुकूम जिली।” यीशु नी पतरस मंडीके, “हेजे!”

इनिघल्जी पतरस डोंगा टे अगुरोएन एठा यीशु गा मेरान सेने गा घल्जी डा गा लिंजटे सेंदरा सुरुके। पेनो थोडा लेंक्कीन ओलेडो, डीचनी मेट के यीशु टे बाजुनके एठा लापा के दोडो एठा तेज कोयो के महसूस दडा सुरुके।

मेटे पतरस हिघराएन एठा डा गेन नमुजू लज्जे। डीच चिल्लातिंज्के, “हे प्रभु, इंज्के बचातिंज कोम!” यीशु नी डीका टेमो टी बळातिंजटे डीचके उठायेनेच। मेटे डीचनी पतरस टे मंडीके, “अमा विश्वास घोनेच कम होय! आमके सजाका दोडो गा घल्जी आमनी इंजा लिंजेन भरोसा चोया बान दडुका?”

मेटे यीशु एठा पतरस डोंगा लिंजेन पेळेन, एठा तुरुटो कोयो गा सेंदरा बंदोएन। डा शान्तेन। चेलाकू नी बिचारजे डो यीशु गा सम्मान टोपरे जेगाके। दिकुनी आराधना डाके एठा दियाटे मंडीके, “सच्चोका आम परमेश्वर गा कोण होय।”