32. यीशु भूतो मुके कोरो के एठा बीमार जापाए के सजाएचबा होय

यीशु एठा दियागा चेला हेजा डोंगा गेन डी इलाका गेन ओले देटेन गिरसेनी कुरकू थंदळ डा। दिकु डी इलाका गेन आदिरजे डो डोंगा टे अगुरोएन।

देटेन म्या कोरो डा जो भूतो मुके डा।

इनी कोरो इतना ताखतदार डा कि जेकाभी डीचके काबूएच बान सकता डा। चोटोका बार कुरकू नी दियागा टी एठा नंगा के सकळीनौर टे भी टोल्केनेच, पेनो डीच डीके टुक्काके डा।

डी कोरो डी इलाका गेन कब्र गेन थंदळ लक्कू डा। इनी कोरो पूरा दिन एठा पूरा राटो चिल्लातिंजू डा। डीच कपळे बान उरी डा एठा अक्सर खुद के घोटा टे घायले लक्कू डा।

डी कोरो सळुपटे यीशु गा मेरान हेन एठा दियागा सम्मान टोपरे जेगाके। मेटे यीशु नी डी कोरो गा ताला गा भूतो टे बातो डावे एठा मंडीके, “इनी कोरो तालाटे बल्लान ओडे!”

डी भूतो खाट्टेका चिल्लातिंज्के, “हे यीशु परम प्रधान परमेश्वर गा कोंटे, अमा इंजटे चोच कामय? कृपा डाटे इंज्के बाकी ससातातिंज!” मेटे यीशु नी डी भूतो टे कोम्बाराके, “अमा जीमू चोच होय? डीचनी जवाब जीके, “इंजा जीमू सेना होय, चोयाकी आले घोनेच्कू होय।” (रोमी सेना गेन चोटोका हजार सैनिककु गा म्या समूह म्या “सेना” थंदळ डा।)

डी भूतोकु नी यीशु टे विनती डाके, “कृपा डाटे आलेके इनी इलाका टे बल्लान बाकी कुकूल!” देटेनका मेरा गा टुक्की लिंजेन सुकळीकु गा म्या घोंजा चचारा लक्के डा। इनिघल्जी डी भूतोकु नी यीशु टे बिनती डाके, “कृपा डाटे आलेके डी सुकळीकु गेन कुल्केमी!” यीशु नी मंडीके, “सही होय, दिकु तालान सेंजू!”

इनिघल्जी डी भूतोकु डी कोरो तालाटे ओटजे डो डी सुकळीकु गा तालान मोएन। डी सुकळीकु सळुपटे चुटी टे तालाव गेन ओएन एठा नमोएन डो गोएन। डी घोंजा गेन अंदाजोटे २००० सुकळीकु डा।

देटे जगान डी सुकळीकु गा देखभाल दडामिंकू कुरकू डा। जो चोच्का डाएन डा जब दिकुनी डोके दिकुनी पूरा गेन सळुपजे मेना। यीशु नी जो डाके डा देटेन दिकुनी सेबाईकूके घल्के। डी पूरा गा कुरकू ओटके मेना एठा डी कोरो के डोकेनेच दियेन भुतोकू डा। दिकु शांति टे, कपळे उरिके मिनी, एठा म्या कास कोरो गा खिजा व्यवहार दडा लठ्ठाका सुबांके डा।

डी कुरकू भेबाव हिघराके मेना डा एठा दिकुनी यीशु टे सेंजू मेना गा घल्जी मंडीके। इनिघल्जी यीशु जीमू लिंजेन पेळेन। डी कोरो दियेन भूतोकु डा डीचनी यीशु गा सेंग्गोन सेने गा विनती डाके।

पेनो यीशु नी दियाटे मंडीके, “बाने। इंज चाहतावा मेना कि आम उरान सेनेडो सेबाईकु के घाले कि परमेश्वर नी अमा घल्जी चोच डाके होय। दिकुके घाले कि टोनोगो परमेश्वर नी इंजा लिंजेन दया डाके डा।”

इनिघल्जी डी कोरो ओले मेना एठा सेबाईकु के येने बारेन घल्के जो यीशु नी दियागा घल्जी डाके डा। दियागा कहानी के आजुम मिंकूनी हर म्या कोरो बिचारजे मेना डा।

यीशु गडा गा दूसरा कोनेन हिराएन। दियागा डेन आदिरू गा बादोन, म्या खाट गर्दी दियागा आसोपसोन गोलाएन मेना एठा डीचके ददाबातिंज लज्जे। डी गर्दी गेन म्या जापाए डा जो बारह साल टे पाचना आडी गा समस्या टे बीमार डा। डीचनी हेजा पूरा डामा दवाईमिंकुके जीके डा ताकि दिकु डीचके सजाकेच, पेनो दियागा रोगो येठाभी बिगळातिंजे डा।

डीचनी आजुम्के डा कि यीशु नी चोटोका बीमार कुरकू के सजाकेकु डा एठा डीचनी बिचारके, “इंज पक्कान मेना कि अगर इंज बस यीशु गा कपळे केका उठाया, मेटे इंजभी सजाऊवा!” इनिघल्जी डीच यीशु गा टाऊटे हेन एठा दियागा कपळे के उठाये। जैसा कि डीचनी डीचके उठायेनेच, पचना गा आडी बंदोएन।

तुरुटोका, यीशु नी चिनाये कि दिया तालाटे शाक्ती ओटजे होय। इनिघल्जी डीचनी टाऊ मुराटे कोम्बाराके, “इंज्के जेनी उठाकेमी?” चेलाकुनी जवाब जीके, “येटेन येटो घोनेच कुरकू नी अमा उफुन भी कोनेन गर्दी येंडाके मेना होय, एठा आमके धुधाक्का लक्के होय। मेटे आमनी चोच कोम्बाराके कि इंज्के जेनी उठाकेमी होय?”

डी जापाए यीशु गा सम्मान कपातिंजू लठ्ठाका हेन एठा भेबाव हिघराके मेना हेजा टोपरे लिंजेन सुबांके मेना। मेटे डीचनी डीचके घाल्के कि डीचनी चोच डाके होय, एठा इनीभी कि सही डाएन होय। यीशु नी दियाटे मंडीके, “अमा विश्वास नी इंज्के सजाकेमी होय। शांति टे सेने।”