34. यीशु दूसरा कहानीनौर गा शिक्षा जेवा होय

यीशु नी परमेश्वर गा गा राज्य गा बारेन अलग्गो घोनेच्का कहानीनौर घाल्के। उदाहरण गा घल्जी, डीचनी मंडीके “परमेश्वर गा राज्य म्या राई गा बीजो गा रोंगो होय जेकानी हेजा खीटिन बिटके। आपे हाडाई होय कि राई गा बीजो सेबाई बीजो गेन सेबाई टे सनी थंदळबा होय।”

“पेनो जब राई गा बीजो बळातिंजुवा होय मेटे डी बगीचा गा सेबाई टे खाडुवा होय, येटो खाट कि भूरीकु हेजेवा डो डेगा डंगोलनौर लिंजेन आराम्बो दडावा होय।”

यीशु नी म्या अलग्गो कहानी घाल्के, “परमेश्वर गा राज्य खामीर गा रोंगो होय डीके साटे म्या जापाए कोलोम गा गुली गेन बेल्लाएवा होय मेटे डी सेबाई गुली गेन फैलातिंजूवा होय।”

“स्वर्ग गा राज्य डी खजाना गा रोंगो होय डीके जेकानी खिटी गेन उखुके। तुनिका अलग्गो कोरो गेन डी खजाना घाटाएन एठा डीचनी डीके घाटाऊ गा घल्जी बिचारके। इनिघल्जी डीचनी डीके डाबोलटे गळातिंज्के । डीच खुशी टे येटो भेट्टेन मेना डा कि डीचनी ओलेडो हेजा सेबाईका किजिके ताकि डीच डी खिटी के साया होना देटेन डी खजाना डा।”

“स्वर्ग गा राज्य म्या घोनेच किमती सजा मोती गा रोंगो भी होय। जब तुनिका मोतीनौर गा व्यापारी डीके घाटाएवा होय मेटे डीच डीके सगा घल्जी हेजा सेबाईका किजेवा होय।”

देटेन अदा कुरकू डा जो सोचातिंज डा कि परमेश्वर दिकुके इनिघल्जी मने नेबा चोयाकी दिकु भला कामय दडा लक्के होय। इनी कुरकू येनोगो कुरकू के बेकार मेन डा जो डी भला कामय के बान दडा डा। इनिघल्जी यीशु नी दिकुके इनी कहानी घाल्के: “बारी कोरो किंज डा एठा बार्खिज भी प्रार्थना दडा गा घल्जी मंदिर गेन ओले। दिकु तालाटे म्या टेक्सा सा मिठाच डा, एठा दूसरा म्या धार्मिक अगुवा डा।”

“डी धार्मिक अगुवा नी इनी रोंगो टे प्रार्थना डाके, ‘हे परमेश्वर, अमा धन्यवाद डायु कि इंज अलग्गो कुरकू गा रोंगो जैसा कि डाकु, अलग्गो कोरो, अनोवा, या येटे जगान टाकू मिंकू डी टेक्सा मिंकूगा रोंगो म्या पापी बाऊ मेना।”

“उदहारण गा घल्जी, इंज हर हफ्ताह गेन बारी उपासो दोडोवा मेना, एठा इंज इंजेन घाटाऊ घल्जी डामा एठा समोन गा गेल्जा हिस्सा आमके जेवा मेना।”

“पेनो डीच टेक्सा सा मिठाच डी धार्मिक अगुवा टे ठायका लेंक्कीन टेंगेंजे। डीचनी मठान स्वर्ग गा कोनेन मेट भी बान टूलडुका। येनेगा बाजाए, डीचनी कासा टे हेजा छाती के मुंडाके एठा प्रार्थना डाके, ‘हे परमेश्वर, कृपा डाटे इंजा लिंजेन दया डाए चोयाकी इंज म्या पापी मेना।”

डाबोलटे यीशु नी मंडीके, “इंज अपाटे सच्चो मंडीवा मेना, परमेश्वर नी डी टेक्सा सा मिठाच गा प्रार्थना के आजुम्के एठा डीके धर्मी एलान डाके। पेनो डीचनी डी धार्मिक अगुवा गा प्रार्थना के पसंद बान दडुका। परमेश्वर हर म्या घमंडी गा कापर के ईटानेवा, पेनो डीच हर डी कोरो के आदर जेवा जो खुदके नम्र दडावा होय।”