35. दयालु बाटे गा कहानी

म्या दिन, यीशु डी घोनेच्का कुरकू के शिक्षा जिऊ लक्के डा जो दियागा आजुम गा घल्जी गोलाएन मेना डा। इनी कुरकू टेक्सा सा मिठाच एठा सेंग्गोन का अलग्गो कुरकू भी डा दिकुनी मूसा गा नियम गा पालन दडा गा कोशिश बान दडुका डा।

अदा धार्मिक अगुवाकु नी डोके कि यीशु इनी कुरकू टे म्या सोप्ती गा रोंगो बातो लक्के डा। इनिघल्जी दिकुनी इनिज-दियाटे इनी मंडी सुरुके कि डीच गलत दडा लक्के डा। यीशु नी दिकुके लठ्ठाका आजुम्के, इनिघल्जी डीचनी दिकुके इनी कहानी घाल्के।

“म्या कोरो डा दियागा बारी कोण किंज डा। सनी कोणटे हेजा बाटे टे मंडीके, ‘हे बाटे, इंज्के आए इंजा हिस्सा होना!’ इनिघल्जी बाटे नी हेजा बारी कोण किंज गा तालान हेजा संपत्ति गा खाठिंजके।”

“जल्दिका सनी कोणटे हेजा सेबाईका गोलाटे लेंक्की देशोन ओले एठा पापी जीवन बिबातातिंज गेन हेजा सेबाई डामा के बर्बाद के।”

“येनेगा बादोन, देटेन सानी कोण डा डी देशो गेन म्या भयंकर सुकाल बोचोएन, एठा दियागा मेरान सा गा घल्जी डामा बाऊ डा। इनिघल्जी डीचके जो कामय घाटाएन डीच सुकळीकु के चचारा गा डा। डीच येटो दुखी एठा रांगेच्का डा कि डीच सुकळीकु गा आटा जोम चाहता डा।”

“आखरीन, डी सनी कोण नी खुद टे मंडीके, ‘इंज चोच दडा लक्के मेना? इंजा बाटे गा सेबाई सेवककु गा मेरान जोम गा घल्जी घोनेच टेका होय, फिरभी इंज येटेन रांगेच गुजू लक्के मेना। इंज इंजा बाटे गा मेरान डाबोलटे सेनेवा एठा हेजा बाटे गा म्या सेवक आरु गा घल्जी दियाटे बिनती डाएवा।”

“इनिघल्जी डी सनी कोणटे नी डाबोलटे हेजा बाटे गा उरा गा कोनेन सेने सुरुके। जबकि डीच आए भी लेंक्कीन के डा, दियागा बाटे नी डीचके डोकेनेच एठा दिया लिंजेन दया हेन। डीच सळुपटे हेजा कोणटे मेरान एठा डीचके खंडा मिलातिंज्टे जोका जोवे।”

“डी कोण नी मंडीके, ‘हे बाटे, इंज्नी परमेश्वर गा एठा अमा खिलाफ बेन पापो डाके होय। इंज अमा कोण मंडी गा लायको भी बाऊ मेना।’”

“पेनो बाटे नी हेजा म्या सेवक टे मंडीके, ‘झाल्लो सेने सेबाई टे अच्छा कपळे साटे हेजे एठा इंजा कोण के पंचारेच! दियागा बोटो गेन मुंडी एठा दियागा नंगा गेन बुट्टा उरे। डाबोलटे सेबाईटे अच्छा मेंडा कोंटे गोजेच ताकि आले जोमे एठा तिवार मनातिंजे, चोयाकी इंजा कोण गोएन मेना डा, पेनो नका डीच जिटाका होय! डीच आटजे मेना डा, पेनो नका आलेनी डीके घाटाये होय!”

“इनिघल्जी कुरकू नी तिवार ममानातिंज सुरुके। अदा टेमो सेने लिंजेन, खाट कोण खिटीन कामय डाटे उरान हेन। डीचनी संगीत एठा नाचो गा आवाज के आजुम्के एठा बिचारजे मेना कि इनी चोच डाऊ लक्के डा।”

“जब खाट कोण गेन मलुम्जे मेना कि डीच इनिघल्जी तिवार ममानातिंज लक्के डा चोयाकी दियागा डाईटे उरान हेन मेना डा, मेटे डीच भेबाव खीजोएन एठा उरा गेन मु डुका बाने। दियागा बाटे नी बल्लान हेनडो दियाटे दिकुगा सेंग्गोन तिवार ममानातिंज गा निवेदान जीके, पेनो डीचनी बान मेंके।”

“डी खाट कोंटे नी हेजा बाटे टे मंडीके, ‘इनी सेबाई साल गेन इंज्नी अमा घल्जी ईमानदारी टे कामय डावे! चोलाकाभी अमा बातो के बान बोचोडुका, पेनो आमनी चोलाका इंज्के म्या सनी सिळी केभी बान जीडुका ताकि इंज इंजा सोप्तीकु के सेंग्गोन जोम गेन सालेकु होना। पेनो अमा इनी कोण नी अमा डामा के पापी कामय दडा गेन बर्बाद के होय। एठा नका जब डीच हेन होय मेटे दियागा घल्जी तिवार ममानातिंज के आमनी सेबाई टे अच्छा सिळी कोंटे के गोच्केनेच!”

“बाटे नी जवाब जीके, ‘हे इंजा कोण, आम हमेशा इंजागा सेंग्गोन होय, एठा जो चोच्का इंजा होय डी सेबाई अमा होय। पेनो आलेगा घल्जी तिवार ममानातिंज सही होय चोयाकी अमा बोको गोएन मेना डा, पेनो नका डीच जिटाका होय। डीच आटजे डा, पेनो नका आबूनी डीचके घाटायेनेच होय!’”